Hơdôm hrơi anai, ƀơi lu blah hmua pơdai ƀơi să Tuy An Đông, să Hòa Thịnh, phường Phú Yên, nam ia dăo phrâo rơgao ăt dŏ đôč: lŏn dlut hlŭ, asuk ruk dŏ đom tơket tơkeng ƀơi bơnư̆, amăng bưng pơđoh ia, lu glông pơđoh ia pơčah, tơhlŏm, răm rai. Bơngơ̆t kơtang hloh lĕ amăng bưng pơđoh ia ăt aka ƀu dưi pok glăi ôh, mah truh hrơi rah pơtĕm sai pơdai laih, jing kaih hĭ hrơi juăt ngă pơdai. Yă Trần Thị Rạn, mơnuih ƀôn sang phường Phú Yên brơi thâo, tui hăng hrơi juăt rah pơtĕm, bruă rah pơdai kaih hloh kơ hơdôm thun hlâo, samơ̆ yua ia dăo kor pơđuăi, pơđung abih ƀudah ngă răm rai abih gơnam tam mơ̆ng ană plơi, anun jing ƀu thâo ngă hiư̆m pă či ngă pơdai bơyan anai:“Thun anai yua ia dăo anun jing či ngă pơdai hai ƀu hơmâo pơjeh či ngă lơi, dăo abih bang, braih hai ia dăo mơn, hơget mơ̆ng hơmâo dong. Hơne tơguan Kơnuk kơna djru brơi pơjeh brơi gơmơi rah pơtĕm đôč yơh”.

Ƀu kơnong kơƀah pơjeh pơdai đôč ôh, lu anih ngă pơdai pơ Tuy Hòa, hmua kơƀah ia dong tơdơi kơ hrơi ia dăo. Ơi Nguyễn Văn Khoa, thôn 4, să Tuy An Đông brơi thâo, bơnư̆ Tam Giang - anih pơđoh ia amăng kual či ngă hmua - pơčah hĭ, anun yơh bruă ngă hmua ƀu thâo dong tah:“Bruă ngă hmua ră anai dŏ kơđông yua bơnư̆ Tam Giang pơčah hĭ, neh met wa ƀu thâo ngă pơdai ôh yua ƀu hơmâo ia. Amăng să hơmâo truh 1.000ha dŏ tơguan ia; amăng bưng, hnoh ia thu abih, ƀu hơmâo ia ôh. Mơnuih ƀôn sang čang rơmang tañ pơkra giong, đah mơ̆ng pơđoh ia či ngă hmua. Tơdah ƀu hơmâo pơkra tañ lĕ ƀu thâo ngă hmua ôh”.

Kơthel tal 13 wơ̆t hăng ia dăo prong rơnuč blan 11 ngă răm rai kơtang biă bơnư̆, dơnao kŏng ia mơ̆ng kual Ngŏ tơring Dak Lăk. Tui hăng ơi Nguyễn Văn Chiến, Kơ-iăng khua kông ti TNHH sa ding kơna Thủy Nông Đồng Cam, abih bang bơnư̆ ia Đồng Cam hăng Tâm Giang leng kơ bơbeč djơ̆ năng ai 19.000ha pơdai mơ̆ng kual Ngŏ tơring čar. Ƀơi anăp tơlơi anun, Kông ti iâu pơthưr mơnuih mă bruă, ngă hrŏm hăng anom bruă tañ pơkra glăi hơdôm anih răm rai:“Truh mông anai, abih bang măi mok răm rai, kiăng pơkra glăi abih mơtăm. Kông ti ăt kah hăng Khul wai lăng tuh pơ alin gah Ngŏ mơ̆ng tơring čar iâu mơnuih mă bruă, hơdôm anom bruă tuh pơ alin pơkra brơi bơnư̆, dơnao ia răm rai yua kông ti wai lăng, tañ ngă giong, pơhlom brơi ia či ngă hmua hlâo lơ 31 blan 12”.

Gong gai hơdôm boh tơring ƀơi Dak Lăk ăt glăk gir kiăo hmao bơyan ngă pơdai mơn. Lơ̆m hơdôm boh să glăk hrŏm hăng neh met wa jŭ yap anŏ răm rai, kih rơmet hơdôm anih lŏn tơhroh, tơhlŏm trun, dor klŏm, jing hơdôm anom bruă gah măi mok ia rơgơi phrâo mơ̆ng Gơnong bruă hmua - ayuh hyiăng glăk pơƀut pơkra glăi bơnư̆ kŏng ia răm rai. Bơ pơjeh pơdai, yă Đặng Thị Thủy, Kơ-iăng khua Gơnong bruă hmua hăng Ayuh hyiăng tơring čar Dak Lăk brơi thâo:“Pơjeh pơdai či rah pơtĕm amăng bơyan Puih phang ră anai hơmâo mă mơ̆ng pơjeh pơđom lui mơ̆ng dêh čar ta, mơ̆ng tơlơi djru mơ̆ng Kơnuk kơna hăng mơ̆ng hơdôm anom mơdrô, ƀing thâo pap juăt djru mơnuih tơnap. Yua hnun, mơnuih ƀôn sang hơđong bĕ hŏ, anăm bơngơ̆t ƀu hơmâo pơjeh či ngă pơdai ôh”.

Ta ƀuh laih mơn, tơdơi kơ ia dăo, tơlơi tơnap prong hloh mơ̆ng kual ngă pơdai Tuy Hòa, tơring čar Dak Lăk ƀu kơnong răm rai ƀơi hmua đôč ôh, anun lĕ tơlơi kơnang kơ dơnao ia hăng pơjeh pơdai dong. Tơlơi mơ̆ mơnuih ƀôn sang čang rơmang hloh lơ̆m anai lĕ ia tañ hơmâo, hmao rah pơtĕm, kiăng kual ngă pơdai Tuy Hòa, Dak Lăk mơtah glăi tơdơi kơ hrơi blan adai ƀu lăp./.