Anih klin ngă hmâo ƀơi 2 bôh sang anô̆ mơnuih ƀôn sang ƀơi thôn 11 hăng thôn 5 să Ea Kly. Amăng anun, anih klin ngă blung a dưi čih djă pioh amăng lơ 29/10 ƀơi sang anô̆ ơi Nguyễn Nhu Lực, ƀơi thôn 11 hăng mrô mơnŭ bip djơ̆ klin giăm truh 800 drơi.

Anih klin ngă tal 2 dưi ĕp ƀuh lơ 5/11, ƀơi sang anô̆ ơi Ngô Đức Tình ƀơi thôn 5, hăng 750 drơi mơnŭ bip djơ̆ klin, amăng anun hmâo 500 drơi bip hăng 250 drơi mơnŭ. Tơdơi kơ mhư̆ hing mơtăm, ƀing mă bruă ia jrao gah hlô mơnong mă drah pơčrang lăng, bôh tơhnal pơčrang lăng lĕ djơ̆ kơman klin drăp A/H5N1. Anom wai lăng bruă rông hlô hăng ia jrao hlô mơnong hmâo gum hrom hăng gong gai plơi pla pơphun čuh prai abih bang mơnŭ bip djơ̆ klin; pruih pruai jrao pơdjai kơman ƀơi anih anom rông, jum dar amăng luh čuh prai hăng kual jum dar. Anom wai lăng bruă rông hlô hăng ia jrao hlô mơnong tơring čar Daklak hmâo pha brơi laih 36 lit jrao pơdjai kơman pioh pok pơhai bruă pơdjai kơman; gum hrom hăng Anom wai lăng duam ruă tơring čar Daklak pơphun pel ĕp, lăng tui drăp mơnŭ bip ƀơi ană mơnuih ƀơi să Ea Kly./.