Gơnam đang hmua lĕ gơnam ba sĭ mơdrô pơ tač rơngiao akŏ phun mơng tơring čar Gia Lai, hăng rơnoh sĭ mơdrô 500 klăk đôlar Mi rĭm thun hăng glăk ƀu pơdơi đĭ tui. Tơlơi dưi ngă anai lĕ yua hơdôm thun laih rơgao, tơring čar hơmâo đing nao pơjing, pok prong hơdôm kual pla pơjing gơnam đang hmua tui hơdôm hơnong pơkă hơmâo tŭ yap. Tui lăi pơthâo mơng Gơnong bruă ngă hmua hăng pơđĭ kyar ƀon lan tơring čar Gia Lai, ră anai đơ đam đang hmua pla pơjing đơr hơr tơring čar him lăng 557.700 ektar. Amăng anun, hơmâo 230.000 ektar, dưm dưm hăng 41% lŏn đang hmua, hơmâo pla pơjing tui hơdôm hơnong pơkă anun lĕ VietGAP, GlobalGAP, 4C, Organic, Rainforest Alliance…Hrŏm hăng anun, ră anai Gia Lai hơmâo tŭ yap 55 mrô kual pla pơjing hơdôm phun kyâo boh troh, pơhlôm djơ̆ hơnong pơkă sĭ mơdrô pơ tač rơngiao lu hloh.

Ơi Lưu Trung Nghĩa - Khua gơnong bruă ngă hmua hăng pơđĭ kyar ƀon lan tơring čar Gia Lai brơi thâo, sa, dua gơnam anun lĕ kơphê, boh kruăi hrĕ mơng tơring čar hơmâo ba nao truh hơdôm anih anom sĭ mơdrô pơ dêh čar Japan, kual EU. Tui akŏ bruă, rơwang thun 2022-2025, tơring čar amra đĭ tui lŏn pla pơjing tui hơnong pơkă hơmâo tŭ yap giăm 5 rơbâo ektar amăng ha thun, pơhlôm gơnam hiam hơdjă ba sĭ mơdrô pơ tač rơngiao kiăng lu tui prăk pơhrui kơ mơnuih ƀon sang.

“Gơnam đang hmua amăng tơring čar jai hrơi pơdah tơlơi dưi prong kơ anŏ hiam hơdjă, djơ̆ hăng tơlơi rơkâo mơng anih anom sĭ mơdrô mơng hơdôm boh dêh čar. Tơdơi kơ abih klin kheng, tơring čar hơmâo hơkrŭ glăi gơnong bruă sĭ mơdrô gơnam pơ tač rơngiao. Rơnoh sĭ mơdrô pơ tač rơngiao mơng hơdôm anom bơwih ƀong sĭ mơdrô djơ̆ hăng tơlơi rơkâo. Amăng hrơi blan laih rơgao, ƀu hơmâo gơnam đang hmua hơpă ôh tơnap sĭ mơdrô. Sit biă ñu lĕ hơdôm anom bơwih ƀong sĭ mơdrô anun lĕ Hoàng Anh Gia Lai, Hương Sơn, Doveco, Quiconac…hơmâo pơjing bruă pơlir sĭ mơdrô pơ tač rơngiao hơđong kjăp”.

Tơdah Gia Lai glăk đing nao pok prong hơdôm kual pla pơjing gơnam đang hmua tui hơdôm hơnong pơkă  hơmâo tŭ yap, ƀơi kual Yŭ kơdư, Sơn La glăk đing nao tuh pơ alin amăng bruă bơwih bơwang logistic kiăng pơsir hĭ tơlơi tơnap lơ̆m sĭ mơdrô gơnam đang hmua mơng tơring čar. Sơn La ră anai hơmâo 55 anom bơwih ƀong sĭ mơdrô bơwih bơwang tui logistic samơ̆ dŏ anet raih daih, aka ƀu hơđong kjăp. Amăng bruă pơdŭ pơgiăng hyu gơnam sĭ mơdrô, tơring čar hơmâo 2 hơdră anun lĕ tui jơlan rơdêh đuăi hăng amăng tui glông ia krông.

Kơƀah logistic, ăt ngă kơ bruă sĭ mơdrô añăm tam, hơbơi pơtơi, boh troh mơng Sơn La bưp tơnap tap. Mơnuih ngă đang hmua bơngŏt hăng hơmâo ƀing blơi gơnam pơgô̆ trun nua. Hrŏm hăng anun lĕ bruă kơƀah anih pơkra pơjing adung, djă pioh, pơdŭ pơgiăng, mơnuih mă bruă… Ơi Nguyễn Khắc Hào, Khua anom bruă ngă hmua hăng pơđĭ kyar ƀon lan tơring glông Mai Sơn, tơring čar Sơn La brơi thâo: Tơring glông hơmâo 11.000 ektar hmua pla boh troh, hăng pĕ pơhrui 70.000 tơ̆n rĭm thun. Bruă pĕ pơhrui juăt amăng ƀiă hrơi, yua anun bruă djă pioh lui sui lĕ kiăng biă mă. Samơ̆, hơdôm anih rơ-ơ̆ djă pioh gơnam ƀơi ƀon lan ră anai tuh pơ alin anet raih daih, kơnong ƀơi hơdôm boh sang anŏ, anom bơwih ƀong hrŏm, gơnam djă pioh ăt ƀu lu ôh.

