Mơnuih ƀon sang ƀơi tơring čar Kon Tum glăk yak nao bơyan pĕ kơphê thun 2022-2023. Kar kăi hăng hơdôm thun hlâo anun, ƀơi tơring glông Đăk Hà, kual pla kơphê prong hloh amăng tơring čar glăk kơƀah mơnuih pĕ kơphê. Anai lĕ kual pla kơphê prong hloh amăng tơring čar Kon Tum, tơring glông Đăk Hà hơmâo rơbêh 15.000 ektar glăk amăng bơyan pĕ pơhrui. Kiăng pơhlôm pĕ abih, tơring glông kiăng rơbêh 15.000 čô mơnuih mă bruă.

Hrŏm hăng bruă pơphun pĕ pơhrui tŏ mơng tong krah blah 10 truh rơnuč blan 12, tơring glông ăt ngă tui bruă pơpha mơnuih mă bruă brơi hơdôm kual hăng pơhlôm brơi giăm 11.000 čô mơnuih. Hăng rơbêh 4.000 čô mơnuih dŏ kơƀah amăng bơyan pĕ kơphê thun anai, gong gai tơring glông Đăk Hà, tơring čar Kon Tum pơtă pơtăn mơnuih ƀon sang hyu ĕp mơnuih mă bruă mơng tơring čar pơkŏn kah hăng nao tơl anom bruă kông ang, ling tơhan kiăng kơ djru brơi mơnuih ƀon sang, hơdôm kông ti pĕ pơhrui kơphê tañ hloh.