Jơnum kiăng klah čun pơsit hơdôm bôh than hmâo kơsem min, pơtô glăi mă yua bôh thâo phrâo hăng hơdră mă yua măi amăng bruă đang hmua yua măi mok yôm; hơdră pơkra kơmok yua pioh pơdjuai, rông pla hăng rak pioh, pơkra hơdôm mơta djuai phun pla (phun jrao, phun bôh troh, braih apiăng); bơmao jrao hăng bơmao ƀong mơ̆ng hơdôm bôh tơring čar kual Dap Kơdư; Tơlơi găn rơgao kơ pơđĭ kyar bruă đang hmua mă yua hơdră phrâo măi mok yôm, hơdră pơkra kơmok mơ̆ng ƀôn prong Hồ Chí Minh.

Hơpluh  pă thun čih lăi pơthâo mơ̆ng ƀing juăt bruă, mơnuih wai lăng hrŏm hăng lu tơlơi gum pơhiăp amăng mông Jơnum brơi ƀuh, kual Dap Kơdư hmâo kual lŏn prong tal 3 đơ đam dêh čar hăng hmâo anô̆ gal pioh pơđĭ kyar bruă đang hmua. Rơđah biă ñu, hăng ayuh hyiăng gêh gal, hơdôm bôh tơring čar Dap Kơdư hmâo pơhư kơtang laih djop mơta djuai añăm pla, bơnga, bôh troh, phun pla sui thun, phun kyâo pơtâo hăng phun jrao klă hiam. Mơ̆ng anun, pơđĭ tui nua bơwih ƀong huă ƀơi kual lŏn ngă đang hmua hăng pok prong anih anom sĭ mơdrô gơnam amăng lŏn ia hăng sĭ kơ dêh čar tač rơngiao kah hăng kơphê, tiu, bôh kruăi hrĕ, bôh ñông hăng mắc ca, kơ su. Khă hnun hai, nua sĭ kơ dêh čar tač rơngiao, sĭ gơnam mă mơ̆ng đang hmua mơ̆ng Dap Kơdư ăt dô̆ ƀiă mơn, akă djơ̆ hăng tơhnal gal, bôh tŭ yua hmâo mơ̆ng Dap Kơdư.

Ơi Nguyễn Hữu Tháp, Kơ-iăng Khua Jơnum min mơnuih ƀôn sang tơring čar Kon Tum lăi lĕ, bruă gum hrŏm hăng ƀôn prong Hồ Chí Minh amăng kơsem min bôh thâo phrâo pơlar hơdră mă yua, pơtrut tô nao rai pok tơbiă tơlơi čang rơmang prong, djru pơjing hơdôm jơlan pơlir hơbit gơnam mă mơ̆ng đang hmua djơ̆ tui tơhnal gal mơ̆ng Dap Kơdư:

“Ƀôn prong Hồ Chí Minh lĕ sa anih anom phun bơwih ƀong – mơnuih mơnam hăng ăt lĕ anih phun kơsem min bôh thâo phrâo măi mok jing sa anih sĭ mơdrô klă biă. Hơdôm bôh tơring čar kual Dap Kơdư hmâo gơnam hmâo nua biă. Ƀing gơmơi pơjing jơlan pơlir hơbit, tô nao rai pơjing tơlơi pơđĭ kyar”.

Gah bruă gum hrŏm pơđĭ kyar bruă đang hmua mă yua hơdră phrâo măi mok yôm kơplah wah hơdôm bôh tơring čar Dap Kơdư hăng ƀôn prong Hồ Chí Minh, khua pơ ala lăi lĕ, kiăng hmâo jơlan gah pơsit rơđah, lăp djơ̆ hăng hơdră pha ra ha jăn pioh ngă pơhưč hơdôm mơta bơwih ƀong, anom bơwih ƀong hmâo akô̆ tlôn gum hrŏm tuh pơplai, pơplih phrâo hơdră mă yua măi mok. Hơdôm bruă amra gum hrŏm kơsem min, ngă giong glông bruă, pơtô juăt, amăng anun hmâo: hơduah ĕp djă pioh, pơgang ba gen djop djuai añăm pơtăm bôh troh, phun jrao, bơmao...djru bruă ruah pơjeh pơdjuai. Gum hrŏm hăng ƀôn prong Hồ Chí Minh amra djru Dap Kơdư pơplih hơdră mă yua măi mok răk pioh gơnam tơdơi kơ pĕ pơhrui; mă yua bôh thâo phrâo măi mok, pơplih phrâo măi mok amăng bruă ngă đang hmua; pơtô juăt pơhrăm brơi amăng bruă đang hmua mă yua bôh thâo phrâo măi mok...

Nai prin tha Hoàng Anh Tuấn, Kơ-iăng Khua Anom kơsem min bôh thâo phrâo hăng pơtô pơhrăm, Grŭp wai lăng Kual ngă đang hmua yua măi mok yôm ƀôn prong Hồ Chí Minh brơi thâo, hmâo lu hơdră pioh anom gum hrŏm kơsem min, mă yua hơdră phrâo măi mok ngă đang hmua kơ hơdôm bôh tơring čar Dap Kơdư:

 “Abih bang hơdôm tơlơi mơ̆ Grŭp wai lăng kual ngă đang hmua hmâo laih, hơdôm bôh tơhnal dưi ngă tơdah djơ̆ hăng hơdôm bôh tơring čar kual Dap Kơdư thơ Grŭp wai lăng amra djru. Amra jing hơdră gum ngă hơdôm bruă kơsem min ƀơi plơi pla tui ngăn drăp mơ̆ng plơi pla. Gum hrŏm hăng ƀôn prong Hồ Chí Minh ƀudah ƀôn prong Hồ Chí Minh amra pok pơhai hơdôm bôh yôm lăp djơ̆ pioh djơ̆ hăng jơlan pơsir tơlơi hmâo sit mơ̆ng kual Dap Kơdư. Djru hluai tui hơdôm jơlan hơdră pơtô pơhrăm pơđĭ dlông bôh thâo mă yua măi mok anom kơsem min, anih anom mă yua amăng bruă kơsem min bôh thâo phrâo”.

Thun 2024, ƀôn prong Hồ Chí Minh hăng hơdôm bôh tơring čar kual Dap Kơdư amra gum hrŏm pơphun 3 bruă mă gưl kual, amăng anun hmâo: Jơnum ngui sâm hăng phun jrao jar kơmar amăng blan 5, Jơnum ngui sang čơ pơdă prưng djuai pơjeh hăng bruă đang hmua yua măi mok yôm (amăng blan 6) hăng Rơwang hrơi tơjuh gơnam OCOP, gơnam pha ra ha jăn kual hăng hơdră mă yua măi mok ngă đang hmua – răk pioh gơnam – pơkra gơnam (amăng blan 11). Phrâo rơgao ƀơi mông jơnum bơkơtuai, pơlir hơbit bôh yôm pok pơhai gum hrŏm amăng bruă đang hmua thun 2024 kơplah wah ƀôn prong Hồ Chí Minh hăng hơdôm bôh tơring čar Dap Kơdư, ơi Đỗ Xuân Dũng, Kơ-iăng Khua Gơnong bruă đang hmua hăng pơđĭ kyar ƀôn lan tơring čar Dak Lak ăt čang rơmang mơn tô nao rai hăng hơdôm gơnam klă hiam, ba glăi bôh tŭ yua kơ mơnuih ƀôn sang hăng anom bơwih ƀong./.