Tơdơi kơ hơdôm hrơi tlâ̆o srôm jur ia, bơmơñum brơi ia jrao tui tơlơi pơtô mơ̆ng nai ia jrao pơjrao hlô mơnong, pŭ rơmô mơ̆ng sang anŏ ơi Nguyễn Đình Sơn, dŏ ƀơi plơi Bồng Lai, să Hiệp Thạnh, tơring glông Đức Trọng hlăk suaih tui ƀơƀrư̆. Rơngiao kơ 2 drơi ruă kơtang djai hĭ laih, rơbêh hơpluh drơi rơmô dŏ glăi ƀong rơ̆k glăi yơh. Khă tui anun, tơlơi mơ̆ ơi Nguyễn Đình Sơn bơngơ̆t lĕ rơmô gơñu hŭi ƀă glăi ruă dơ̆ng.

"Tlâ̆o vaccine lơ 25/7, truh lơ 2/8 rơmô ƀuh ƀu ƀong rơ̆k, truh lơ 4/8 rơmô hlong lui ƀong rơ̆k hlao. Hrơi mông ruă kơtang hloh, ruă kian ia lơ 7/8 sui truh lơ 9/8 rơmô ruă anun djai yơh 2 drơi. Ră anai hơdôm drơi dŏ glăi găng glăi ƀiă hlăk ƀong rơ̆k, samơ̆ hơmâo drơi ñu đa ruă glăi dơ̆ng amăng 2, 3 hrơi hăng anai ƀu gưt ƀong rơ̆k dơ̆ng tah".

Ăt tui anun mơ̆n, rơngioa kơ 4 drơi rơmô djai laih, 22 drơi dŏ glăi mơ̆ng sang anŏ yă Lê Thị Ánh Hồng, plơi Bồng Lai, să Hiệp Thạnh, tơring glông Đức Trọng tơring čar Lâm Đồng, ăt dưi ƀiă laih jăng jai anai. Hơdôm drơi găng añrăng glăi gir ƀong rơ̆k. Tui hăng yă Hồng, tơlơi đing nao ră anai kiăng hơmâo tơlơi pơsit glăi tañ mơ̆ng ƀing mơnuih gơgrong ba duh glăi, djru prăk răm ƀăm kơ mơnuih ƀôn sang čem rông rơmô.

“Hlơi lĕ pô ñu pơkra ming rai ia jrao anun khom glăm ba, gơgrong ƀơi anăp mơnuih ƀôn sang, khom duh glăi kơ rơmô mơnuih ƀôn sang djai. Ră anai lăi klin, klin pơpă hơmâo. Rơmô gơmơi hlâo kơ anun, rơ̆k čem ƀu djop mơ̆n kơ ñu ƀong, samơ̆ tơdơi kơ anun, giong tlâ̆o ia jrao pơgang mơ̆ abih bang hlong ruă, hlong pơ-ai soh. Ră anai ăt dŏ đôč 2-3 drơi ƀu gưt ƀong rơ̆k, mơguah anai ăt phrâo tlâ̆o ia jrao srôm jur ia đôč. Hơdôm drơi rơmô pơjrao hlao laih, lu drơi glăi ruă dơ̆ng yơh, sit ruă glăi djai biă yơh lah”.

Yap truh abih lơ 12/8, tơring čar Lâm Đồng čih pioh hơmâo 5.350 drơi rơmô djet ia tơsâo ruă kian pơčroh hăng 237 drơi rơmô djai laih, lu biă mă ñu ƀơi 2 boh tơring glông Đơn Dương hăng Đức Trọng. Anai lĕ hơdôm drơi rơmô arăng tlâo ia jrao vaccine pơgang anăn NAVET-LPVAC pơhlôm tơlơi ruă ngă bơbrah klĭ kơđông drah ƀơi rơmô mơ̆ng lơ 22 truh lơ 31/7/2024.

Tui hăng ơi Hoàng Sỹ Bích, Khua Gơnong bruă Đang hmua hăng pơđĭ kyar plơi pla tơring čar Lâm Đồng lĕ, vaccine NAVET-LPVAC pơhlôm tơlơi ruă ngă bơbrah klĭ yua kông ty pơčruh ngăn ia jrao pơjrao hlô mơnong mơ̆ng sang bruă NAVETCO pô djơ̆ anăn dưi ba sĭ mơdrô hăng pơkra ming. Lơ̆m juă nua hăng sĭ mơdrô vaccine anai hơmâo ngă djơ̆ hơdră pơtrun soh hăng djơ̆ tơlơi phiăn pơkă. Ơi Hoàng Sỹ Bích brơi thâo, mah hnang blung hơmâo pơtong sit lĕ bruă tlâ̆o ia jrao vaccine hơmâo bơbeč djơ̆ kơ pŭ rơmô biă mơ̆n ngă ruă kian pơčroh, samơ̆ phun ñu sit mơ̆n hă ngă kơ rơmô ruă hăng djai anun kiăng hơmâo tơlơi pơtong glăi tong ten mơ̆ng anom bruă hơmâo tơlơi thâo ĕp ƀuh rơđah yua hơgĕt ñu:

“Lăng nao kơ mrô čih pioh truh ră anai, abih bang rơmô brung djet ia tơsâo lêng kơ tlâ̆o pơgang klin ngă bơbrah klĭ tlâ̆o vaccine pơgang pơhlôm, hơdôm rơmô ƀu hơmâo tlâ̆o pơgang lĕ huăi ruă ôh. Khă tui anun, ta kŏn pơsit lơi tong ten, khom hơmâo boh tơhnal ba pơčrang ĕp lăng kman yua hơgĕt, hơmâo anom bruă hơmâo tơlơi thâo tong ten pơtong glăi kah, čih amăng hră pơar pơsit rơđah. Gơmơi ăt rơkâo ngă hră pơar hăng tơlơi tơpă, khom hơmâo anom bruă rơngai ĕp lăng bruă anai. Tơdah yua kơ ia jrao vaccine ngă rai, gơmơi amra brơi sang bruă sĭ mơdrô hăng pơkra ia jrao anun khom duh glăi kơ ană plơi pla sang anŏ rông rơmô brung djai yua tlâ̆o ia jrao vaccine”.

Rơngiao kơ 2 boh tơring glông Đơn Dương hăng Đức Trọng, tơring glông Lâm Hà hăng plơi prong Bảo Lộc tơring čar Lâm Đồng ăt čih pioh hơmâo rơmô brung djet ia tơsâo ruă kian pơčroh tơdơi kơ tlâ̆o vaccine pơhlôm tơlơi ruă bơbrah klĭ kơđông drah. Amăng anun, tơring glông Lâm Hà, hơmâo 2 drơi rơmô djet ia tơsâo djai. Ră anai, bruă mă pơhlôm tơlơi ruă eh pơčroh ƀơi rơmô brung tơring čar Lâm Đồng glăk dưi hơmâo sang bruă pơjrao hlô mơnong rông mơ̆ng dêh čar hăng tơring čar pok pơhai tong ten hmar biă mă yơh.