Thun 2022, ayong Nguyễn Thanh Đức pơ să Sông Lũy, tơring čar Lâm Đồng, pơphun hơbô̆ bruă rông klêr hrŏm hăng rông wăt. Ñu lăi: bruă anai amuñ yua hơmâo lŏn tơnah mơ̆ng sang anŏ, hơmâo arăng kiăng blơi , djru pơplih phun pla hlô rông ba glăi boh tŭ yua hloh...

Bơwih ƀong hăng bruă rông klêr, blung a ayong Đức aka ƀu thâo đơi ôh djuai anai arăng čem rông hiư̆m pă anun jing tơnap biă mơn. Samơ̆ lăng anih mơdrô kiăng blơi lu biă, anun jing ñu gir pơkra anih, blơi măi mok, rông lăng hăng pơkra klêr ngă djuai či rông, ba sĭ pơ anih sĭ mơdrô lu tui.

Ayong Đức brơi thâo, prăk pơkra rim anih rông klêr (2m karê/sa drông), năng ai 300.000 prăk (hơmâo không pơsơi, ƀaih kơsu či pơkra drông hăng prăk blơi boh klêr). Sa drông klêr tơdơi kơ 35 hrơi rông ta dưi ba sĭ yơh. Gơnam čem klêr kơnar hăng gơnam čem wăt mơn, ta brơi klêr ñu ƀong thim añăm puăn, hla hơbơi čên, tơdŭ hơbơi plum, rok...rim hrơi čem klêr dua wơ̆t (mơguah hăng tlam). Klêr ta rông tui anai ñu hơdjă, huăi djai đơi ôh. Kiăng klêr ñu tañ prong, drông klêr kiăng thu, hơdjă, agaih, hŭi pơsah lĕ ta mă hla pơtơi krô ƀudah griang hơbun arăng dưi boh mơnŭ...Ayong Nguyễn Thanh Đức lăi: “Tơdơi kơ klin covid-19 kâo glăi hlao mơtăm, ƀu nao pơ Sài Gòn dong tah, hơmâo lui drông war rông klêr hơđăp baih pơ sang, kâo pok prong thim či rông wăt, mă eh wăt či pla añăm, giong anun mă añăm či čem klêr hăng čem wăt hlao”.

Lơ̆m hơbô̆ bruă rông klêr anai tŭ yua, ayong Đức pơkra thim drông war či rông wăt dong. Ayong Đức lăi, rông wăt ta khŏm pơkra war ñu hơdjă agaih, rơhaih, huăi djrưh, hnun kah mơ̆ng huăi djai. Brơi wăt ƀong trơi, ƀong djơ̆ mông hnun kah mơ̆ng dưi, tơdah brơi ƀong tă tăn lĕ ñu mơboh ƀu kơnar ôh. Mơ̆ng hrơi phrâo čeh truh kơ rông ñu mơboh năng ai 50 hrơi, hrơi mơboh năng ai 7-8 blan ta rông hnưr phrâo dong yơh.

Ƀu hơmâo mă hlok arăng pơkra dong tah, ñu mă klêr hăng añăm pơtăm ñu pla či čem wăt. Wăt ñu sĭ hăng nua 12.000 prăk/drơi, pơmă ƀiă kơ wăt rông čem hlok pơkra nua 8.000 prăk/drơi. Ayong Nguyễn Thanh Đức lăi: “Kiăng rông wăt tŭ yua, ta rông pơklaih lui amăng lan, brơi ƀong añăm, boh troh dong kiăng mơnŏng ñu jơman; giong anun brơi ƀong thim hlăt rơnăng hơmâo hơđăp či čem klêr, brơi wăt ƀong thim dong kiăng mơnŏng ñu khuă. Anun mơnŏng wăt pơ anai ñu phara biă hăng wăt arăng rông krư̆ ha anih”.

Hơdră rông hlô mơ̆ng ayong Nguyễn Thanh Đức ba glăk prăk hơđong, ƀơ ƀrư̆ hơmâo pok prong tui pơ să Sông Lũy, tơring čar Lâm Đồng. Ayong Nguyễn Mạnh Tường Huy, Khua hlăk ai să Sông Lũy, brơi thâo, rơngiao kơ bruă pơtrut hlăk ai bơwih ƀong, pok prong rông wăt, pơ anăp, să ñu amra ba hơbô̆ bruă bơwih ƀong phrâo, sit nik hăng hlăk ai laih anun neh met wa: Hơbô̆ bruă anai hơmâo ngă 2 thun hăng anai laih, Đức mă mơ̆ng plơi pơkŏn glăi, giong anun ñu pơdjuai mă, wai lăng čem rông wơ̆t hăng pla añăm dong či sĭ. Abih bang leng kơ sĭ tui online soh. Anai jing hơbô̆ bruă phrâo, khŏm thâo ngă bruă tong ten kah mơ̆ng dưi. Anai jing bruă bơwih ƀong blung a, pơ anăp amra iâu pơthưr ăt kah hăng pok prong tui hơbô̆ bruă anai djru brơi ƀing hlăk ai hor bơwih ƀong gir bơwih ƀong, ngă bruă, ngă pơdrong”.

Rông pơmut hrŏm wăt hăng klêr tui anai ngă amuñ mơn, huăi kiăng lu đơi prăk, djơ̆ biă hăng hlăk ai amăng plơi. Ayong Nguyễn Thanh Đức pơ să Sông Luỹ, tơring čar Lâm Đồng amra pơtô brơi hăng brơi djuai či rông kơ pô hlơi amuaih či bơwih ƀong hăng bruă phara hui mơnuih ngă anai./.