Amăng sang phrâo man pơdong prong 80 met karê ƀơi ƀon Bu Boong, să Tuy Đức, tơring čar Lâm Đồng, amai Thị Duyên, djuai ania M’nông, hrŏm hăng rơkơi hăng dua čô ană glăk rơmet prap čơkă thun phrâo. Sang phrâo sir kjăp hơmâo man pơdong tui jơlan hơdră ruh pơkra glăi sang dŏ tơ̆i phŏ, hơmâo pơgiong giăm ha mơkrah thun, anai lĕ tơlơi hok mơ-ak prong biă mă mơng sang anŏ ñu. Hơmâo sang phrâo, đang pla kơphê prap pĕ tal blung a, hơmâo braih hăng mơnong ƀong huă amăng bơyan ƀong tê̆t yua ling tơhan djru brơi, bơyan bơnga thun anai hăng sang anŏ amai Thị Duyên hơmâo lu tơlơi hok mơ-ak:

“Sang anŏ gơmơi hơmâo Kơnuk kơna djru brơi 90 klăk prăk man pơdong sang mơng jơlan hơdră ruh pơkra sang tơ̆i phŏ, mut dŏ sang phrâo rơbêh 3 blan laih, sang anŏ hok mơ-ak biă mă. Hơmâo sang dŏ hơđong, ƀing gơmơi gir run bơwih ƀong huă, čem rông ană bă hrăm hră truh anih. Tê̆t anai ăt hơmâo Quân khu 7 đing nao, djru prăk hăng mơnong ƀong huă, yua anun sang anŏ ăt yua ha bơnah kiăng blơi mơnong ƀong huă, blơi sum ao phrâo brơi ană bă čơkă thun phrâo Bính Ngọ. Sang anŏ gơmơi bơni biă mă kơ Ping gah, kơnuk kơna.”

Kar kăi ƀơi Tuy Đức, tơlơi hok mơ-ak čơkă thun phrâo ăt lar hyu tơl hơdôm boh sang anŏ tơnap tap rôk tui jơlan guai amăng tơring čar Lâm Đồng. Ƀơi plơi Bình Minh, să Đắk Wil, yă Lữ Thị Đan, djuai ania Thái, hajăn ñu rông ană tơdơi kơ rơkơi ñu rơngiă. Tong krah thun hlâo, mơng jơlan hơdră djru brơi tơlơi bơwih ƀong huă, ñu hơmâo arăng djru brơi 250 drơi mơnŭ hrŏm hăng lu gơnam čem rông laih dong hơmâo ƀing apăn bruă să črâo brơi bruă pơkra drông war. Giăm tết, hơdôm drơi mơnŭ blung a ba sĭ mơdrô ba glăi prăk pơhrui kơ sang anŏ. Hơdôm hrơi giăm tê̆t, 30 kĭ braih djru mơng Kơnuk kơna hrŏm hăng ƀañ tek, mơnong ƀong huă yua ling tơhan djru brơi dua amĭ ană kiăng plai ƀiă tơnap tap. Yă Lữ Thị Đan, brơi thâo:

“Hơmâo braih djru mơng Kơnuk kơna, gơnam tê̆t mơng ling tơhan, dua amĭ ană hok mơ-ak biă mă, bơni kơ Ping gah hăng Kơnuk kơna. Tê̆t anai dua amĭ ană hơmâo djop mơnong ƀong huă laih. Thun phrâo Bính Ngọ, tơdah dưi, čang rơmang Ping gah, Kơnuk kơna đing nao kiăng dua amĭ ană plai ƀiă tơnap tap”.

