Amăng tal hơjan hlim rơnuč bơyan hăng adai ayuh hyiăng mơsah na nao, 2 boh sang ƀhu kơphê hnơ̆ng ƀhu 40 tơn sa wơ̆t tuh nao pơhang mơ̆ng pô sang blơi kơphê Hạnh Phúc ƀơi să Ea Knuêč, tơring čar Dak Lak mă bruă đut tơhnal. Ayuh hyuh đĭ ia ngôm, asăp dơluh đĭ pơ ngŏ adai rơngit, wơ̆t hơjan hlim samơ̆ sang bruă ăt mă bruă na nao đôč. Ơi Châu Phúc, pô sang bruă brơi thâo, ñu tuh pơ alin 300 klăk prăk pơdong sang, dưm truă măi mok ƀhu pơhang kơphê anai mơ̆ng thun 2021, laih anun mă bruă hơmâo ba glăi boh tŭ yua:

“Măi mok ia rơgơi phrâo ƀhu anai huăi dơluh đĭ asăp ƀui đơi ôh, amruih hăng jua mơñi ăt ƀu kơtang lơi, anun huăi bơbeč truh kơ mơnuih ƀôn sang jum dar yua kơ ayuh ia pơpor đĭ pơngŏ adih. Măi phrâo anai, mă bruă dua anăp, sa anăp mơ̆ng yŭ đĭ pơngŏ, sa anăp mơ̆ng ngŏ pơtrun pơyŭ, jing pơđĭ nao pơ ngŏ hăng pơtrun glăi pơyŭ anun yơh kơphê thu krô bơkơnar, ƀu tơguan ta kor nao rai ƀudah čuar ôh kah hăng hlâo juăt ngă. Hơdră mă bruă pơkĕ hăng apui lơtrik, čuh  apui ƀong kam ngă hlor pơ-iă amăng lăm kơhul kơtang, giong anun moter  pưh angin kơtang, ngă bơkơnar anŏ hlor hăng thun amăng lăm čơgăn ƀhu kơphê, anun kơphê thun bơkơnar soh”.

Ơi Huỳnh Đình Cường, mơnuih pla kơphê ƀơi plơi Tân Thành, să Ea Knueč brơi thâo, sang anŏ gơñu hơmâo 1 ha đang kơphê, rim thun pơhrui glăi 15 tơn kơphê asăt. Hlâo adih kơphê ƀhu lui ƀơi lan  tơdron anăp sang đôč. Samơ̆ 4 thun hăng anai, kơphê pĕ giong hơdôm hơpă ñu pơgiăng nao pơ sang ƀhu arăng pơhang brơi. Rơnoh prăk sa tơn 700.000 prăk kơphê asăt samơ̆ gêh găl hloh kơ bruă ƀhu lui ƀơi tơdron lan sang amăng krah adai hơjan hlim, rơnoh kơphê jŭ asar, čăo pơmao, sang sĭ mơdrô blơi pơhlưh hĭ lĕ ƀiă đôč:

“Hơdôm thun hăng anai ba nao apah arăng ƀhu pơhang brơi, kâo ƀuh asar kơphê hiam ăt lom tui mơ̆n, huăi sat hloh kơ  hơdră juăt ƀhu tui tơđar ôh. Tơdah ta ƀhu amăng lan sang, tơdron lan sang lĕ khom hơmâo adai pơ-iă kơtang kah klă, tơdah adai hơjan lĕ lui soh. Lơ̆m anun, ƀhu pơhang amăng sang măi gêh găl biă mă, mah adai hơjan lu sui hrơi tŭ mơ̆n kơphê ta thu krô bơkơnar soh, huăi brŭ, čăo pơmao sat hĭ ôh”.

