Thun 2024, sĭ mơdrô kơphê pơ tač rơngiao mơng Việt Nam dưm dưm 1,32 klăk tơ̆n, pơhrui glăi giăm 5,5 klai đôlar Mi. Mah hơmâo tơlơi dưi prong, gơnong bruă kơphê Việt Nam glăk dong ƀơi anăp lu tơlơi lông amăng pơđĭ kyar hơđong kjăp, sit biă ñu lĕ amăng wai lăng djah djâo hăng mă yua gơnam ngă hmua. Kiăng pơtrut gơnong bruă kơphê pơđĭ kyar hơđong kjăp, blan 6/2024, akŏ bruă “Pơlăi nao rai hơdră bruă, hrưn đĭ ngă bruă klă hăng thâo hloh mă yua gơnam ngă hmua brơi gơgrong, duñ pơƀut hăng pơrai hĭ djah djâo amăng ngă kơphê ƀơi Việt Nam” sit nik pok pơhai.

Hăng hơnong pơkă đĭ tui pơhrui brơi ƀiă biă mă ñu 150.000 boh sang anŏ pla kơphê ƀơi Việt Nam amăng thun 2030, ƀing khua mua pơčrông sai kơ hơdôm tơlơi găn rơgao mơng akŏ bruă, lăi pơthâo hơdôm hơbô̆ bruă, hơdră pla kơphê ba glăi tŭ yua, hơđong kjăp; hơdôm bruă mă yua gơnam ngă hmua phrâo, duñ pơƀut hăng pơrai hĭ djah djâo…Laih dong, rơkâo đĭ hơdră bruă hăng pơlir hơbit djop bơnah bơdjơ̆ nao amăng pơđĭ kyar kơphê hơđong kjăp ƀơi Việt Nam.