Lom lui tơlơi găn rơgao mơng hlâo “Hơbơi lŏn phrâo, anah pơdai lŏn juăt”, kual ngă đang hmua 80 ektar ƀơi kual kơtuai plơi prong Buôn Ma Thuột, tơring čar Dak Lak mơ̆ng Sang bruă Sweet Potatoes lĕ kual lŏn ngoăi laih yua kơ pô lŏn hmâo ha tal brơi kơ hơdôm khul grŭp, mơnuih pơkon apah pla hơbơi čin amăng lu thun. Bơyan blung a Sang bruă pla hơbơi čin trun kual anai, lu mơnuih bơngot amra ƀu klă hiam, lu mơnong pơčrăm. Tui anun mơn Sweet Potatoes ngă truh kih. Mơ̆ng hlâo adih, mơnuih pla hơbơi ƀơi Dap Kơdư pla hmâo 30 tơn sa ektar ƀu hmâo mơn. Tui anun mơn, đang hơbơi glăk klơi hơbơi mơ̆ng sang bruă klơi pơhrui hmâo rơbêh kơ 50 tơn sa ektar.

Tui hăng ơi Bùi Quang Sáu, gơgrong gah bruă pla ƀơi kual anai, anô̆ pha ra blung a lĕ sang bruă hmâo pơplih pơkra lŏn hăng kơmok vi sinh; kiăo tui anun lĕ mă yua djuai hơbơi hmâo phun akha ƀu hmâo klai, pơsir anô̆ ngă bơbuă tui rim tal brô̆ prong mơ̆ng phun pla. Hrŏm hăng hơdôm bôk hơbơi čin akă klơi mă hơbơi, hla mơtah găng ƀu hmâo sa nam hlăt ƀong ôh, ơi Bùi Quang Sáu brơi thâo, hăng glông gah pla mơ̆ng pô, lơm 2 thun sang bruă pla hmâo 3 bơyan hơbơi čin, bơyan tơdơi hmâo hơbơi lu hloh kơ bơyan hlâo.

 “Ƀing gơmơi kơsem min tơlơi ngă bơbuă kơ lŏn pla, hrŏm hăng pơdjai abih bang djop djuai pơmao pơčrăm phun pla amăng lŏn pioh pok pơhai ngă đang hơbơi čin. Tơdơi kơ pơsir lŏn amăng rơwang 2 blan. Pơtŏng sit lŏn anun klă, pơmao ƀu dô̆ dong tah, anun kah ƀing gơmơi mơ̆ng pơphun pla. Rơngiao kơ djuai hơbơi pla, tơlơi pơsir lŏn, ngă hiam lŏn lĕ yôm phăn biă anun kah mơ̆ng hmâo hơbơi lu kah hăng ră anai”.

Ơi Mai Duy Khương, Khua Anom pơđĭ kyar anih anom sĭ mơdrô mơ̆ng sang bruă Sweet Potatoes pơtŏng sit: Ră anai mrô hơbơi čin ƀơi hơdôm bôh tơring čar kual Dap Kơdư kơnong dưi djă pioh hơbơi dô̆ asăt ƀơi anih hơpă tŭ mơn tơdơi kơ klơi pơhrui giong mơ̆ng 15 truh 20 hrơi. Samơ̆ hơbơi čin mơ̆ng sang bruă amra djă pioh hơnong anô̆ jơman hơbơi amăng 3 blan. Tơlơi anai gêh gal brơi kơ bruă sĭ kơ dêh čar tač rơngiao tui jơlan ia rơsĭ nao pơ̆ hơdôm bôh dêh čar kual Mi Kô̆, Arab.

 “Ƀing gơmơi kĭ pơkôl hră pơ-ar hăng Sang bruă Toyota mơ̆ng dêh čar Japan. Ƀing gơmơi kĭ pơkôl hră blơi sĭ tui sa jơlan mrô hơbơi hăng sa rơnoh nua hmâo hơđăp. Abih bang hơdôm hră pơ-ar sĭ hơbơi; mrô hơbơi, nua hmâo pơkă hlâo 12 blan hlâo adih lơm pơphun pla. Ră anai hơbơi ƀing gơmơi glăk pla anai lĕ hơbơi čin Japan, djuai Beniazuma. Djơ̆ tui tơhnal sĭ kơ dêh čar tač rơngiao tui jơlan ia rơsĭ nao pơ̆ kual Mi Kô̆. Anih anom sĭ hơbơi mơ̆ng ƀing gơmơi hơđong biă”.

Ơi Đào Y Dương, Khua Anom pơsĭ kyar rơwang bruă Sang bruă Sweet Potatoes lăi lĕ: Lui ruh ră anai mơ̆ng lu mơnuih pla hơbơi čin ƀơi Dap Kơdư ăt kah hăng lu anih anom pơkon amăng đơ đam dêh čar lĕ yua kơ gơñu lăng yôm kơ jơlan gah pla pơplih nao rai. Akă mă yua pơplih pơkra lŏn djơ̆ hơdră, hrŏm hăng anun mă yua jrao pơgang phun pla rơgao rơnoh ngă djop djuai mơnong hmâo yua kơ phun hơbơi čin djai hĭ. Tơlơi anai ba truh wot mrô hơbơi hăng anô̆ klă hiam hơbơi trun hĭ, ƀu djơ̆ tui tơlơi kiăng jai hrơi jai ruah tŏng ten mơ̆ng bơnah blơi mơ̆, pô blơi amăng lŏn ia ăt dô̆ djưng djư mơn yua kơ ia jrao mă yua rơgao hơnong đơi. Mơ̆ng truh kih gah mrô hơbơi hmâo, anô̆ hiam hơbơi, Sang bruă Sweet Potatoes glăk ĕp bơnah blơi pioh pơhư prong lŏn pla truh 500 ektar amăng thun 2024 anai hăng amra đĭ hơdôm rơbâo ektar mơ̆ng djop brơi kơ mơnuih rơkâo blơi amăng hơdôm thun tô̆ tui.

Ơi Đào Y Dương brơi thâo, lŏn pla hăng ayuh hyiăng ƀơi Dak Lak lăp djơ̆ hăng djuai hơbơi Beniazuma Japan, amra hmâo 90 tơn sa ektar. Anô̆ bơngot mơ̆ng sang bruă ră anai lĕ ĕp tơbiă lŏn pla giăm nao rai, pơƀut hơbit pioh djơ̆ hăng bruă mă yua măi mok.

 “Amăng bruă đang hmua hăng gơnam sĭ hyu ƀing gơmơi hơđong biă. Pla hơbơi ăt truh kih laih mơ̆n. Čang rơmang gong gai plơi pla ngă gal brơi kơ ƀing gơmơi hmâo sa kual lŏn pla hơđong mơ̆ng 400 truh 500 ektar pioh hơđong bruă pla ba hyu sĭ”./.