Thun blan rơgao, lu tơring čar plơi pla hơmâo djru pơtô pơblang, pôr pơthâo pơkra ming gơnam sĭ mơdrô phara hơjăn laih dơ̆ng kơtưn djru kơ pô sang bruă, pô sang anŏ pơkra ming gơnam sĭ mơdrô ngă hrom ĕp anih anom sĭ mơdrô pơ siêu thị, anih ba hyu sĭ mơdrô amăng tơring čar hăng gah rơngiao kơ tơring čar.

Hlâo adih, gơnam pơkra ming anăn Nem mơnong un mán Bến Én, tơring glông Như Thanh, tơring čar Thanh Hoá lu biă mă yua anom bruă sĭ mơdrô mơnong ƀong huă amăng tơring glông blơi, sĭ glăi kơ tuai ƀong huă. Dơ̆ng mơ̆ng hrơi pơsit tŭ yap sit nik hơmâo anăn sĭ mơdrô phara hơjăn, boh tŭ yua mơ̆ng Nem mơnong un mán Bến Én dưi hơmâo lu anih anom sĭ mơdrô blơi yua, rơkâo blơi. Kiăng pơkra ming mơnong ƀong anai, mơnuih ƀôn sang ruah mă añăm mơnong un, bui mán, kah hăng bui Jrai ta rông amăng plơi pla, djuai un jŭ, mơnong jơman, ƀâo bơngưi, sa mơnong ƀong jơman kual čư̆ siăng. Mơnong un anai, pơkra nem arăng mă mơnong bra, sĭ tă rơpih.

Tơlơi anai, djru kơ mơnuih ƀôn sang djuai ƀiă rông un, bui lu sĭ mơdrô hơmâo prăk lu hloh hăng pơđĭ kyar tui. Pŭ un, bui mán anai rơbêh 100 drơi, sang anŏ Nguyễn Thị Quy, să Phượng Nghi mơ̆ng sa boh sang anŏ ƀun rin ră anai, hơmâo pơhrui glăi truh 200 klăk prăk sa thun. Yă Nguyễn Thị Quy brơi thâo:

“Rĭm thun ăt hơmâo mơ̆n anih blơi, ta ba sĭ arăng blơi soh anun ta rông lu tui”.

Tong krah hơmâo lu gơnam sĭ mơdrô phara djă anăn OCOP arăng ba sĭ mơdrô, mơnuih pơkra ming, djop sang bruă sĭ mơdrô ƀu hơmâo hơdră hơgĕt dơ̆ng tah khom gir run pơblih hơdră pơkra ming kiăng dưi pơhno hăng gơnam pơkŏn . Ngă hnun kah dưi kjăp, hơmâo anih ba sĭ mơdrô gơnam pơkra ming ƀơi kual plơi pla djuai ƀiă ngă pô. Pơtum pơblih anăn, hơbô̆ pơkra ming, djru kơ sang sĭ mơdrô, anom bruă pơkra ming gơnam sĭ mơdrô ƀơi kual čư̆ siăng jai hrơi pok prong anih anom sĭ mơdrô rĭm thun. Yă Phạm Hồng Hà, Anom ngă ƀong hrom ngă hmua pla pơjing Nậm Lửu, tơring glông Trạm Tấu, tơring čar Yên Bái brơi thâo:

“Hlâo adih gơmơi pla pơjing rĭm thun ƀiă đôč, tui hluai tơlơi gêh găl phara ba ngă samơ̆ ră anai, gơmơi pơkra ming gơnam OCOP hơmâo pơhrui glăi truh 200%. Rơnoh prăk pơhrui glăi sĭ mơdrô ră anai kơ hơdôm kông ty ƀudah sang sĭ mơdrô mơnong ƀong huă pơ Hà Nội, gơñu hor biă mă blơi gơnam mơ̆ng kual čư̆ siăng gơmơi. Yua gơnam gơmơi pla pơjing rơgoh hơdjă huăi pruih lu ia jrao pơdjai hlăt ôh”.

