Amăng 2 hrơi mơng lơ 3-4/11, ƀơi plơi prong Buôn Ma Thuột, tơring čar Dak Lak, Anom bruă wai pơgang phun pla, Ding jum ngă hmua hăng pơđĭ kyar ƀon lan pơphun jơnum bơkơtuai hăng pơtô hrăm “Kơtưn amăng bruă pel ĕp, wai lăng bruă sĭ mơdrô hăng mă yua ia jrao pơgang phun pla ƀơi kual Dap kơdư” hăng hơmâo tơlơi mut hrŏm mơng khua mua hăng ƀing apăn bruă amăng anom bruă wai pơgang phun pla 5 boh tơring čar kual Dap kơdư. Tui tơlơi lăi pơthâo amăng mông jơnum bơkơtuai, đơ đam kual Dap kơdư ră anai hơmâo giăm 3.400 sang sĭ mơdrô ia jrao pơgang phun pla.

Bruă wai lăng ia jrao pơgang phun pla ƀơi kual Dap kơdư hơmâo arăng lăng aka ƀu kjăp ôh, bruă pơgăn ƀing sĭ dŏp, pơdŭ pơgiăng, mă yua ia jrao pơgang phun pla blơi mut ča čot, rơngiao kơ hră čih pioh ngă wai lăng jai tơnap tap tui. Amăng mông jơnum, ƀing khua mua brơi thâo, kiăng kơtưn tŭ yua amăng wai lăng ia jrao pơgang phun pla, kiăng hơmâo tơlơi gum hrŏm kơplah wah hơdôm anom bruă bơdjơ̆ nao; pơtrut pơtô pơblang, lăi pơthâo, črâo brơi mơnuih ƀon sang thâo rơđah kiăng bĕ hĭ blơi hăng mă yua hơdôm ia jrao arăng kŏm, ƀu hơmâo amăng hră čih pioh hăng črâo ba mă yua pơhlôm klă, tŭ yua.