“Tơring glông hơmâo hơdôm tơlơi rơkâo hăng tơring čar, čang rơmang pơ anăp anai amăng tơring glông amra man pơdong sa anih logistic, ngă gêh gal brơi hơdôm boh sang anŏ ƀơi Mai Sơn hăng hơdôm tơring glông jum dar dưi pơkra pơjing, djă pioh hăng sĭ mơdrô gơnam đang hmua amuñ hloh”.

Sơn La hơmâo 856 boh anom bơwih ƀong sĭ mơdrô, anom bơwih ƀong hrŏm, sang anŏ hơmâo rơdêh pơdŭ pơgiăng gơnam, samơ̆ dŏ anet; hơmâo 6 anih anom mơng anom bruă dăng kông, mơ-it hyu gơnam tam. Đơ đam tơring čar phrâo hơmâo giăm 30 anih rơ-ơ̆, dưi pioh 250m³ sa anih; 2.500 anih amu krô boh troh, hăng dưm amu 60.000 tơ̆n boh troh amăng sa bơyan (lu hloh lĕ boh ƀro); 12 boh rơdêh container kơthung rơ-ơ̆, aka ƀu hơmâo anih pơkra gơnam tam, pơhlôm brơi kơ bruă dưm gơnam amăng adung, sĭ pơ tač rơngiao.

Hơdôm anŏ kơƀah hăng tơnap tao mơng bơwih ƀong tui logistic amăng ngă hmua jing ngă gun găn kơ bruă ba sĭ mơdrô gơnam đang hmua. Tui ƀing rơgơi kơhnâo, Sơn La kiăng ngă tui lu hơdră bruă kiăng hrŏ ƀiă prăk kak lơ̆m bơwih ƀong tui logistic, pok pơhai hơdôm hơdră bruă kiăng pơhưč tuh pơ alin man pơkra anih anom logistic. Ơi Trần Thanh Hải, kơ-iăng khua anom bruă sĭ mơdrô pơ tač rơngai, Ding jum sĭ mơdrô brơi thâo:

“Ră anai, jơlan glông pơkuh nao rai hăng hơdôm kual amăng tơring čar Sơn La dŏ aset, aka ƀu dưi pơgiăng hyu gơnam tui jơlan ia rơsĭ, ia krông, hăng rơdêh por. Yua anun, bruă tuh pơ alin man pơkra jơlan rơdêh đuăi hmar Hòa Bình - Mộc Châu kah hăng pok prong jơlan plơi prong lĕ tơlơi kiăng hloh tơdah kiăng pơkuh nai rai hơdôm kual. Hrŏm hăng anun, hăng hơdôm gơnam đang hmua kiăng djă pioh lui sui, Sơn La kiăng hơmâo hơdră pơhưč anom bruă tuh pơ alin man pơdong hơdôm anih rơ-ơ̆ hăng anih pơkra gơnam đang hmua”.

Yă Phạm Thị Doan, Khua gơnong bruă sĭ mơdrô tơring čar Sơn La brơi thâo, kiăng pok pơhai ngă hmua hơđong kjăp, tơring čar Sơn La pơsit logistic lĕ bruă pơlir hơbit yôm phăn amăng pơtrut kơtang sĭ mơdrô gơnam đang hmua hăng gơnam tam.

“Gơnong bruă sĭ mơdrô amra hrŏm hăng hơdôm gơnong bruă, anom bruă pơphrô bruă brơi kơ tơring čar kơ akŏ bruă man pơkra anih anom pơđĭ kyar logistic kơ jơlan glông, anih djă pioh gơnam, sit biă ñu lĕ mơnuih mă bruă amăng logistic, hơdră pơhưč tuh pơ alin amăng bruă anai”.

Hrŏm hăng bruă pok pơhai ha amăng plĕ hơdôm hơdră bruă mơng djop gưl, gơnong bruă, rĭm anom bơwih ƀong sĭ mơdrô, anom bơwih ƀong hrŏm, mơnuih ngă hmua ƀơi Sơn La ăt kiăng pơplih tơlơi pơmĭn, hơmâo gơnam hiam hơdjă, pơplih bơwih ƀong tui tơlơi pơkă, đĭ tui nua, bơkơtưn kơtang mơng gơnam đang hmua Sơn La.