“Tô̆ tui đing nao, pơtrut kơtang hloh dong bruă pôr pơhing, lăi pơhưč kơphê Việt Nam truh mơnuih blơi yua amăng lŏn ia hăng dêh čar tač rơngiao”. Anai lĕ sa amăng hơdôm bruă jao hmâo Khul kơphê pơkra phara lăi rơđah amăng Tơlơi pơtrun pơsit Jơnum Khul kơphê phara tal 2, rơwang bruă 2024-2029 pơphun lơm lơ 2/8, ƀơi plơi prong Buôn Ma Thuột, tơring čar Dak Lak.

Khul kơphê phara (gah Khul kơphê Buôn Ma Thuột, tơring čar Dak Lak) akô̆ pơjing thun 2019. Tơdơi kơ 5 thun pơjing hăng pơđĭ kyar, truh ră anai Khul hmâo laih rơbêh kơ 80 čô mơnuih ƀơi hơdôm kual pla pơkra kơphê phun amăng đơ đam dêh čar (anun lĕ: Dak Lak, Dak Nông, Lâm Đồng, Gia Lai, Kon Tum, Sơn La, Quảng Trị, Nghệ An...). Amăng mông jơnum, ƀing khua pơ ala hmâo gum pơhiăp pioh pơdŏng khul pơđĭ kyar hloh dong amăng rơwang bruă phrâo, lăi rơđah pơđĭ dong bruă tô nao rai kơplah wah ding kơna, glông tô ngă pơhưč hơdôm anih hna, sĭ, pơlir hơbit anih anom sĭ mơdrô hăng hơdôm anom blơi sĭ pioh pơlir nao rai kơjăp phik. Pơđĭ dlông bôh thâo pla pơkra kơphê phara ha jăn, pơhrăm, mă yua bôh than măi mok phrâo, pla pơkra kơphê phara nao hrŏm hăng hơdôm tơhnal pơkă pla pơkra kơjăp sui thun./.