Tui hăng ơi Nguyễn Tiến Dũng, Kơ-iăng khua phun kông ty sa ding kơna sĭ mơdrô lơ 2/9 Dak Lak, sang bruă gơñu ngă hrŏm hăng 80.000 boh sang anŏ mơnuih ƀôn sang pla kơphê amăng kual, bruă pơblih anih ƀhu kơphê, pơjing anih ƀhu pơhang hăng măi lĕ gêh găl biă mă, asar kơphê lom hiam bơkơnar djơ̆ hnơ̆ng sĭ mơdrô hăng tač rơngiao. Ơi Dũng brơi thâo, tơdah bruă tuh pơ alin man pơdong sang čơƀhu kơphê pơhang kơphê dưi pơphun sa hnơ̆ng hăng bruă man pơdong anih mă bruă pla pơjing laih anun hơmâo hơdră djru kơ tơlơi anai djơ̆ găl hloh,  sit mơ̆n amra pơđĭ tui boh tŭ yua lu hloh: 

“Ƀing ta khom man pơdong anih pioh ƀhu pơhang kơphê sa anih, laih anun pơkra hơdră pơphun brơi mă bruă djơ̆ găl hăng mơnuih ƀôn sang sa bruă kiăng biă mă. Pơ anai, mơnuih ƀôn sang dưi sĭ mơdrô ƀudah kĭ mơ-it hlâo pơblih nao rai gơnam  yua mă bruă. Mơ̆ng anun, pơjing rai asar kơphê  ƀhu krô bơkơnar soh, lom hăng hiam hloh, djơ̆ hnơ̆ng pơkă ba sĭ mơdrô yua jai hrơi arăng pơkă anŏ hiam khut khăt hloh”.

Yă Đặng Thị Thủy, Kơ-iăng Khua Gơnong bruă đang hmua hăng pơgang ayuh hyiăng tơring čar Dak Lak brơi thâo, bơyan pĕ kơphê htun anai  djơ̆ amăng hrơi bơyan hơjan hlim, kơthel, ia ling dăo samơ̆  lu anih pla kơphê amăng tơring čar, ăt tơguan pĕ kơphê tơsă truh abih 85%. Hơdôm sang ƀhu pơhang kơphê ƀơi plơi pla hơmâo gum hrŏm amăng bruă pơhlom anŏ hiam kơphê, kiăng huăi brŭ hiă răm ƀăm hĭ soh sel tơdơi kơ pĕ pơhrui. Anom bruă ngă hmua hlăk hur har djru mơnuih ƀôn sang man pơdong anih ƀhu pơgang kơphê pơƀut sa anih, ba yua măi mok phrâo pơdong ƀơi kual pla kơphê lu hloh.

“Ƀing gơmơi hlăk pok pơhai lu jơlan hơdră tui hăng Hră pơtrun 98 kiăng djru mơnuih ƀôn sang, sang bruă mơdrô hăng sang bruă ngă hrŏm tuh pơ alin bơwih brơi kơ bruă lir hơbit blơi măi ƀhu pơhang kơphê brơi kơ mơnuih ngă hmua pla kơphê. Ră anai, lu  măi mok phrâo ƀhu pơhang kơphê hơmâo ba yua lu anih, djru pơhlom brơi asar kơphê lom asar, hiam klă hloh bơkơnar, tŭ yua, djơ̆ anŏ či kiăng mơ̆ng anom sĭ mơdrô hăng tač rơngiao”.

Mah rơnoh prăk tuh pơ alin blung a lu biă mă, samơ̆ anih ƀhu kơphê pơhang hăng măi ia rơgơi phrâo hơmâo mă bruă ba glăi boh tŭ yua biă mă, boh nik ñu amăng bơyan adai hơjan hlim, ayuh hyiăng ƀu gêh găl kah hăng ră anai. Anai yơh anŏ pơtrut pran jua kơtang, kiăng lu sang anŏ mơnuih ƀôn sang ngă hmua, sang bruă mơdrô ăt tuh pơ alin man pơdong. Mơ̆ng anun anom bruă kơphê amra plai ƀiă huač, rơngiă prăk kăk soh sel yua asar kơphê ƀu hiam, đah mơ̆ng  ƀhu pơhang kơphê asar lom sĭ mơdrô djơ̆ rơnoh, djă anăn kơphê hmư̆ hing hăng hơđong kơjăp.