Tơlơi pơhing ƀơi mông jơnum, lu hơbô̆ bruă pruih ia tui anŏ rơgơi ƀlĕ tơdjôh ƀiă, pruih hrup ia hơjan añĕ kơ đang  hmua ƀơi Dak Lak djru ngă pơkrem 1/3 rơnoh ia pruih, pơhrŏ ƀiă rơnoh pơplai prăk kăk hăng pran jua mă bruă, pơđĭ tui boh tŭ yua mơ̆ng đang hmua. Mah hnun, đơ đam hmua dưi ngă tui ră anai aka ƀu truh 10% ôh pơkă hăng đơ đam đang hmua hlăk pla pơjing, yua aka ƀu pơlar tui lu anih.

Rơnoh prăk blơi đing, dưm truă dŏ pơmă đơi, rơnoh sĭ mơdrô boh čroh đang hmua rơgêh, đĭ trun aka ƀu hơđong ôh, hrŏm hăng dŏ kơƀah tơlơi thâo ba yua hăng pơtô brơi anun jing anŏ ngă gun hĭ. Kiăng pơsir hĭ tơlơi tơnap tap anai, anom bruă wai lăng bơnư̆ pơkong ia hlăk ngă hrŏm djop ƀôn lan, plơi pla pok pơhai ngă hrŏm ĕp rơnoh prăk djru mơ̆ng dêh čar, rơnoh prăk ODA hăng prăk čan gơgrong anăn djru kơmlai kiăng tuh pơ alin bruă bư̆ pơkong ia pioh dưm đing pruih ia kơ đang hmua, phun pla. Lu tơlơi pơgôp hiăp amăng mông jơnum hơmâo lăi nao, tŭ ư hrŏm sa tơlơi kiăng lĕ, sit mơnuih ƀôn sang thâo ba yua boh thâo ia rơgơi phrâo pruih ia pơkrem amra jing atur kơjăp, yom biă mă rŭ glăi bruă ngă hmua pla pơjing, anăp nao pơđĭ kyar kơjăp amăng kual lŏn hmua kơƀah ia pruih.