Glăk pĕ 1,5 ha mơkai mơ̆ sang anŏ apah mă lŏn arăng či pla pơ tơring kual Phú Túc, tơring glông Krông Pa, ơi Nguyễn Văn Kính (mơng tơring čar Phú Yên) dŏ kơ-ŭ yua bơyan anai mơkai ƀu mơboh. Ñu brơi thâo, ăt ƀơi lŏn anai mơn, bơyan hlâo, adai lăp djơ̆, mơkai ñu prong biă, truh pơ 8kg lŏm sa boh, samơ̆ thun anai mơkai djơhôl biă.

“Kâo ngă mơkai giăm dua pluh thun anai laih, hơmâo thun ƀong thun ƀŭ, kơnong thun anai mơkai ƀu rup biă mă. Neh met wa ngă mơkai pơ anai lêng kơ čan prăk mơng sang bruă prăk soh, neh met wa ăt gir thun tơdơi ngă glăi dong mơn, tơdah mơkai mơboh, nua pơmă mơn tui anun amra dưi tla abih hnưh”.

Mơng plơi prong An Nhơn, tơring čar Bình Định nao apah mă 3 ha lŏn hmua ƀơi să Ia Mlăh, tơring glông Krông Pa, tơring čar Gia Lai či pla mơkai, ayong Nguyễn Nhật Tân ƀu mơ-ak ôh, ñu lăi ñu tuh pơ plai 1 ha mơkai mơng hrơi pla truh hrơi pĕ năng ai 150 klăk prăk. Bơyan anai hơjan lu, mơkai ƀu hiam ôh, anun jing hơmâo mơng 30 truh 34 tơn đôč lơ̆m 1 ha, arăng blơi mơng 3 truh 3,5 rơbâo prăk/kg. Jŭ yap lăng, bơyan mơkai thun anai ayong Tân rơngiă năng ai 60 klăk prăk.

“Thun anai adai ƀu lăp anun jing mơkai ƀu mơboh tui hăng hlâo adih ôh, hlâo adih, 1 ha hơmâo năng ai 40 tơn, thun anai hrơi pơ-iă aset đơi anun jing mơkai ƀu mơboh ôh, pô ngă mơkai huač prăk, 1 ha rơngiă pluh hơdôm dua pluh klăk prăk ƀơ̆i”.

Ră anai, tơring glông Krông Pa hơmâo rơbêh 1000 ha đang mơkai, pơhrui glăi năng ai ñu 40.000 tơn. Ơi Võ Ngọc Châu - Khua anom bruă hmua hăng pơđĭ kyar ƀon lan tơring glông Krông Pa brơi thâo, abih bang đang mơkai lĕ mơnuih mơng pơkŏn glăi apah lŏn pơ anai pla mă pô, ƀu hơmâo amăng hơdră ngă bruă mơng tơring glông ôh. Rơngiao kơ anun, ƀing hyu mơdrô blơi mơkai tui hluai gơñu mơn, ƀu hơmâo hră pơ-ar hơget ôh anun jing gong gai hăng anom apăn bruă ƀu thâo djru hiư̆m pă kơ ană plơi ôh.

“Hlâo kơ anun, hơjan na nao mơtăm, ngă mơkai peñ hla, jing mơkai ƀu mơboh ôh. Lu mơnuih ngă mơkai rai mơng Bình Định, Phú Yên apah mă lŏn pơ Krông Pa anai či ngă hmua, ƀu djơ̆ mơnuih pơ anai ôh, anun tơnap biă amăng bruă iâu pơthưr hơdôm boh sang anŏ, yua dah arăng rai apah mă lŏn ngă hmua đôč, ƀu hơmâo dŏ pơ anai ôh, anun jing wai lăng tơnap mơn”.