VOV4.Jarai - Hăng bruă ƀing hlăk ai hăng čơđai sang hră pơgôp 1.000 prăk rĭm thun kiăng kơ pơčruih amăng keh prăk man pơdong sang brơi mơnuih ƀun rin, giăm 8 thun laih rơgao, hơdôm pluh boh sang anŏ čơđai sang hră ƀun rin ƀơi tơring glông Krông Pač, tơring čar Daklak hơmâo arăng man pơdong brơi sang dŏ. Hơdôm boh sang anai man pơdong mă mơng keh prăk ha thun pơčruih 1.000 mơng anun pơtrut pơsur ƀing čơđai hăng sang anŏ gơñu hơmâo pran đăo gơnang, gir run hrưn đĭ amăng hrăm hră kah hăng amăng tơlơi hơdip mơda.

Amăng pơ-iă kơtang yang hrơi dong, ayong Y Đút Êban, dŏ ƀơi plơi Kplang, să Tân Tiến, tơring glông Krông Pač, tơring čar Daklak glăk dŏ kor lŏn ƀơi rang sang. Ayong Y Đút brơi thâo, kiăng tañ pơgiong yua kơ kơñ pơgi arăng man pơkra anŏ pơkŏn dong. Hơdôm thun giăm anai, dua rơkơi bơnai ñu hyu mă bruă apah pơ ataih, sui sui kah mơng glăi, 3 čô ană brơi ơi yă ñu čem rông ba. Sang hơđăp dua rơkơi bơnai ñu lĕ sang tơ̆i rơhaih giăm 10 met karê, prăng hăng bơbung păng mă hăng tôl sô soh hŭi kơ hơjan hlim.

Sang anŏ Y Đút (ao carô) hok mơ-ak amăng hrơi pơphun man pơdong sang

Akŏ thun anai, ană đah rơkơi Y Đút lĕ amon Y Duy Niê ( hrăm anih 4D, sang hră gưl sa Ngô Gia Tự) hơmâo Khul hlăk ai mut phung tơring glông Krông Pač djru brơi 25 klăk prăk pioh man pơdong sang, laih dong hơmâo hơdôm anom bruă pơkŏn djru brơi 40 klăk prăk. Sang gơñu phrâo man pơdong mơng akŏ blan 3 anai, sang anŏ ayong Y Đút hok mơ-ak biă mă:

Tơlơi hơdip bơwih ƀong huă amăng sang anŏ tơnap tap biă mă, kơnong hyu mă bruă apah kiăng kơ hơmâo prăk čem rông ană bă yua anun sang tơ̆i mơn yua kơ ƀu dưi hyu čan prăk pioh man pơdong phrâo. Ră anai hơmâo arăng djru brơi prăk man pơdong sang sang anŏ gơmơi hok mơ-ak biă mă. Hơmâo sang dŏ sang anŏ gơmơi amra gir run pơđĭ kyar tơlơi bơwih ƀong huă laih dong blơi gơnam tam yua amăng sang anŏ.

 Hlâo anun, ăt ƀơi să Tân Tiến, tơring glông Krông Pač mơn, hơmâo laih 2 boh sang arăng man pơdong brơi mơnuih ƀun rin. Yă Mai Thị Phương, sa amăng dua boh sang anŏ hơmâo arăng djru man pơdong brơi sang brơi thâo: sang anŏ ñu đang hmua ƀiă đôč, ñu juăt hyu duñ get kơsu kiăng kơ sĭ hơmâo prăk čem rông 3 čô ană glăk amăng thun prong hăng nao sang hră, tơlơi bơwih ƀong huă tơnap tap biă mă. Lơ̆m hơmâo arăng djru brơi 25 klăk prăk, dua rơkơi bơnai ñu hơmâo čan dong kiăng kơ djop prăk man pơdong sang phrâo. Ƀing hlăk ai hăng kơnung djuai adơi ayong djru pran mă bruă yua anun kơnong amăng rơbêh 1 blan, sang dưi man pơkra giong laih. Yă Mai Thị Phương brơi thâo:

Ayong Y Đút kor lŏn amăng yang hrơi dong mơtăm

Mrô prăk anai hăng sang anŏ pơkŏn lăng aset samơ̆ lu biă mă hăng sang anŏ gơmơi, yua kơ hơmâo pran khăp kah mơng djru brơi sang anŏ gơmơi anai lĕ tơlơi yôm biă mă. Dong mơng hrơi man pơdong giong sang phrâo kâo hok mơ-ak biă mă, ră anai tơlơi hơdip plai ƀiă tơnap, hnưh čan pioh pơjrao lơ̆m dju djuam duăm ruă hăng man pơdong sang hơmâo tla hĭ abih.

