Rim mơguah, neh met wa hơdôm boh plơi Vơng Chép, Keo, Tung Ke gah să Ayun, tơring glông Čư̆ Sê nao kiă rơmô. Tlam mơmot, gơñu puh glăi rơmô amăng war, gum wai lăng hrŏm. Tui hăng ayong Đinh Suyn - Khua grup rông rơmô plơi Keo, să Ayun, ană plơi hlâo adih ăt hơmâo djru laih bruă rông rơmô tuh ană, samơ̆ djru ba rim boh sang anŏ rông mă hơjăn. 2 thun anai kah neh met wa hơmâo djru rông rơmô hrŏm. Đinh Suyn brơi thâo hơdră djru hăng bruă rông rơmô phrâo tui anai ngă gêh gal kiăng neh met wa hrăm nao rai tơdruă, hơmâo tơlơi hok mơ-ak wơ̆t hăng hơdră bơwih ƀong pơ anăp:“Mơ̆ng hrơi Kơnuk kơna djru brơi rơmô, pô kâo ăt pơhưč či ngă pơdrong mơn, glăi pơ sang yuă rok čem rơmô. Yua rơmô ania glăk mơkian, pơgi kơdih anai ñu tuh mơn, anun kâo hơmâo pran biă. Rơmô tuh lĕ ta rông, tơdơi anai tơdah ñu tuh lu lĕ ta sĭ, či blơi kmơk, ia jrao, anah phun pla”.

Hăng ayong Kpuih Đe - Khua grup rông rơmô tuh ană, plơi H’Vawk, să Ayun ăt hnun mơn. Ñu brơi thâo, năng blung phrâo ngă ñu bơngơ̆t mơn, bơ hơne ană plơi ñu lăng djơ̆ pran biă mă:“Amăng pran jua kâo mơ-ak biă, hlâo adih amĭ ama ƀu hơmâo hơget či brơi tui, truh ră anai Kơnuk kơna djru ba kâo rơmô, jing hơne rơmô tuh laih, ta khŏm gir rông kiăng klă hloh. Yuă pơdai giong lĕ ta mă hơdrăng pioh čem amăng bơyan không phang, pơtô brơi neh met wa ñu mă abih hơdrăng, ƀu hơmâo čuh hĭ tui đưm dong tah”.

Să Ayun hơmâo rơbêh 95% mrô mơnuih djuai ania ƀiă, tơlơi hơdip bơwih ƀong huă dŏ tơnap biă mă, yua lŏn tơnah krô, ƀu hiam, adai hai ƀu lăp mơn, hơbô̆ bruă rông rơmô anai ba glăi tơlơi pơplih phrâo. Amăng dua thun rơgao, jơlan hơdră hơmâo djru ba 65 boh sang anŏ rin hăng rin ƀơƀiă amăng mrô 327 boh sang anŏ tơnap ƀơi să Ayun. Truh ră anai, hơdôm drơi rơmô hơmâo rông mơ̆ng thun 2023 tuh ană laih, hơmâo prăk pơhrui phrâo, pơtrut pran jua kơ neh met wa.

Ơi Phạm Ngọc Tuấn - Kơ-iăng khua Jơnum min mơnuih ƀôn sang să Ayun, tơring glông Čư̆ Sê, Gia Lai pơsit: Kơčăo bruă anai ƀu pơdơi ƀơi bruă djru bơwih ƀong đôč ôh mơ̆ ăt pơtrut pran jua hrưn ngă pơdrong, pơklaih ƀun rin, pơđĭ tui tơlơi pơmin pran jua ngă bruă mơ̆ng ană plơi. Hơdôm pŭ rơmô prong hiam, hơdôm tơlơi hok mơ-ak mơ̆ng ană rơmô tuh blung a jing pơsit jơlan hơdră anai lăp djơ̆.“Rơgao kơ 2 thun ngă tui kơčăo bruă mrô 3 djru rông rơmô, jing ƀơƀrư̆ tŭ yua laih. Ta rông pơƀut hơdôm boh sang jing tơlơi pơmin mơ̆ng ană plơi ñu pơplih tui mơn, gir rông hăng krăp lăng nao rai, mơ̆ng anun klă hloh kơ hơdôm thun hlâo adih rông mă hơjăn, bruă rông ƀu pơhlôm klă, anun yơh rơmô ƀu hrôh. Mơ̆ng 2 thun ngă tui jơlan hơdră anai hơmâo djru neh met wa blung a lĕ thâo pơmin rông rơmô kiăng pơklaih hĭ rin rơpa”.

Djru rông rơmô tuh ană kiăng neh met wa djuai ƀiă pơđĭ tui bruă rông hlô, pơđĭ tui prăk pơhrui, jing hơbô̆ bruă hơmâo ngă lu thun laih pơ tơring čar Gia Lai laih anun pơsit tŭ yua. Rơngiao kơ rơmô hơmâo blơi mơ̆ng prăk dêh čar pioh djru, lu anom bruă, khul grup amăng tơring ăt ƀơk brơi rơmô ania, kiăng bruă hrŏ trun ƀun rin amuñ ƀiă. Hơdôm tơlơi pơplih phrâo kơ hơdră ngă bruă hăng tơlơi truh kih mơ̆ng să Ayun, tơring glông Čư̆ Sê hơmâo ngă, brơi ƀuh hơbô̆ bruă anai mơ̆ng Gia Lai glăk hơmâo ngă giong. Hơdôm pŭ rơmô prong hiam, hơdôm drơi rơmô phrâo tuh, ƀu kơnong ba glăi prăk kăk đôč ôh mơ̆ ăt pơhưč pran jua hrưn đĭ ngă pơdrong mơ̆ng rim boh sang anŏ. Anai jing phun atur yôm biă kiăng djŏp gưl gong gai tơring čar Gia Lai pok prong tui hơbô̆ bruă, djru bruă hrŏ trun ƀun rin tañ hloh/.