Ƀơi tơring čar Lâm Đồng, mơnuih ƀôn sang djuai ƀiă ăt hlăk pơđĭ kyar lu mơta gơnam pơkra ming phara, ba sĭ mơdrô truh gah rơngiao kơ tơring čar. Đơn Dương lĕ, sa amăng 2 boh tơring glông hơmâo đang pla añăm pơtam prong hloh ƀơi tơring čar Lâm Đồng. Yua kơ ba yua boh thâo ia rơgơi, lu gơnam pơkra ming mơ̆ng đang hmua tơring glông jing gơnam rơgoh hơdjă, djơ̆ tơhnal pơkă VietGap ăt kah hăng ƀlir tem anăn sĭ mơdrô gơnam Đà Lạt rơgoh hơdjă mơ̆ng kual lŏn rơgoh. Mah kiăng ngă djơ̆ tơhnal pơkă khut khăt mơ̆ng ƀing blơi yua, samơ̆ anai lĕ kah hăng hră pơsit brơi kơnuih hăng boh tŭ yua hiam mơ̆ng gơnam pơkra ming.

Anăp ngă bruă anai pioh pơtrut mơnuih ngă hmua ăt pơđĭ kyar bruă pla pơjing prong hloh hăng hơđong kjăp sui thun. Ơi Nguyễn Đình Tịnh, Kơ-iăng khua jơnum min mơnuih ƀôn sang tơring glông Đơn Dương, Lâm Đồng brơi thâo:

“Mơ̆ng thun 2019 truh ră anai, mrô rơnoh prăk kơnuk kơna tuh pơ alin 17 klai, mơnuih ƀôn sang mă yua rơbêh 20 klai, ngă tui lu hơbô̆ bruă pla pơjing hăng hơdră rơgơi kơhnâo; pruih ia ƀlĕ mă hơjăn, wai lăng pruai kmơ̆k  dưm hơbâo djơ̆ ba yua măi mok rơnuk phrâo 4.0. Hăng tơring glông Đơn Dương, ră anai, dưi hơmâo anăn sĭ mơdrô mơ̆ng Lâm Đồng čih anăn gơnam Đà Lạt rơgoh hơdjă yua mơ̆ng lŏn hiam klă, hơmâo kĭ pơkôl, pôr pơthâo hăng  lu anih anom sĭ mơdrô mơ̆ng Đơn Dương nao pơ lu tơring čar ieo gah”.

Ƀu pơdơi dơ̆ anun ôh, ba yua boh thâo ia rơgơi amăng bruă pơkra ming, pơjing rai gơnam sĭ mơdrô, hơdôm mơta gơnam mơ̆ng plơi pla mơnuih djuai ƀiă jing gơnam sĭ mơdrô hiam klă, rơgoh hơdjă amăng dêh čar. Tui hăng ƀing mơnuih rơgơi kơhnâo, kiăng đĭ nao pơ anăp, djop mơta gơnam sĭ mơdrô mơ̆ng mơnuih ƀôn sang djuai ƀiă khom djơ̆ hăng tơhnal pơkă mơtah mơda, jing rơnoh hơdjă sit nik mơ̆ng kual čư̆ siăng. Anai lĕ, bruă ngă kiăng lăp pran jua anih anom sĭ mơdrô pơkă.

Yua kơ anun, khom čih anăn gơnam sĭ mơdrô hăng gơnam gru grua hiam, ƀu kơnong kơ pôr pơhing đôč ôh,khom mơ̆ng bruă mă pơgang tong ten, mơnuih djuai ƀiă ngă hrom pla pơjing truh pơ tơlơi git gai wai lăng sa hnong khom lăng nao hơdră pơđĭ kyar hơđong kjăp hlom bom. Laih dơ̆ng, kiăng ba gơnam sĭ mơdrô pơ kual čư̆ siăng truh pơ mơnuih blơi yua kiăng ngă tui boh thâo ia rơgơi mrô, pôr pơthâo anăn gơnam sĭ mơdrô găn rơgao truh pơ jơlan guai dêh čar.