Thun 2025 ƀiă či rơgao, thun phrâo 2026 ƀiă či truh laih, ơi Nguyễn Trí Kiên dŏ pơ phường Sông Cầu, tơring čar Dak Lăk jep čuah amăng kơsăk či đăl akŏ kli, tơkai bơnư̆, dơnao, pruai čur kô̆ pơdjai kman, prăp či phai akan phrâo dong. Ơi Kiên brơi thâo, kơthel tal 13 hăng hơjan ia dăo tơdơi kơ anun ngă dăo abih 4 boh dơnao rông, kor pơđung đuăi abih 28.000 drơi akan mú pioh sĭ, ngă rơngiă năng ai 2 klai prăk. Hrŏm hăng bruă kli, rơmet dơnao, ñu đuăi hyu čan prăk adơi ayong, kơnung djuai, ngă hră čan thim prăk đah mơ̆ng dưi rông glăi dong:“Ră anai kâo glăk apah arăng jep čuah amăng asăk či đăl akŏ kli, dơnao ia, kuăi lŏn amăng dơnao kiăng dlăm djơ̆ hăng anŏ či kiăng, ngă kjăp kriang ia, pruih jrao pơdjai kman, ngă hơđong PH giong kah mơ̆ng phai nao akan. Sang anŏ gơmơi glăk pơmin rông glăi 28.000 drơi akan mú, rim boh dơnao hơmâo 7.000 drơi. Ƀơi anăp lĕ, phai akan giong ta hyu mă bruă arăng apah đah mơ̆ng hơmâo prăk blơi hlok čem akan, yua dah rông truh 10 blan; bơ prăk blơi djuai yơh glăk tơnap, khŏm čan hơdôm rơtuh klăk ƀơi sang bruă prăk kah mơ̆ng hơmâo”.

Hrup tui hăng hơdôm boh sang rông akan ƀơi ter hang ia rơsĭ mơn, giăm 1.200 boh sang rông hơdang grông (tôm hùm) ƀơi kual Tong Wing Xuân Đài, ăt glăk rŭ glăi bruă rông hơdang, ƀiă či luč hĭ mơtăm yơh yua kơthel, ia dăo ngă. Ayong Lê Văn Tú dŏ pơ phường Sông Cầu brơi thâo, kơthel tal 13 ngă pơčah lu gruh rông, pơđung pơđuăi lu hơdang grông či ba sĭ akŏ blan 12, amăng anun hơmâo rơbêh 70 gruh rông hơdang rơngiă hlao laih. Giong anun dong, hơjan ia dăo ăt ngă kơ 26.000 drơi hơdang ngă djuai dăo amăng ia, djai abih ƀhiao, prăk rơngiă truh kơ 4,5 klai. Sang anŏ đuăi hyu čan ling prăk kăk či rông glăi dong:“Sang anŏ gơmơi glăk đom hnưh kơ sang bruă prăk 1 klai 200 klăk prăk samơ̆ phrâo anai gơñu ăt brơi čan thim dong mơn 200 klăk kiăng gơmơi rông glăi dong, pơkra ming gruh, jal či rông. Sang anŏ kâo blơi 4.000 drơi hơdang grông mơtah či phai amăng 8 boh gruh, dơnao rông phrâo. Kâo ăt pơmin či pok tui anih rông đah mơ̆ng hơmâo prăk tla hnưh”.

