Pla bơnga tết giăm hơdôm pluh thun laih, ơi Ôn Văn Khi, dŏ ƀơi ƀut plơi 7A, să Ea Bar, tơring glông Buôn Đôn brơi thâo: bơyan tết thun anai, ñu pla 100 bung bơnga cúc pha lê pơjeh gap ƀrô hăng 70 bung bơnga cúc pơjeh prong. Pla bơnga tết ngă kơ sang anŏ hơmâo dong prăk pơhrui hăng anai lĕ tơlơi hor mơng ƀing gơñu. Kual lŏn ñu juăt pla lĕ amăng lŏn ngă đang hmua, truh blan 8 hơdai nao pla bơnga cúc pioh sĭ bơyan ngui tết. Thun anai, klin Covid-19 pơgang hĭ, hơmâo lu mơnuih blơi bơnga pioh ngui amăng bơyan tết anai, ơi Ôn Văn Khi ăt pla lu bung bơnga ƀiă, hăng tơlơi čang rơmang hơmâo lu dong tơlơi hok mơ-ak.

“Prap lui djop mơta mơng pơluk brơi pơsăn lŏn hăng kmơk pơđăm hăng djah djâo, dua dong lĕ ruah hơdôm pơjeh bơnga hiam kiăng kơ amuñ pla, kiăng bơnga hluh hiam. Bruă pruih ia pơhlôm brơi djop. Mơnuih pla ăt hok mơ-ak mơ̆ mơnuih blơi ba glăi pơ sang ăt lăng hiam, mơ-ak amăng thun phrâo amra hơmâo lu tơlơi dưi phrâo”.

Bơyan sĭ bơnga thun anai, sang anŏ yă Nguyễn Thị Hiệu, dŏ ƀơi ƀut plơi 3, să Hoà Xuân, plơi prong Buôn Ma Thuột, pla 1.500 m2 bơnga cúc. Giăm 4 blan pla bơwih brơi hiam, hơdôm hrơi anai, ñu hăng mơnuih amăng sang anŏ mă bruă na nao amăng đang bơnga, trơ̆i than, pơhlôm brơi bơnga bluh hiam djơ̆ hrơi čơkă thun phrâo:

“Ră anai glăk trơ̆i than bơnga, ƀuh than bluh bơnga đơđet, ƀu hiam amra trơ̆i hĭ mơtăm, pioh hơdôm phun bluh hiam đôč, hăng ră anai pla truh 22 hrơi laih, sa dua bung ăt dưi sĭ yơh hăng mrô dŏ glăi pioh truh lơ 28 tết anai ba nao sĭ”.

Bơ hăng ơi Nguyễn Ngọc Sung, dŏ ƀơi phường Tân Lợi, plơi prong Buôn Ma Thuột, rĭm bơyan čơkă thun phrâo ăt lĕ hrơi mông sang anŏ ñu pơhrui glăi mơng bruă hor lĕ pla phun mai. Thun anai, ñu prap lui giăm 400 phun mơng 5 truh 70 thun kiăng kơ ba nao sĭ mơdrô. Ñu brơi thâo kiăng kơ hơmâo sa phun mai hiam amăng bơyan tết anai, rơngiao kơ bruă bơwih brơi trơ̆i than, pơgang hlăt mŏt ăt kiăng đing nao ayuh hyiăng kiăng pơgang pơhlôm brơi lăp djơ̆.

“Truh bơyan ƀing gơmơi pruai kmơk, pruih ia, trơ̆i than brơi kơ hiam, rơnuč thun brơi ñu bluh hla mơtah mơda hăng kiăng ñu bluh bơnga. Amăng hơdôm hrơi rơnuč thun mơng blan 10 truh pơ blan 12 lĕ yôm phiăn biă mă, wŏt hrơi mông pleh hĭ hla kiăng bluh bơnga”.

Ƀơi hơdôm anih pla bơnga tết ƀơi tơring čar Quảng Nam, hơdôm hrơi anai ƀu dik dak mơnuih sĭ kah hăng mơnuih nao blơi bơnga. Thun anai ayuh hyiăng gêh gal yua anun bơnga tết ƀơi tơring čar anai hiam hăng sĭ hơmâo nua. Sang anŏ yă Trần Thị Thu, dŏ ƀơi să Duy Trung, tơring glông Duy Xuyên pla giăm 200 rơbâo čeh hăng djop pơjeh bơnga anun lĕ: bơnga Dạ yến thảo, Mai địa thảo, cúc Mâm xôi, Sao băng…hơmâo arăng rơkâo hlơi hlâo rơbêh 70%. Yă Trần Thị Thu brơi thâo, bơnga thun anai hơmâo nua, arăng nao blơi tañ ƀiă yua anun neh met wa hơmâo prăk pơhrui hơđong kiăng blơi bơyan pioh ƀong tết.

“Thun anai, bơnga hiam ƀiă thun hlâo, arăng tui rai blơi bơnga, ƀing gơñu jao prăk hlâo. Pơhmu hăng thun hlâo, thun anai gêh gal ƀiă, bơnga sĭ đĭ nua ƀiă pơhmu hăng thun hlâo, ƀing gơmơi pơhrui ăt hơmâo hmăi mơn. Abih tih rơnoh prăk pơhrui giăm 1 klai 400 klăk prăk, kmlai giăm ha mơkrah. Ƀing gơmơi pơhlôm brơi 12 mơnuih mă bruă, ngă gêh gal kiăng ƀing gơñu hơmâo bruă na nao”.

Tơring glông Duy Xuyên, tơring čar Quảng Nam hơmâo giăm 7 ektar đang pla bơnga sĭ amăng bơyan tết anai hăng hơdôm rơtuh boh sang anŏ pla, lu hloh lĕ bơnga Vạn thọ, cúc, hơdôm bơnga tol yol, lu hloh ƀơi hơdôm boh să Duy Thành, Duy Trung, Duy Nghĩa, Duy Hải, tơring kual Nam Phước. Rĭm ektar pla bơnga pơhrui glăi rơbêh 200 klăk prăk brơi mơnuih pla, lu hơdôm wŏt pơhmu hăng phun pla pơkŏn kah hăng añăm tam. Ơi Phan Xuân Cảnh, Khua Jơnum min mơnuih ƀon sang tơring glông Duy Xuyên, tơring čar Quảng Nam brơi thâo, pơhmu hăng hơdôm thun hlâo anun, thun anai đang pla bơnga pok prong ƀiă, sĭ mơdrô hơmâo hmăi:

“Tơring glông djru brơi lŏn kiăng pok prong pla bơnga. Sit biă ñu, lơ̆m hơmâo lu tơlơi gêh gal hăng mơnuih blơi bơnga thun anai lu ƀiă, bruă anai amra djru brơi bruă mă, pơhrui hmâo hmăi kơ mơnuih ƀon sang pơhmu hăng hơdôm hrơi tơnap tap yua klin kheng”.

Tơring čar Quảng Nam hơmâo giăm 2.000 boh sang anŏ pla bơnga tết. Gơnong bruă ngă hmua tơring čar Quảng Nam, Khul mơnuih ngă hmua tơring čar hơmâo djru brơi mơnuih pla bơnga čan prăk mă kmlai ƀiă, djru brơi pơjeh, djru ƀing gơñu hơđong bơwih ƀong. Thun anai, ayuh hyiăng gêh gal, nua hơđong, hơmâo lu mơnuih blơi bơnga yua anun ngă kơ mơnuih pla bơnga tết ƀơi tơring čar Quảng Nam hok mơ-ak biă mă./.