Sa amăng hơdôm bruă mă phun amăng mông Jơnum ngui kơphê Buôn Ma Thuột tal 9, ngă pơhưč lu mơnuih pla kơphê amăng đơ đam dêh čar đing nao, anun lĕ Pơplông mơnuih mă bruă rơgơi thun 2025 hăng anăn ñu “Ngă đang kơphê hơdeč hmar”. Gum hrŏm hmâo 4 grŭp rai mơ̆ng tơring čar: Dak Lak, Kon Tum, Bình Phước, Sơn La. Anai lĕ hơdôm grŭp pơplông thâo hloh ruah mă hơdôm rơwang pơplông hlâo pioh ruah tơbiă hơdôm grŭp mơnuih pla kơphê thâo hloh gum hrŏm amăng mlăm pơplông rơwang tuč rơnuč. Hăng anăn ñu “Ngă đang kơphê hơdeč hmar”, hơdôm mơnuih pơplông găn rơgao 4 črăn pơplông: Mơnuih rơkâo lăi pơthâo, mơnuih ngă hmua hơdeč hmar, mơnuih ngă hmua pơlir hơbit hăng mơnuih ngă hmua lông lăng. Amai Hroda Ayun (djuai ania Êđê) – ding kơna grŭp Dak Lak lăi pơthâo: hluai tui tal pơplông, drơi pô ñu hmâo dong lu bôh thâo phrâo amăng ngă đang kơphê klă hiam.

 “Ngă đang kơphê hơdeč hmar amra ngă plai ƀiă djah ƀu klă hăng pơgang lŏn, ia hăng glai klô. Mơ̆ng bruă pơplông anai drơi pô kâo amra glăi lăi pơthâo glăi hăng neh wa hơdôm bôh thâo mơ̆ kâo hmâo hrăm pioh neh wa dưi bơwih brơi klă kơ đang kơphê pơkrem hăng ba glăi bôh tơhnal hloh pioh bruă bơwih ƀong neh wa pơđĭ kyar hăng plai ƀiă prăk mă yua kơ đang pla".

Jơnum pơplông Mơnuih ngă hmua rơgơi thun 2025 hăng anăn ñu “Ngă đang kơphê hơdeč hmar” dưi pơphun ƀơi Tơdrŏn lak 10/3, plơi prong Buôn Ma Thuột, tơring čar Dak Lak hmâo ngă pơhưč tơlơi đing nao mơ̆ng neh wa ngă hmua. Ơi Y Mơi Mlô (djuai ania Êđê) rai mơ̆ng să Čư̆ Nĕ, tơring glông Krông Ƀuk nao pah tơngan bruă pơplông brơi thâo, tơlơi hơdip mơda mơ̆ng neh wa mơ̆ng tơdơi kơ hrơi tlaih rơngai truh ră anai biă ñu kơnang kơ phun kơphê. Biă ñu mơ̆ng thun hlâo truh ră anai, nua kơphê đĭ lu anun tơlơi hơdip mơda đĭ kyar hloh. Tui hăng Y Mơi Mlô bruă pơphun pơplông “Mơnuih ngă hmua rơgơi” amăng mông jơnum ngui kơphê ăt djru mơn neh wa ngă kơphê klă hloh pioh sĭ kơ dêh čar tač rơngiao.

 “Tơlơi hơdip mơda mơnuih ƀôn sang pơđĭ kyar, yua kơ ră anai kơphê hmâo nua. Hmâo lu tơlơi pơplih, tơlơi hơdip mơda pơđĭ kyar, hmâo tơlơi gal blơi rơdêh đĭ ăt kơnang kơ kơphê hmâo nua mơn, mơnuih ƀôn sang mơ-ak biă. Rơgao kơ jơnum kơphê anai, pioh pioh djop mơnuih ƀơi rŏng lŏn tơnah thâo kơphê Buôn Ma Thuột klă hiam pioh sĭ hyu. Čang rơmang tơdơi anai kơphê hmâo nua lu hloh dong pioh mơnuih ƀôn sang hmâo tơlơi hơdip mơda klă hiam hloh”.

