Sa rơwang hrơi tơjuh hăng anai, rơkơi bơnai bơn Võ Văn Cao, dŏ ƀơi grup 10, plơi Bồng Lai, să Hiệp Thạnh, tơring glông Đức Trọng, tơring čar Lâm Đồng pit ƀu hơđong, dong ƀu mơak ôh, đuăi hyu sư̆ rơbư̆ ĕp mơnuih glăi pơjrao brơi kơ pŭ rơmô brung djet ia tơsâo sang anŏ gơñu. Rơngiao kơ 4 drơi rơmô ania hlăk mơkian dŏ găng añrăng, abih bang 96 drơi rơmô brung ñu dŏ glăi lêng kơ dju hăng pơ-ai soh, ruă kian eh drah, amăng anun 2 drơi djai laih. Ơi Võ Văn Cao brơi thâo mrô rơmô ñu ruă lêng kơ hơmâo tlâ̆o ia jrao vaccine pơgang tơlơi ruă bơbrah bil bul ƀơi klĭ soh hlâo kơ anun:

“Kâo tlâ̆o ia jrao vaccine pơgang kơ abih 96 drơi, dŏ 4 drơi đôč ƀiă tuh laih anun kâo ƀu hơmâo tlâ̆o pơgang. Ră anai, 10 drơi ruă kian, 2 drơi djai laih. Hơdôm drơi dŏ glăi pơ-ai buai ƀu gưt ƀong rơ̆k ôh, hơdôm drơi pơkŏn sư̆ rơbư̆ ngê ngô….kâo hlăk bơngơ̆t biă mă kah hăng dŏ amăng krah apui mơtam. Rim hrơi kâo pơčem ia jrao kơ pŭ rơmô, anet prong hai brơi ƀong ia jrao pơgang soh. Ia jrao kâo blơi mă gah rơngiao đôč, bơ ia jrao ƀơk lĕ kiah hơmâo phrâo anai đôč, samơ̆ kơnong ia jrao C-gluco soh đôč”.

Sang anŏ yă Huỳnh Thị Kim Phượng, dŏ ƀơi plơi Lạc Nghiệp, să Tu Tra, tơring glông Đơn Dương ăt hơmâo 76 drơi rơmô brung ruă, 2 drơi djai laih. Tơlơi anai hơmâo tơdơi kơ hơdôm hrơi pŭ rơmô hơmâo tlâ̆o ia jrao vaccine pơgang klin ngă kơđông drah ƀơi klĭ bơbrah đĭ bil bul. Laih ƀuh pŭ rơmô ƀu găng añrăng ôh, sang anŏ hơmâo nao ia ƀing nai pơjrao hlô mơnong nao ĕp lăng, tlâ̆o jur ia srôm, pơjrao samơ̆ ƀu pơblih ôh.

“Lơ̆m tlâ̆o giong vaccine rơmô hlong ngê ngô, sư̆ rơbư̆ mwotam yơh, abih bang hlong ruă soh. Hơmâo drơi đa eh drah, đơ đa eh jŭ ƀlĭk kah hăng ia hlŭ, 2 drơi djai laih. Amăng plơi gơmơi hơmâo hơdôm hơpluh sang anŏ djơh hăng anun, samơ̆ 8 boh sang anŏ huăi hơmâo pŭ rơmô tlâ̆o ia jrao vaccine pơgang. 8 boh sang anŏ anai, rơmô gơñu huăi hơgĕt ôh, hơdôm sang anŏ brơi tlâ̆o pơgang anun lêng kơ rơmô ruă djơh hăng anai soh”.

Vaccine pơhlôm tơlơi ruă, pơgang klin ngă kơđông drah ƀơi klĭ arăng brơi tlâ̆o pơgang kơ pŭ rơmô mơnuih ƀôn sang ƀơi dua boh tơring glông Đơn Dương hăng Đức Trọng, yua kông ty pơčruh ngă ia jrao pơjrao hlô mơnong dêh čar anăn NAVETCO hơmâo sang bruă ƀơi tơring čar Bình Dương pô pơkra hăng djơ̆ anăn ba sĭ. Bruă tlâ̆o ia jrao hơmâo pok pơhai ngă tui mơ̆ng lơ 22-31/7/2024, abih bang 10.000 arăt ia jrao tlâ̆o pơgang. Lơ̆m ƀuh hơmâo tơlơi ngă kơ rơmô brung ruă hăng djai, tơring čar Lâm Đồng brơi pơdơi mơtam jăng jai tlâ̆o pơgang vaccine anun.

Tui hăng ơi Nguyễn Văn Long, Khua anom bruă pơjrao hlô mơnong, lơ̆m hmư̆ hing rơmô brung ƀơi Lâm Đồng ruă hăng djai, tlam lơ 7/8, khua mua Ding jum bruă hmua hăng Pơđĭ kyar plơi pla git gai brơi akŏ pơjing grup khua mua nao ĕp lăng, pok pơhai hơdră pơhlôm, pơgang tơlơi ruă kơ rơmô.

“Ƀing gơmơi hơmâo pơtum lu anih ngă bruă pơčrang kman klă hloh mơ̆ng anom bruă pơjrao hlô mơnong Việt Nam, ƀing mơnuih rơgơi kơhnâo brơi mă drah, čơđeh asar kiăng ba pơčrang hăng pơtong lăng, sem yua hơgĕt ngă kơ rơmô ruă, truh djai ƀơi tơring čar Lâm Đồng. Ding jum Bruă hmua ăt git gai, pơtô brơi tum teč rơđah rơđong hơdră pơhlôm pơgang klin, hơdră wai lăng kiăng pơhrŏ ƀiă rơmô ruă hăng djai djơh hăng anun”.

Hrŏm hăng tơlơi djru mơ̆ng Ding jum Bruă hmua hăng Pơđĭ kyar plơi pla, tơring čar Lâm Đồng hơmâo pơtum abih bang djop bruă mă kiăng pơjrao kơ pŭ rơmô brung hlăk ruă kiăng mơnuih ngă hmua čem rông rơmô plai ƀiă răm ƀăm soh sel. Khă tui anun mrô rơmô ruă hăng djai jai hrơi lu. Truh abih lơ 10/8, tơring čar Lâm Đồng hơmâo4.495 drơi rơmô ruă hăng 193 drơi rơmô djai, đĭ tui giăm 600 drơi rơmô ruă dơ̆ng hăng 21 drơi rơmô djai pơkă hăng sa hrơi hlâo kơ anun. Laih dơ̆ng hăng bruă mă pơhlôm pơgang klin, djop anom bruă kơnuk kơna hlăk pơtong lăng tong ten kiăng thâo yua mơ̆ng pơpă ngă kơ pŭ rơmô brung djet ia tơsâo ƀơi tơring čar Lâm Đồng ruă hăng djai rơrŭ tui anun.