Mơ̆ng akŏ thun truh ră anai, ƀơi Dak Lak hơmâo čih pioh 3 bit anih hơmâo klin pơtah čroh ƀơi un, bui kual ơi jŭ ƀă  ƀơi tơring glông Čư̆ Mgar hăng plơi prong Ƀuôn Ma Thuôt, ngă kơ 56 drơi bui djai hăng khom ba čuh pơrai dor lui soh sel. Hrŏm hăng anun, 7 bit anih hơmâo klin hlăk ƀă ƀơi 4 boh tơring glông hăng plơi prong Ƀuôn Ma Thuôt. Anom bruă sem lăng klin kheng amăng hlô mơnong rông tơring čar Dak Lak ăt pơhŭi hlâo 2 čô mơnuih djai yua đing kman djơ̆ tuai asâo yang ngă kĕ.

Ƀơi anăp kơ tơlơi pơhing klin kheng ngă, Jơnum min mơnuih ƀôn sang tơring čar Dak Lak pơtrun hiăp brơi djop tơring glông, gơnong bruă, anom bruă tañ pok pơhai djop hơdră pơhlôm, pơgang klin amăng hlô mơnong rông, un mơnŭ.

Bruă ngă phun pơsir hĭ anih hơmâo klin, anăm lui hơđuh rai kơtang hăng lar hyu prong phrâo dơ̆ng; hmao kru čuh pơrai hĭ hlô mơnong djơ̆ klin, djru ba mơnuih ƀôn sang čem rông hlô mơnong răm ƀăm yua klin ngă; pơsir khut khăt ngă kơđi hlơi pô ba hyu sĭ mơdrô añăm mơnong djơ̆ klin, pơdŭ pơgiăng hyu tă tăn; laih dơ̆ng pơtrut kơtang tơlơi pơtô pơblang brơi tlâ̆o ia jrao vaccine pơgang klin kơ hlô mơnong rông, gir run kiăng dưi ngă djop boh ƀiă ñu 80%  mrô pŭ hlô mơnong hlăk dŏ rông.