Tui hăng mrô jŭ mơ̆ng Gơnong bruă hmua hăng ayuh hyiăng tơring čar Dak Lăk, kơthel tal 13 hrŏm hăng ia dăo kơtang blan 11 laih rơgao, ngă răm rai kơtang biă kơ kual rông akan hơdang amăng tơring čar. Kơnong ƀơi plơi prong Sông Cầu (tơring čar Phú Yên hơđăp), năng ai 100.000 gruh dơnao rông mơ̆ng rơbêh 1.500 boh sang anŏ răm rai, prăk rơngiă truh kơ 1.900 klai. Ơi Nguyễn An Phú, Kơ-iăng khua gơnong bruă hmua hăng ayuh hyiăng tơring čar Dak Lăk brơi thâo, tơring čar glăk prăp rơmet djru ba lăp djơ̆, ngă gêh găl brơi sang anŏ rông akan hơdang dưi rŭ glăi bruă mă:“Ƀing hơmơi hơmâo jŭ yap, pơƀut glăi laih prăk rơngiă laih anun glăk čih pơkra tơlơi pơsit pok pơhai Tơlơi pơtrun mrô 9 thun 2025 či djru prăk kơ hơdôm boh sang anŏ rông akan hơdang rơngiă gơnam yua kơthel 13 hăng ia dăo ngă. Mrô prăk djru lĕ 30 klăk rim 100m3 dơnao rông. Laih dong, gơnong bruă ăt čih pơkra hră pơƀuh kơ Jơnum min mơnuih ƀôn sang tơring čar Dak Lăk git gai hơdôm sang bruă păk pơdơi hĭ pơhrui prăk đom hnưh, mă kơmlai aset hăng brơi čan thim, hnun kah neh met wa mơ̆ng tañ dưi rông glăi dong”.

Ơi Nguyễn Kim Cương, Khua sang bruă prăk Kơnuk kơna kual 11 (gơgrong ƀơi tơring čar Gia Lai hăng Dak Lăk phrâo) brơi thâo, kơthel 13 hăng ia dăo kơtang phrâo rơgao ngă kơ rơbêh 27.700 čô mơnuih čan prăk ƀơi tơring čar Dak Lăk rơngiă prăk kơtang biă mă. Amăng mrô anai hơmâo hơdôm rơbâo čô mơnuih čan prăk rông akan hơdang, bruă anai yơh hơmâo prăk pơhrui lu kơ ƀing gơ̆. Ngă tui tơlơi črâo bruă mơ̆ng Jơnum min mơnuih ƀôn sang tơring čar Dak Lăk hăng Sang bruă prăk Kơnuk kơna Việt Nam, Sang bruă prăk Kơnuk kơna kual 11 glăk ječ ameč ngă hră pơ-ar djru brơi, ngă gêh găl kiăng ƀing čan prăk tañ rŭ glăi bruă rông pla pơkra gơnam sĭ mơdrô:“Sang bruă prăk Kơnuk kơna kual 11 kiăng hơdôm sang bruă čan prăk plih glăi hrơi tla prăk kơ ƀing čan bưp tơlơi truh yua hơjan kơthel ngă. Pơhrŏ trun prăk kơmlai kơ ƀing glăk čan prăk răm rai yua hơjan ia dăo ngă, tui hăng tơlơi kiăng mơ̆ng Sang bruă prăk Kơnuk kơna Việt Nam mơ̆ng 0,5 -2%/thun kơ hrơi blan pơkă hrŏ prăk kơmlai mơ̆ng 3 truh 6 blan. Giong anun, hơdôm sang bruă prăk sem lăng brơi ƀing anai čan phrâo dong đah mơ̆ng dưi bơwih ƀong sĭ mơdrô glăi”.

Hăng tơlơi gir mơ̆ng pô rông akan hơdang hrŏm hăng tơlơi djru ba hmao kru mơ̆ng gong gai hăng hơdôm sang bruă brơi čan prăk, anih rông akan hơdang phun mơ̆ng tơring čar Dak Lăk ƀơ ƀrư̆ rŭ glăi tơdơi kơ hơjan kơthel ngă. Hơdôm gruh dơnao rông hơmâo pơdong pơkra glăi, hơdôm boh dơnao ƀơ ƀrư̆ hơmâo rông bă kơ akan hơdang, jing tơlơi mơak hơmâo glăi dong laih hăng neh met wa pơ ia rơsĭ. Prăp či mut thun phrâo 2026, sa bơyan phrâo glăk pok rai, djă ba tơlơi čang rơmang hơđong kjăp, trơi pơđao, sa bơyan rông akan hơdang hơmâo lu pơ anăp anai./.