Anai lĕ mông gêh găl kơ djop sang bruă sĭ mơdrô, pơkra ming gơnam sĭ mơdrô mơ̆ng tiu hăng sĭ mơdrô tiu ba nao pơ dêh čar tač rơngiao pơčrông sai, hrăm nao rai tơdruă, kah pơpha tơlơi pơhing hăng hơdôm tơlơi tơnap tap, gun gan, kiăng pơdah thâo hơdră pơsir hĭ laih anun pơtrut pơđĭ kyar anom bruă tiu ƀơi rŏng lŏn tơnah. Tui hăng yă Hoàng Thị Liên, Khua Khul tiu Việt Nam, anŏ kiăng tiu hiam asar lôm anih či blơi ngă tong ten biă mă. Yua kơ anun, kiăng pơhlôm klă rơnoh gơnam sĭ mơdrô sa bruă khom ngă.

Ƀơi mông jơnum, ơi Vũ Bá Phú, Khua anom bruă ĕp anih sĭ mơdrô tiu gah Ding jum wai lăng bruă sĭ mơdrô brơi thâo, Việt Nam ră anai, ăt jing dêh čar pơkra ming hăng sĭ mơdrô tiu prong hloh rŏng lŏn tơnah thun 2022, dêh čar ta sĭ mơdrô hơmâo 220 rơbâo tơn tiu, dưm dưm hăng 55% rơnoh tiu amăng rŏng lŏn tơnah. Khă hnun, kiăng kơ tiu Việt Nam pơtong sit anăn hing ang amăng anih sĭ mơdrô hơđong kjăp, anom bruă tiu dŏ lu bruă khom ngă pơ anăp anai.