Tơlơi hok mơ-ak glăk ƀuh ƀơi kual giăm guai Lâm Đồng, anai lĕ boh than ba glăi mơng tơlơi gum hrŏm mơng djop anih anom kơđi čar. Rĭm thun, Quân khu 7 gum hrŏm hăng gong gai hơdôm boh ƀon lan pơphun jơlan hơdră “Bơyan bơnga ling tơhan”. Ƀơi Lâm Đồng, jơlan hơdră thun anai hơmâo pok pơhai ha amăng plĕ ƀơi 5 boh să giăm guai hơmâo Tuy Đức, Đắk Wil, Thuận An, Thuận Hạnh hăng Quảng Trực. Hrŏm hăng bruă man pơdong hơdôm boh plơi pla pơlir hăng puih kơđong tơhan-mơnuih ƀôn sang ƀơi să Quảng Trực, jơlan hơdră hơmâo jao rơbêh 2.600 anung gơnam nua ñu giăm 5 klai prăk brơi ling tơhan hăng mơnuih ƀôn sang kual giăm guai. Hơdôm rơbâo ƀañ tek hơmâo klon brơi hơdôm boh sang anŏ ƀun rin, giăm ƀun rin; lu tal nao khăm, ƀơk jrao hơmâo pơphun; jơnum sang čơ “0 prăk" djru brơi neh met wa blơi gơnam tê̆t. Đại tá Nguyễn Văn Sơn, Khua anom bruă git gai ling tơhan tơring čar Lâm Đồng brơi thâo:

“Hluai tui hơdôm bruă mă mơng Jơlan hơdră “Bơyan bơnga ling tơhan” thun anai hơmâo ba glăi tơlơi yôm prong hloh, pơdah pran gum pơgôp kơplah wah ling tơhan hăng mơnuih ƀôn sang. Mơng anun ba glăi “pran đăo gơnang mơng mơnuih ƀôn sang” jai hrơi jai hơkrŭ kjăp, pơhlôm wai pơgang kjăp ƀiă dong kual giăm guai amăng tơring čar Lâm Đồng.”

Tơdơi kơ pơmut hrŏm mơng hơdôm boh tơring čar Dak Nông, Lâm Đồng hăng Bình Thuận, tơring čar Lâm Đồng phrâo prong giăm 24.300 km karê, prong hloh đơ đam dêh čar, hơmâo jơlan guai hăng rŏng lŏn, hơmâo wŏt jơlan guai ƀơi kual ia rơsĭ. Kơnong jơlan guai hăng rŏng lŏn glông rơbêh 142 km, hăng 5 boh să, giăm 100 rơbâo čô mơnuih dŏ hơdip hrŏm, giăm ha mơkrah mrô mơnuih lĕ djuai ania ƀiă. Mah phrâo pơmut hrŏm anih anom, tơring čar ăt tŏ tui ngă tŭ yua hơdôm jơlan hơdră pơhrŏ trun ƀun rin djop mơta, đing nao kual tơnap tap hloh. Ƀrô bơyan ƀong tê̆t Bính Ngọ, tơring čar hơmâo jao 1.600 anung gơnam, nua ñu 1,6 klai prăk brơi hơdôm boh sang anŏ tơnap tap kual giăm guai. Yă H’Vy Êban, kơ-iăng khua Jơnum min djop djuai ania mơnuih mơnam Việt Nam tơring čar Lâm Đông brơi thâo:

“Mơng jơlan hơdră anai, neh met wa hơmâo dong tơlơi gal čơkă thun phrâo pơđao pran jua hăng djop gơnam yua. Anai ăt lĕ bruă mă sit nik, ba glăi tŭ yua, pơgôp ngă tui tơlơi črâo trun mơng Ping gah, Kơnuk kơna hăng pran jua “Anăm brơi hlơi dŏ glăi gah tlôn”.

Mơng hơdôm boh sang sir kjăp plih hĭ hơdôm sang tơ̆i phŏ, hơdôm hơbô̆ bruă djru bơwih ƀong glăk ba glăi boh tŭ yua, truh pơ hơdôm gơnam djru hơmâo jao djơ̆ hrơi mông, tơlơi hơdip kơ mơnuih ƀôn sang kual giăm guai tơring čar Lâm Đồng glăk ƀơƀrư̆ hrưn đĭ. Bơyan bơnga giăm guai ƀu djơ̆ kơnong lĕ bơyan bơnga bluh hiam hlip hlap, ƀañ tek mơtah đôč ôh mơ̆ ăt lĕ pran đăo gơnang hơmâo hơkrŭ, anai lĕ pran gum pơgôp djop djuai ania tŏ tui hơkrŭ, pơjing kjăp pran đăo gơnang mơng mơnuih ƀôn sang, wai pơgang kjăp lŏn ia hăng hơđong ƀơi guai lŏn ia./.