
Amăng đang hmua prong rơbêh 1 hektar mơ̆ng sang anŏ ơi Lê Văn Việt, să Ea Yông, tơring glông Krông Pač, tơring čar Dak Lak, hơdôm phun sầu riêng rơbêh 6 thun laih amăng bơyan hlăk blang bơnga hăng adai boh. Ơi Việt brơi thâo, adai ayuh hyiăng pơblih tui ƀu lê̆ anŏ hăng hơdôm hrơi hlăk akŏ thun adai rơ-ot sui hrơi, hơmâo tom hơjan bơyan phang sui ha wơ̆t anun ngă kơ bơnga ñu tơdu hĭ, mrô bơnga đôm boh ƀiă đôč pơkă hăng thun hlâo. Mah tui anun, ơi Việt ăt đăo kơnang kơ boh sầu riêng gơñu pơ anăp ăt hiam đôč, yua sang anŏ gơñu pla tui hơdră rơgoh hơdjă, phun kyâo boh troh đĭ hiam hăng hơđong:
“Hăng hơdră pla pơjing hơđong kơjăp hlăk ngătui ră anai, ƀu pruih ia jrao đĭ prong ôh, ƀu yua ia jrao kmơ̆k ôh, adai djơh hăng thun anai sit mơ̆n boh ƀu lu ôh samơ̆ boh sầu riêng hiam, jơman hloh pơkă hăng hơdră pla pơjing pơkŏn laih anun ñu amra ƀu ngă kơ boh ƀeh ƀoh ôh. Anun lĕ hơdră pla ngă tui hơđong, huăi bơbeč yua ôh mơ̆ng adai ayuh hyiăng pơblih sat”.

Hơdră ngă hmua đang pla boh sâù riêng ƀu ba yua ia jrao pruih lĕ anăp tui phrâo mơ̆ng lu sang anŏ pla boh sầu riêng ră anai ƀơi tơring glông Krông Pač; Čư̆ Mgar, Krông Năng....tơring čar Dak Lak ngă tui hơdôm thun giăm anai. Mơnuih ƀôn sang ngă hrŏm amăng bruă pla hăng sĭ mơdrô boh sầu riêng anun yơh hơmâo mông gêh găl bưp nao rai, hrăm tơdruă, hơdră pla pơjing boh sầu riêng hơđong kơjăp djơ̆ lăp. Ơi Lê Văn Thông, ding kơna grup ngă hrŏm ngă hmua pla pơjing rơgoh ƀơi Hòa Thắng, tơring čar Dak Lak lăi:
“Hrăm tui tơdruă boh thâo ia rơgơi mơ̆ng ƀing kỹ sư, gơñu pơtô glăi boh thâo ia rơgơi, tơlơi thâo thăi mơ̆ng mơnuih ngă hmua kual anai hăng kual pơkŏn. Dua lĕ, mơnuih ngă hmua thâo hluh ngă bruă khom čih pioh krăo lăng akŏ klôn, hrơi blan pruai kmơ̆k, dưm hơbâo rim hrơi”.

