Hrơi mông hơdôm sang anŏ dŏ ƀơi anih ia lip kơtang Hòa Thịnh, tơring čar Dak Lak ngă yang pơtâo akan, ngă yang sang apui tui tơlơi phiăn juăt pia ngă yang ơi Táo glăi pơ adai adih, abih yơh ha thun Ất Tỵ rơgao pơ klôn, lăng hyu ăt đik dăk lu bruă ngă tui jơlan hơdră “Bơyan phang tơhan kual 5 gum pơgôp bă blai tơlơi khăp ling tơhan hăng ană plơi”.

Amăng lan sang anih pra yang djă pioh gru hơkrŭ đưm gưl dêh čar Hòa Thịnh, mơnuih ƀôn sang, ƀing khua mua, ling tơhan lir hơbit pơphun pơtum ngă hrŏm anung ƀañ tek; ngui ngor hrŏm pơplông pơrơguăt drơi jăn, adoh suang tlam mơmŏt. Ƀing čơđai muai, tơdăm ngek dra muai, mơnuih prong hai hơmâo ƀing tơhan djru čơkăp brơi ƀŭ ƀu mă prăk ôh. Ƀing neh wa đah kơmơi hrơi, adơi amai ok or nao blơi gơnam 0 prăk, kiăng lăi tŭ mă gơnam djru ba soh sel. Ơi Phạm Văn Mạnh, mơnuih ƀôn sang să Hòa Thịnh, hơ̆k mơak lăi:

“Blung hlâo kâo bơni kơ khua mua ping gah, tơlơi djru ba mơ̆ng ling tơhan. Tal ia ling dăo phrâo laih rơgao hơmâo tơlơi djru lu lin yơh ia mơñum, braih huă mơnong ƀong. Djop puih kơđông tơhan, djop khul grup sang bruă ăt đing nao djru ba asơi añăm, braih huă, ƀuh mơak pơđao pran jua biă mă, sang dŏ hơmâo djru ming pơkra man pơdong glăi kơjăp”.

Hòa Thịnh lĕ anih ia lip kơtang biă mă amăng tal ia ling dăo blan 11/2025. Amăng mông tơnap tap hloh, ia lip sang tơl bơbung ƀu hơmâo anih dŏ, lăng hyu jum dar tơbung kơ ia soh, ia tơluh uk u rô kơtang kor ba abih dram gơnam, hơmâo ƀing ling tơhan  hmao kru ƀuh ƀô̆ mơta djru ba ană plơi pơsir tơlơi tơnap tap ječ ameč kơ ană plơi pla, ƀing khua mua ping gah, gong gai kơnuk kơna plơi pla jĕ giăm mơnuih ƀôn sang djru ba pơklaih brơi ƀing dŏ ƀơi anih hŭi rơhyưt hloh hăng rŭ pơdong glăi pưk sang đang hmua tơdơi kơ ia lip hrŏ trun, akŏ pơdong glăi tơlơi hơdip mơda kơ mơnuih ƀôn sang. Tơdơi kơ jơan hơdră anăn “Bruă mă Quang Trung” tŭ yua truh kih să Hòa Thịnh, rup rap ƀing tơhan Wa Hô kơđŏm glăi tong ten amăng pran jua  mơnuih ƀôn sang hăng tơlơi đăo kơnang kơjăp. Đại tad Đinh Văn Hưng, khua gum bruă ping gah sang bruă khua tơhan tơring čar Dak Lak lăi pơtong, Jơlan hơdră “Bơyan bơnga ling tơhan kual 5 gum pơgôp-bă blai tơlơi khăp ling tơhan hăng ană plơi pla” tal anai sa wơ̆t dơ̆ng ƀuh rơđah tơlơi khăp tong ten plah wah ling tơhan hăng mơnuih ƀôn sang dưi kơjăp hloh:

“Kơnang kơ jơlan hơdră anai, ƀing ta ƀuh sa tơlơi rơđah hloh man pơdong atur bruă ngă gah ling tơhan khom hrŏm abih bang ană plơi pla, tơlơi rơnuk rơnua hơđong kơ mơnuih ƀôn sang ƀu kơnong hăng tơdron blah ôh, ling tơhan blah ngă blung hlâo hăng tơlơi gum pơgôp tong ten lir hơbit sa pran jua plah wah ling tơhan hăng mơnuih ƀôn sang. Lơ̆m pran jua ană plơi hơđong laih, mơnuih ƀôn san đăo kơnang kơjăp anun jing atur kơjăp mơ̆n kơ bruă ngă hơđong hăng pơđĭ kyar kơtang mơ̆ng djuai ania”.

Tui hăng ơi Phương Văn Lành, Khua git gai ping gah să Hòa Thịnh, mơ̆ng tal kơthel ngă truh pơ hrơi dik dăk akŏ pơdong glăi pưk sang đang hmua hăng anăn ‘Bruă mă Quang Trung”, trruh mông anai, Hòa Thịnh ăt tŭ mă lu tơlơi djru ba wơ̆t gơnam tam kông ngăn hăng pran jua Ping gah laih anun kơnuk kơna lăng ba, djop anom bruă kơđi čar, khul mơnuih mơnam, khul ling tơhan blah ngă, djop sang bruă djru ba tơlơi khăp pap hăng hlăk tañ hmao kru djru juh alum, ngă mơak pran jua mơnuih ƀôn sang amăng kual răm ƀăm yua lŏn adai truh. Jơlan hơdră Bơyan phang tơhan kual 5 gum pơgôp tal anai, sa wơ̆t dơ̆ng pơđĭ pran jua ană plơi gong gai kơnuk kơna amăng să amăng bruă ngă tui truh kih djop bruă jao amăng thun 2026.

“Hrŏm hăng djop gưl anom bruă ping gah, gong gai kơnuk kơna, ling tơhan blah ngă hơmâo pơtum djru ba mơnuih ƀôn sang. Biă mă ñu hrơi anai, hơmâo ling tơhan kual 5 gum pơgôp-têt bă blai tơlơi khăp ling tơhan hăng mơnuih ƀôn sang rai djru mơak hrŏm mơnuih ƀôn sang să Hòa Thịnh, anai lĕ mông mơnit yom biă mă gum tơngan hrŏm hăng ană plơi pla gir rŭ pơdong glăi tơlơi tơnap tap, kiăng mơnuih ƀôn sang kơjăp pran jua đăo kơnang hơ̆k mơak hơmâo Têt trơi pơđao, hyuk hyak hloh”.

Rim čô mơnuih ƀôn sang să Hòa Thịnh pơ-ư ang biă mă hăng gru grua ngă hơkrŭ đưm, hơmâo ba glăi kơ Hòa Thịnh mơ̆ng hơdôm thun 60 rơnuk thun hlâo adih, ră anai ăt khin hơtai bong kơtang hăng tơlơi tơnap tap truh lŏn adai ngă. Têt anai mơnuih ƀôn sang kual ia ling dăo hơmâo sa bơyan têt trơi pơđao bă blai tơlơi khăp ling tơhan hăng ană plơi yua hơmâo gum hrŏm djop plơi pla ala ƀôn. Tơlơi hơdip phrâo hlăk ƀuh bơplih rơđah, hơmâo bra hyu truh pơ djop sang, djop anih. Sa bơyan phang akŏ thun phrâo glăk glăi pơ djop plơi pla sang anŏ gŏ awă, kiăng ngă mơak pran jua mơnuih ƀôn sang Hòa Thịnh ră anai.