Sang anŏ yă Thái Thị Hường, ƀơi thôn 8, să Ea Kpam, tơring glông Čư̆ Mgar hơmâo 8 ar đang tiu pla amăng đang kơphê. Truh bơyan pĕ tiu, ñu lăi tiu thun anai đĭ tui năng ai 40% pơkă hăng thun hlâo. Nua tiu ăt đĭ tui mơ̆n mơ̆ng akŏ bơyan phrâo pĕ tiu, rơnoh mơ̆ng 67 rơbâo truh 70 rơbâo prăk sa kg kiăng djru ba kơ mơnuih ƀôn sang plai ƀiă rơnoh prăk tuh pơ alin mơ̆ng hlâo kơ anun, blơi gơnam yua mă bruă pơmă. Yă Thái Thị Hường brơi thâo:

“Ayuh hyiăng thun hlâo ngă kơ tiu ƀu boh ôh, bơ thun anai gêh găl ƀiă tiu boh lu samơ̆ nua čang rơmang đĭ đăi, hnun kah ta pơhlưh rơnoh prăk tuh pơ alin, prăk apah mă bruă djop ƀiă laih anun hơmâo hmăi kơmlai kơ ta”.

Tui hăng yă Ngô Thị Mỹ Hạnh, thôn 3, să Ea Bhôk, tơring glông Čư̆ Kuin, bơyan tiu thun anai boh jor ƀiă samơ̆ nua đĭ đăi ƀiă mơ̆n ăt hok mơak pran jua. Ră anai, sang anŏ hơmâo 6 ar đang tiu, rơnoh tiu pĕ hơmâo 3 tơn, lu hloh thun hlâo 1 tơn, sang anŏ hlăk pơtum apah mơnuih mă bruă brơi giong hĭ čang rơmang sĭ hơmâo nua pơmă đah mơ̆ng pơhrua glăi rơnoh prăk tuh pơ alin:

“Lơ̆m tiu trun nua, rơnoh apah mơnuih mă bruă yôm, nua hơbâo kmơ̆k pruai, ia săng ia jâo lĕ đĭ, djop mơta đĭ soh thun hlâo. Tiu lĕ hlăt ƀong arong pơčram yua ayuh hyiăng lŏn adai ngă ƀu gêh găl ôh anun yơh sang anŏ gơmơi bưp lu tơlơi tơnap tap, čang rơmang pơ anăp anai nua tiu đĭ ƀiă, đĭ lu hloh klă hloh. Anun lĕ tơlơi mơak mơ̆ng gơmơi mơnuih ngă hmua”.

Đơ đam tơring čar Dak Lak hơmâo giăngm 32 rơbâo ha đang tiu, rơnoh tiu pĕ pơhrui hơmâo 80 rơbâo tơn. Nua tiu đĭ trun amăng hơdôm thun rơgao, lơ̆m anun ayuh hyiăng lŏn adai ƀu gêh găl ngă răm ƀăm lu, nua gơnam yua mă bruă, apah mơnuih mă bruă lêng kơ đĭ pơmă soh, anun yơh bơbeč truh hnong pơhrui glăi mơ̆ng mơnuih ngă hmua pla tiu. Rơnoh tiu hlăk đĭ tui mơ̆ng akŏ bơyan phang thun 2023 lĕ sa tơlơi bơkơnăl hiam klă pioh kơ mơnuih ngă hmua hơđong pran jua tuh pơ alin pla tiu hơđong kjăp.