Ƀơi anăp kơ tơlơi pơtrun kơtang mơ̆ng anom bruă mă jia dêh čar Khač kơ tơhnal pơkă hơdjă rơgoh, tơring čar Dak Lak hơmâo sem glăi, djru gru mrô kơnăl anih pla pla, anih ngă hmua laih anun gru kơnăl sang bruă dưm amăng kodung hruh ba sĭ mơdrô ngă djop tơhnal pơkă rơgoh hơdjă hơmâo pơsit laih. Truh ră anai, đơ đam tơring čar hơmâo 68 gru kơnăl mrô pơkă anih pla hăng 23 boh sang dưm boh sầu riêng amăng kơdung, ngă hruh pioh ba sĭ mơdrô pơ dêh čar Khač. Ƀơi kual pla pơjing phun, bruă wai lăng gru kơnăl pơkă anih pla hăng anih pơjing gơnam sĭ mơdrô dưm amăng hruh kơdung khom ngă djơ̆ lăp, tơpă rơđah rơđong. Ơi Trần Quốc Vĩnh, Khua Jơnum min mơnuih ƀôn sang tơring glông Krông Pač, tơring glông pla lu boh sầu riêng tơring čar Dak Lak brơi thâo, tơring glông anai ngă brơi hră pơsit 37 gru kơnăl kual pla hăng 13 boh sang bruă dưm amăng kơdung ngă hruh hăng hlăk krăo lăng tong ten:
“Ƀing gơmơi kơtưn wai lăng gru kơnăl pơkă anih pla pơjing hrŏm hăng gru kơnăl anih dưm hruh amăng kơdung gơnam sĭ mơdrô kiăng hiư̆m pă pơhlôm djơ̆ tơlơi pơkă. Blung hlâo lĕ, djop sang bruă mơdrô amăng tơring glông ngă giong hră pơar pơtrun, boh nik ñu ĕp lăng hŭi hơmâođôm ia jrao dêh čar Khač kom ră anai anăn ñu Cadimi ƀudah ia jrao Vàng O”.

Tui hăng ơi Nguyễn Văn Hà, Kơ-iăng Khua Gơnong bruă đang hmua hăng pơgang ayuh hyiăng tơring čar Dak Lak lăi, thun anai, tơring čar pơkă tơhnal sĭ mơdrô prăk pơhrui glăi 1,8 klai USD, amăng anun boh sầu riêng asăt hăng boh dưm ngă pơrơ-ot yơh jing gơnam sĭ mơdrô yom pơphăn. Khă tui anun, hơdôm tơlơi hlăk hơmâo amăng anih sĭ mơdrô mơ̆ng akŏ thun, pơƀuh brơi kah hăng bruă ngă hmua sa tơlơi lông lăng phrâo, kiăng pơđĭ anŏ hiam hơdjă pơgang anih anom sĭ mơdrô.
“Sa lĕ gah bruă pla pơjing, pơtong rơđah anih pla či hơƀơi hăng pla pơjing rơgoh mơ̆n hă, dua lĕ bruă pơkra ming gơnam sĭ mơdrô, jing mơnong ƀong khom thâo rơđah phun tơdŭ mơ̆ng pơpă, tuh pơ alin ba yua boh thâo ia rơgơi măimok ăt kah hăng wai lăng anŏ blơi pơmut, gơnam ba sĭ. Biă mă ñu blơi mơ̆ng đang hmua, djă pioh, răk lui, pơkra ming glăi hlâo kơ ba sĭ, hơmâo ngă djơ̆ tơhnal pơkă hơdjă rơgoh, rơnuk rơnua mơ̆n hă, khom akŏ pơjing anih brơi kơ sang bruă mơdrô hơmâo anŏ gêh găl man pơdong sang răk lui gơnam ngă hơjai djă pioh, pơrơ-ot lăp djơ̆ tui tơhnal pơkă mơ̆ng hơdôm dêh čar kiăng blơi pơmut”.
Mah anom bruă boh sầu riêng ƀơi Dak Lak hơmâo pơtong rơđah laih kơ hơnơ̆ng pla hăng anŏ tŭ yua hiam, samơ̆ kiăng ngă djơ̆ anŏ pơkă mơ̆ng jar kmar lĕ khom ngă tui tong ten, ăt kiăng lu tơlơi gir, tơlơi run hloh kah dưi ngă giong. Bruă prăp lui pla pơjing tui hơnơ̆ng hơdjă rơgoh sa tơlơi gir run blung a mơ̆ng tơring čar, jing atur pioh kơ boh sầu riêng Dak Lak dưi hrưn đĭ nao pơ anăp adih truh pơ anih anom sĭ mơdrô gêh găl hloh.
Viết bình luận