Yua bơbeč mơng ayuh hyiăng pơplih sat lơm mơng bơyan không phang yak nao bơyan hơjan hlim, tơring glông Tu Mơ Rông, kual pla phun sâm Ngọc Linh amăng tơring čar Kon Tum ƀuh na nao hơjan pler. Kiăng kơ bĕ hĭ anŏ răm rai yua hơjan pler tui hăng thun hlâo, gong gai hăng gơnong bruă ngă hmua tơring glông hơmâo gơgrong pơhŭi hlâo mơnuih pla phun sâm Ngọc Linh pơhlôm hlâo ayuh hyiăng pơplih sat hŭi ngă phun pla răm rai.

Truh ră anai tơring čar Kon Tum hơmâo pơđĭ kyar đơ đam rơbêh 1.700 ektar phun Sâm Ngọc Linh, amăng anun mơnuih ƀon sang pla mă giăm 70 ektar hăng lu hloh lĕ mơng anom bơwih ƀong sĭ mơdrô. Hăng rơnoh yôm laih dong sĭ pơhrui hơmâo hmăi, ră anai rĭm phun Sâm Ngọc Linh anah pla 1 thun nua ñu giăm 300.000 prăk. Amăng 3 blan laih rơgao hơdôm boh sang anŏ ƀun rin, giăm ƀun rin amăng tơring glông hơmâo čan giăm 9 klai prăk tuh pơ alin pla Sâm Ngọc Linh.

Thun hlâo yua hơjan pler ngă răm rai hơdôm pluh rơbâo phun sâm Ngọc Linh kơ mơnuih ƀon sang ƀơi Kon Tum, ngă huăč prăk kak. Kiăng djru mơnuih ƀon sang rŭ pơdong glăi, găn rơgao tơnap tap, hrŏm hăng bruă ngă tui pơkŏng glăi hnưh đom, pơhrơ̆i tla hnưh mơng sang bruă prăk, sa, dua anom bơwih ƀong sĭ mơdrô ăt djru brơi soh sel kơ mơnuih ƀon sang anah phun pla kiăng kơ pla glăi sâm Ngọc Linh.