Tlam mơmŏt lơ 25/12, ƀơi Hà Nội, pơphun jơlan hơdră anăn “Hồ Chí Minh-Jơlan nao tơlơi čang rơmang thun 2025” hăng akŏ tơlơi pia “Việt Nam pơdrong sah”.

Pơpŭ bơni kơ lu khul grup, anom bruă, rim čô mơnuih ba gru hlâo amăng dêh čar hrăm hăng ngă tui tơlơi pơmin, pran jua, tơlơi dŏ dong ƀong huă hiam mơ̆ng Hồ Chí Minh. Amăng 90 mơnit jơlan hơdră anai hơmâo pơƀuh brơi lu tơlơi ră ruai, bruă mă hiam dlưh pran jua kơ pran jua pơyơr đĭ, glăm ba, pơčeh phrâo yua kơ ană plơi pla, mơ̆ng anun ngă bang bơngač tui rơnoh yom hiam klă, pơtrut pran jua kơtang hloh kơ bruă bơkơtưn mă bruă khăp kơ lŏn ia.

Nao jơnum hrŏm hăng đĭ pơhiăp, Khua git gai ping gah ơi Tô Lâm lăi pơtong, gah yŭ tơlơi git gai mơ̆ng ping gah, bruă hơkrŭ dăp glăi sang bruă kơnuk kơna, pơpha bruă kơ mơnuih apăn amăng glông bruă kơđi čar tui anăp ngă ƀiă mơnuih hơbôt hloh, mă bruă tŭ yua ăt hlăk pơtrut kơtang, anăp nao akŏ pơdong gong gai kơnuk kơna plơi pla jĕ giăm  mơnuih ƀôn sang, yua kơ mơnuih ƀôn sang; khom ngă bruă ba glăi boh tŭ yua, pơblih jơlan hơdră pơđĭ kyar bơwih ƀong huă mơnuih mơnam, đing nao, pơđĭ tui tơlơi hơdip mơda mơnuih ƀôn sang.  Khua git gai ping gah ơi Tô Lâm pơtrun hiăp abih bang amăng ping gah, amăng glông bruă kơđi čar ăt gir run hloh “ƀu lui kơ hlơi dŏ glăi gah klôn ôh”, pok prong anih anom pơđĭ kyar kơ lŏn ia.