Amăng bruă Jơnum ngui pơplông mơnuih ngă hmua rơgơi thun 2025 hăng anăn ñu “Ngă đang kơphê hơdeč hmar”, mơnuih pơplông hmâo pơdah laih bôh thâo, tơlơi găn rơgao hăng thâo mă yua bôh thâo phrâo măi mok amăng bruă ngă đang kơphê hơdeč hmar juăt hăng pơplih ayuh hyiăng hăng hơdôm tơlơi bơdjơ̆ nao pơkra ñu, anih anom sĭ mơdrô, pơlir bruă pla pơkra, hmâo hră tŭ yap, pơjing hăng pơđĭ kyar glông jơlan pơlir hơbit amăng bruă pla pơkra kơphê Việt Nam. Jing ding kơna amăng grŭ Bình Phước, ơi Nguyễn Văn Nhân lăi lĕ pơplông jing anih ngui ngor tŭ yua kơ mơnuih ngă đang kơphê.

 “Ƀing gơmơi ư-ang lơm gum hrŏm ƀơi anai pioh lăi pơthâo hơdôm bôh thâo pioh mơnuih ngă đang hmua thâo hluh hơdră ngă pơhrui glăi lu gơnam hrŏm hăng anô̆ klă ñu. Yua kơ ƀơi anih sĭ mơdrô ră anai arăng kiăng anô̆ klă hiam ñu, ƀu kiăng lu ôh, tui anun amra čang rơmang dưi sĭ kơ dêh čar tač rơngiao lu hloh”.

Đing nao truh anăn “Ngă đang kơphê hơdeč hmar”, ơi Lê Đình Tư, Khua Blok đang Aeroco Coffee, plơi prong Buôn Ma Thuột, tơring čar Dak Lak brơi thâo: hơdôm thun jê̆ hăng anai, ƀơi tơring čar hmâo laih lu bruă pơlir hrŏm pioh pơjing anih anom kơphê klă hiam, hăng bôh than pơjing rai kơphê hiam, djơ̆ tui tơhnal pơkă sĭ kơ dêh čar arăng.

 “Ƀing gơmơi hmâo gum hrŏm jơlan hơdră pla pơkra kơphê klă hiam mơ̆ng tơring čar, truh ră anai kơphê ƀing gơmơi hmâo laih sa dua anih anom blơi tơnap tŭ yap. Ră anai ƀing gơmơi kiăng djru lăi pơhing kơphê klă hiam mơ̆ng Buôn Ma Thuột lăi ha jăn hăng Việt Nam lăi hrŏm. Anun lĕ sa amăng hơdôm bôh than phun pioh ƀing juăt bruă, mơnuih hna, mơnuih mơñum kơphê kiăng kơphê klă hiam dưi tŭ mă, mơ̆ng anun ƀing ta amra lăi pơhưč hơdôm kơphê klă hiam hloh mơ̆ng kơphê Việt Nam kơ dêh čar tač rơngiao”.

Amăng rơwang Jơnum ngui Kơphê Buôn Ma Thuột tal 9 ăt hmâo pơphun jơnum laih mơn bruă sĭ mơdrô jar kơmar hăng anăn ñu “Tô nao rai, pơđĭ anô̆ klă kơphê Việt”. Jơnum đing nao hơdôm bôh yôm kiăng kơjăp hloh kơ bruă pla pơkra kơphê, kah hăng: Tơlơi sĭ hyu kơphê pơ̆ dêh čar arăng, jơlan gah blơi yua kơphê; Kơčăo bruă pok pơhai hơdôm bruă mă djru djơ̆ tui hăng tơlơi pơkă EUDR hăng bruă pla pơkra kơphê Việt Nam; Hơdôm tơhnal pơkă, rơnoh pơkă pioh kơ kual pla kơphê... Hrŏm hăng anun, ƀing khua pơ ala ăt bơkơtuai mơn kơ bruă anom bơwih ƀong amăng bruă pơđĭ anô̆ klă kơphê Việt Nam hăng pơjing anăn kơphê Buôn Ma Thuột – anih nao kơphê rŏng lŏn tơnah; Tơlơi sĭ kơphê kơ dêh čar tač rơngiao, pơsit jơlan gah anih anom sĭ hăng anô̆ ngă gun blơi yua kơphê rŏng lŏn tơnah ră anai, pơsit jơlan gah anih anom sĭ kơ kơphê Việt Nam./.