Ră anai, jai hrơi jai hmâo lu mơnuih ƀôn sang kual čư̆ siăng pơplih laih bruă ngă đang hmua, khin hơtai tuh pơplai mă yua hơdră phrâo, ngă pơdrŏng mă pô ƀơi hmua plơi pla pô.

Să Giao Phú lĕ sa amăng hơdôm să tơnap tap hloh mơng tơring glông Bảo Thắng, tơring čar Lào Cai. Kah hăng hơdôm bôh sang anô̆ mơnuih ƀôn sang pơkon ƀơi să, hlâo adih lŏn ngă hmua mơng sang anô̆ amai Phạm Thị Yên djuai ania Tày kơnong kơ ƀia. Rơngiao kơ lŏn ngă hmua pơdai kơnong kơ djop huă lĕ djuai phun pơkon amăng đang ăt kơnong kơ hmâo dong hơdôm prăk nao pơ̆ čơ mơn. Rơgao hăng anai 4 thun, rơkơi bơnai amai Yên dưi hmâo tơring glông brơi nao hrăm bruă ngă hmua mă yua hơdră phrâo. Dưi hmâo Kơnuk kơna brơi čan prăk djru 200 klăk prăk hrom hăng prăk mơng sang anô̆, amai Yên khin hơtai pla añăm pơtăm hăng tơmun rưng amăng sang păng pơgang hăng sang păng rưng prong mơng 1 truh kơ 7 ektar. Truh ră anai, bôh than ba glăi lĕ tơlơi čang rơmang mơng lu mơnuih. Amai Phạm Thị Yên brơi thâo:

 “Dong mơng pơphun ngă đang hmua jơlan gah hơdră phrâo anai bruă mă ƀiă mơn, pơhlôm klă gơnam ƀong lom pô ba hyu sĭ hăng pơđĭ tui prăk mă yua kơ sang anô̆ lu biă”.

Bôh nik ăt brơi ƀuh mơn, ră anai ƀơi lu anih anom hmâo neh wa djuai ania ƀiă dô̆ hơdip mơda amăng đơ đam dêh čar ta hmâo hơdôm hơdră ngă đang hmua tui hơdră phrâo hăng jơlan gah pha ra, ba glăi bôh tơhnal prong kơ mơnuih ngă đang hmua hăng bôh tŭ yua kơ mơnuih blơi yua. Tơdah kah hăng rơgao hăng anai 3 thun, ayong Ya Thuyên, ƀơi să Đa Quyn, tơring glông Đức Trọng, tơring čar Lâm Đồng dô̆ dir wir amăng bruă pla añăm pơtăm hơbơi pơtơi pioh sĭ, samơ̆ gơnang kơ dưi pơhrăm bôh thâo phrâo ñu hmâo khin hơtai tuh pơplai rơbêh kơ 100 klăk prăk pla 3 ar ha mơkrah đang trong mơxăm tui hơdră phrâo. Mơng anun, bôh tơhnal bơwih ƀong đĭ rơđah rơđông. Ră anai, rơngiao kơ prăk mă yua, rim thun ñu pơhrui hmâo rơbêh kơ 200 klăk prăk mơng trong mơxăm:

 “Ngă hrŏ trun bruă lu biă. Bơhmutu ñu sa hrơi tơdah pô pruih ia khom rơngiă sa mơguah, samơ̆ măi pruih ia lĕ kơnong kơ rơngiă mă 30 mơnit đô̆č”.

Gơnam hơdjă laih, glăk hăng jing jơlan pơlar kơjăp phik yua kơ tơlơi kiăng mă yua gơnam ƀong pơhlôm klă mơng mơnuih blơi ƀong jai hrơi jai đĭ lu. Yua anun yơh, amăng hơdôm thun rơgao, mă yua bôh thâo phrâo hmâo laih lu anih anom, anom bơwih ƀong amăng đơ đam dêh čar pok pơhai ngă tui. Mơnuih ngă đang hmua lăi hrom hăng biă ñu lĕ neh wa djuai ania ƀiă kual asuek, ataih lăi ha jăn lom hmư̆ truh bôh thâo phrâo juăt ñu hmâo tơlơi pơmin bơngot, djong djư yua kơ lu tơlơi akă thâo hăng ƀu rơđah. Khă hnun hai, hơdôm mơnuih ngă hơdră bruă gum hrom ƀơi lu anih anom thâo ruah mă laih hơdôm hơdră, bôh yôm djơ̆, amuñ mă yua amăng bruă đang hmua mơng neh wa sit nik. Biă ñu, hơdôm bôh yôm anai dưi pơhrua mut amăng hơdôm jơlan hơdră pơtô pơhrăm bruă plơi pla. Yă Giàng Thị Dung, Kơ-iăng Khua Jơnum min mơnuih ƀôn sang tơring čar Lào Cai brơi thâo:

“Bruă pơtô pơhrăm hmâo bôh tơhnal blung hlâo khom pơphun mơng mơnuih ƀôn sang. Khom lăng tơlơi kiăng mơng mơnuih ƀôn sang lĕ kiăng pơtô pơhrăm bruă hơget. Hrom hăng anun, hluai tui pơđĭ kyar pơsit jơlan gah mơng tơring čar, bơhmutu ñu kah hăng Lào Cai đing nao pơđĭ kyar bruă đang hmua tui jơlan gah mă yua bôh thâo phrâo, hrom hăng anun ngă tui anô̆ gal mơng Lào Cai kah hăng pơlar phun añăm pơtăm, bôh troh ƀơi anih hơđong ayuh hyiăng, añăm pơhlôm klă, añăm hơbơi pơtơi ngă ƀu tui bơyan hăng čè”.

Ră anai, lu sang anô̆ neh wa djuai ania ƀiă dưi hmâo mơnuih apăn bruă ƀơi plơi pla juăt lăi pơhing pơsur, mơng anun ƀơƀrư̆ khin hơtai pơplih. Khă hnun hai, bruă mă yua bôh thâo phrâo amăng bruă đang hmua kual neh wa djuai aniă ƀiă hăng kual čư̆ siăng dô̆ mơn ƀơi lu mơta hăng akă gal hơdôm bôh sang anô̆, hơdôm gơnong bruă bơdjơ̆ nao khom hmâo tơlơi pơplih pơkra hăng pơjing jơlan hơdră, hơdră bruă djơ̆. Hơdôm anih anom khom đing nao pơhrăm pơđĭ tui bôh thâo wai lăng, bôh thâo phrâo hăng hơdră măi mok kơ mơnuih apăn bruă ƀơi anom bruă; pơhrăm bôh thâo kơ mơnuih ngă đang hmua, đing nao ƀơi anăp gum hrom ngă tui rơwang bruă lĕ đah kơmơi; Pơdŏng hơdră pơsur anom bơwih ƀong pơlir hơbit hăng mơnuih ƀôn sang ngă tui hơdôm rơwang bruă mă yua, pơtô glăi hơdră măi mok phrâo, pơplih phrâo ƀơi kual plơi pla, kual čư̆ siăng, kual djuai aniă ƀiă./.