Truh ră anai, rơbêh kơ 2.000 ektar đang hmua ƀơi Dak Lak kơƀah ia pruih pơđoh. Amăng anun, hmâo rơbêh kơ 1.300 ektar đang kơphê, 680 ektar hmua pơdai hăng 36 ektar đang phun pla pơkon. Tơlơi pơkă lăng hlâo pơ̆ anăp anai, amra hmâo mơ̆ng 5.000-8.000 ektar đang hmua amra kơƀah ia, kơƀah ia tơdah pơ-iă hang dô̆ sui.

Ƀơi anăp tơlơi anai, Gơnong bruă đang hmua hăng pơđĭ kyar ƀôn lan tơring čar Dak Lak hrŏm hăng hơdôm bôh anom wai lăng ring bruă ia yua gum hrŏm hăng hơdôm tơring glông, plơi prong tañ pok pơhai hơdôm jơlan gah pơsir pioh plai ƀiă răm rai kơ đang hmua. Ơi Trịnh Quốc Bảo, Kơ-iăng Khua Sang bruă bơwih ƀong mơnuih ƀôn sang sa ding kơna Wai lăng ring bruă ia yua Dak Lak brơi thâo, truh ră anai, amăng mrô lŏn ngă đang hmua mơ̆ sang bruă pioh pruih hmâo rơbêh kơ 1.380 ektar kơƀah ia, amăng anun hmâo dưi pơgang ba laih rơbêh kơ 790 ektar, lŏn dô̆ glăi glăk dưm măi bô̆p ia klă mă yua ia dô̆ glăi ƀơi hơdôm bôh dơnao ia pruih pơđoh kơ đang hmua./.