Tơbâo apui ƀong ƀu djơ̆ kơnong ngă rơngiă kơ mơnuih ngă hmua đôč ôh mơ̆ bơbeč nao hơnong pơkă koh pơhrui, pơkra pơjing mơng hơdôm anom bơwih ƀong sĭ mơdrô. Ră anai hơdôm boh ƀon lan gum hrŏm hăng anom bơwih ƀong sĭ mơdrô hăng mơnuih ngă hmua glăk pok pơhai lu hơdră bruă kiăng pơhlôm hŭi apui ƀong, koh pơhrui tañ ƀiă kiăng mơnuih ƀon sang plai ƀiă huăč prăk kak.

Tui kông ti TNHH sa ding kơna Thành Thành Công Gia Lai, tơdơi kơ tết tui phiăn juăt, bruă apui ƀong tơbâo amăng kual pla pơjing glăk ngă tơnap tap, bơbeč nao kơ bruă koh pơhrui. Truh ră anai, ƀuh 30 wŏt apui ƀong tơbâo hăng đơ đam rơbêh 270 ektar, đĭ 5 wŏt pơhmu hăng bơyan hlâo anun. Ơi Trương Quang Trình, Kơ-iăng Khua kông ti brơi thâo, ƀơi anăp kơ bruă đang tơbâo apui ƀong, sang măi glăk pơphun koh tañ ƀiă, pơpha mơnuih mă bruă bơkơnar kiăng mơnuih pla plai ƀiă bơngŏt.