Hơdôm boh sang gum pơgôp anai hơmâo man pơdong mơng keh prăk amăng jơlan hơdră “Sang khăp pap - Sang pơčruih mơng 1.000 prăk” yua Khul hlăk ai mut phung tơring glông Krông Pač pơphun mơng thun 2013. Tui anun, rĭm thun, Khul hlăk ai mut phung hơmâo pơsur pơgôp mơng ƀing ding kơna, hlăk ai čơđai anet amăng tơring glông, rĭm čô mơnuih mơng 2.000 prăk kiăng kơ djru man pơdong 2 boh sang brơi sang anŏ tui hơdră Kơnuk kơna djru ba, sang anŏ tơnap tap (dưm dưm rĭm čô mơnuih pơgôp mơng 1.000 prăk djru man pơdong sa boh sang). Hrŏm hăng prăk djru, gum man pơkra, mơng anun tañ amăng man pơdong lăp djơ̆ hăng tơlơi kiăng. Ayong Võ Quốc Việt, Khua git gai khul hlăk ai să Tân Tiến, tơring glông Krông Pač brơi thâo bruă mă mơng ƀing hlăk ai amăng să:

Rĭm thun lêng kơ hơmâo jơlan hơdră man pơdong sang khăp pap mă mơng keh prăk pơčruh 1.000 lơ̆m ngă tui hră pơtrun mơng Khul hlăi ai tơring glông ƀing gơmơi hơmâo pok pơhai tơl grup hlăk ai amăng plơi pla hăng hyu pel ĕp amăng djop plơi pla hăng lơ̆m man pơdong sang bruă ruh sang, djru man pơkra rang sang hơmâo Khul hlăk ai gum brơi. Djop anom bruă kiăng kơ gum hrŏm kiăng pơhrŏ trun mrô sang anŏ ƀun rin mơng anun tañ ngă tơlơi hơdip hơđong pơđĭ kyar bơwih ƀong huă.

Truh ră anai, jơlan hơdră man pơdong sang 1.000 prăk ƀơi tơring glông Krông Pač hơmâo djru man pơdong brơi 12 boh sang anŏ ƀun rin. Ayong Nguyễn Văn Hà, Khua git gai Khul hlăk ai mut phung tơring glông Krông Pač brơi thâo, hrŏm hăng prăk djru 25 klăk prăk mơng keh prăk pơgôp, djop khul grup ăt jak iâu gum pơgôp mơng ƀing mơnuih čơmah kiăng kơ dưi man pơdong sang hăng nua mơng 50 klăk prăk pơ dlông, pơjing hơdră pơkrem tŭ yua hloh. Jơlan hơdră hơmâo ba glăi tơlơi dưi sit nik, ƀu djơ̆ kơnong djru brơi sang dŏ mơng anun hơđong tơlơi hơdip, hrưn đĭ pơklaih mơng ƀun rin đôč ôh mơ̆ ăt kiăng pơtrut pran thâo gum pơgôp mơng ƀing hlăk ai hăng čơđai sang hră.

Neh Mai Thị Phương ƀơi anăp sang arăng djru man pơdong brơi mơng thun 2016

Boh tŭ yua ƀu djơ̆ kơnong man pơdong sang dŏ đôč ôh mơ̆ ăt kiăng pơtrut pran thâo gum pơgôp mơng ƀing hlăk ai čơđai anet mơng pơkrem prăk, khăp pap tơdruă, djru brơi mơnuih mơnam. Sit biă ñu brơi ƀuh lu sang anŏ, biă mă ñu lĕ ƀing sang anŏ čơđai dưi tŭ mă tơlơi gum djru tui jơlan hơdră anai hơmâo pơtrut pran gir run, hrưn đĭ amăng hrăm hră hăng sang anŏ ăt jai hrơi jơnap tui mơng anun djru hrŏm bruă amăng plơi pla. Bruă mă yôm phăn anai ăt hơmâo ană plơi pla gum tơngan hrŏm.

Mơng kơnong 1.000 prăk pơgôp rĭm thun, mrô prăk ăt ƀu lu ôh samơ̆ hơmâo tơlơi gum pơgôp mơng ƀing hlăk ai čơđai anet, jai hrơi hơmâo lu dong sang dŏ brơi mơnuih ƀun rin ƀơi Krông Pač. Bruă mă mơng Khul hlăk ai tơring glông Krông Pač hơmâo pơgôp ngă lar hyu pran thâo djru tơdruă, gum pơgôp amăng hlăk ai čơđai anet, pơtô brơi ƀing čơđai thâo gru grua hiam klă “Gum djru brơi mơnuih ƀun rin” amăng dêh čar ta.

Siu Đoan: Pơblang