- Ơ ơi, tui hăng Kơčăo bruă đĭ kyar kơphê hơđong kjăp truh pơ thun 2030, tơring čar Dak Lăk pơsit đang pla kơphê hơmâo năng ai 200.000ha, pơhrui glăi 2,5 tơn/ha. Tui anun, kiăng dưi ngă tui tơlơi kiăng, tơring čar hơmâo hơdră ngă bruă hiư̆m pă thơ?

Ơi Nguyễn Thiên Văn: Amăng mông pơphun ngă Kơčăo bruă đĭ kyar kơphê, tơring čar Dak Lăk amra pơƀut ngă klă bruă pơkra gơnam. Kiăo tui hră lơkak čih pơƀuh anih anom ngă hmua mă yua djah djâo kmơk pruai hơdjă, lŏn tơnah lăp djơ̆, tơring čar amra pơtrut pơsur hăng pơtă pơtăn kơ neh met wa ruah mă kual lŏn lăp djơ̆ ču tuh pơ alin boh thâo phrâo ngă hmua hăng pla glăi phun kơphê. Ƀing gơmơi amra akŏ pơjing kual ngă hmua pla sa djuai phun, pơƀut pơkra gơnam hơdjă, hơmâo hră pơ-ar, anăp nao kiăng hơmâo 80% đơ đam đang kơphê hơmâo pla tui hơdră anai. Rơngiao kơ anun, tơring čar amra pơkra bơnư̆, king ia lăp djơ̆ pơhlôm hơmâo ia kơ phun pla. Tơring čar lăi pơthâo hơdră pĕ pơhrui, djă pioh gơnam, pơhlôm 95% mrô gơnam hơmâo ƀhu hna tui tơlơi pơkă.

- Hnun hă, ră anai hơdôm tơlơi pơkă kơ anŏ klă gơnam tam jai hrơi tơnap tui, biă ñu lĕ gơnam mơ̆ng hmua dưi ba sĭ pơ čar rơngiao kah hăng kơphê, tui anun kiăng djơ̆ hăng tơlơi kiăng mơ̆ng anih sĭ mơdrô, pơ anăp anai, tơring čar Dak Lăk amra lăp đing nao bruă anai hiư̆m pă thơ?

Ơi Nguyễn Thiên Văn: Ƀing gơmơi pơsit khŏm hơmâo kual pla gơnam klă, khŏm prong. Tal dua dong hla tui abih bruă pơkra gơnam tui rơnuk phrâo, huăi hơƀak ayuh hyiăng laih anun plai ƀiă huač prăk kăk kiăng hơmâo gơnam hơmâo hră pơsit lăp djơ̆ hăng tơlơi kiăng mơ̆ng anih sĭ mơdrô amăng lŏn ia ta wơ̆t hăng jar kmar. Kiăo tui gơnam tam klă tui anun, gơmơi pơƀut đĭ kyar kual sang măi pơkra gơnam đah mơ̆ng iâu pơthưr hơdôm anom bơwih ƀong pơkra gơnam ƀơi hơdôm kual sang măi mơ̆ng tơring čar. Mơ̆ng anun amra pơkra gơnam klă hloh, nua pơmă hloh mơn. rơngiao kơ anun, akŏ pơjing anăn păn hmư̆ hing ăt kah hăng hơmâo hră pơ-ar čih pơthâo anih pơkra kơphê Buôn Ma Thuột kiăng ba gơnam klă hiam mơ̆ng ƀing ta dưi sĭ amăng dêh čar wơ̆t hăng ƀơi jar kmar.

- Tui hăng ih, kiăng đĭ kyar ngă kơphê hơđong ƀing ta kiăng pơlir hơbit kjăp tui anŏ yôm mơ̆ng rim bruă pơkra gơnam. Tui anun tơring čar hơmâo hơdră hơget thơ či djru mơnuih ngă hmua hăng anom bơwih ƀong amăng bruă pơkra gơnam, pơđĭ tui nua hăng pok prong anih sĭ mơdrô tui bruă ngă hrŏm pơlir hơbit anai?

Ơi Nguyễn Thiên Văn: Tơring čar Dak Lăk amra gum hrŏm hăng mơnuih ngă hmua, pơplih klă tui hơdôm anom bruă djru ba mơnuih ngă hmua, kah hăng sang bruă prăk, anih kơsem min boh thâo, sang bruă kơsem min boh thâo ia rơgơi, đah mơ̆ng djru ba neh met wa dưi mă yua boh thâo ia rơgơi hăng prăk kăk pioh ngă hmua pơkra gơnam. Laih dong pơtrut anom bơwih ƀong gah kơphê pơtrut pơkra gơnam, pơđĭ tui anŏ yôm, djơ̆ hăng tơlơi kiăng đĭ kyar bơwih ƀong huă - mơnuih mơnam. Tơring čar Dak Lăk amra pơƀut pơsir brơi tơlơi gun, dŏ kơđông, hơmâo hơdră pơplih yôm, jao bruă, jao tơlơi dưi lăp djơ̆ laih dong gum hrŏm hăng anom bơwih ƀong pơhưč anom bơwih ƀong rai tuh pơ alin pơ Dak Lăk, ăt kah hăng ngă hrŏm tom grup mơnuih ngă hmua či pơlir hơbit gơnam tam tañ ƀiă đah mơ̆ng ba gơnam mơ̆ng tơring čar Dak Lăk truh pơ anih sĭ mơdrô ăt kah hăng gum pơkra klă pơkra dlăm hơdôm mơta gơnam mơ̆ng hmua mơ̆ng tơring čar, amăng anun hơmâo kơphê.

Hai, bơni kơ ih lu hŏ!