Ƀu lăi pơhmư̆ hlâo ôh samơ̆ tơphă biă, hơdôm hrơi giăm či Tê̆t, hok mơak kơ Ping gah, čơkă bơyan bơnga truh, gơmơi nao pơ plơi Phú Hữu, să Hòa Thịnh, anih ia dăo kơtang gah Ngŏ tơring čar Dak Lăk krĕp hăng hrơi sang anŏ amai Lê Thị Kim Ngân hơmâo lu tuai nao ngui. Khua mua kông an tơring čar Đồng Nai, Khul đah kơmơi Kông an tơring čar Dak Lăk nao jao sang dŏ khăp pap kơ sang anŏ ñu. Amai Ngân mơak biă yua hơmâo gơnam yom amăng hrơi yom pơphăn anai: “Mơak biă mă yơh, ƀu thâo či lăi hiư̆m pă dong tah. Ƀing adơi ayong neh wa glăi pơ anai bơni hơ-ơč Tê̆t, kâo pơpŭ, bơni hơ-ơč kơ ayong amai adơi hiam drơi jăn pran jua hăng hyôk hyak yâo mơak hŏ”.

Nao hrŏm amăng hrơi jao sang, ơi Phương Văn Lành, Khua ping gah să Hòa Thịnh hok mơak lăi pơhmư̆, kru nam ƀu hiam mơ̆ng hrơi blan rơgao hơmâo lŏm tui ƀơ ƀrư̆ laih. Hòa Thịnh glăk amăng hrơi blan rŭ pơdong pơjing glăi laih: “Hrơi anai ayong amai adơi rai pơ anai ƀu ƀuh dong tah kru nam ia dăo, tơlơi hơdip pơ anai pơwơ̆t glăi tui hơđăp laih. Anun lĕ yua hơmâo tơlơi git gai črâo bruă mơ̆ng ping gah să, tơlơi ngă hrŏm mơ̆ng abih bang anom bruă kơđi čar, tơlơi gum tơngan mơ̆ng ƀing thâo čơmah juăt djru mơnuih tơnap tap kah mơ̆ng hơmâo djơ anai”.

Ataih mơ̆ng sang amai Ngân sa blah hmua jing Grup 13 plơi Phú Phong, anih ia dăo kơtang hloh, ăt anih Khua dêh čar ơi Phạm Minh Chính nao lăng hăng pơphun ngă bruă Quang Trung. Mơ̆ng anih bôr bar kơ lŏn čuah, pơtâo rơga, sang tơhlŏm, hrơi anai pơ anai hơmâo sang ƀong huă pơjưh thun sô tañ biă. Kah hăng ơi Trần Văn Khánh, ngui ngor ƀong huă pơjưh thun sô tañ biă. Truh tă anai, ñu hơmâo mông wan laih, prăp rơmet kơ hrơi Tê̆t hăng prăp lui tơlơi hơdip pơ anăp adih: “Ră anai lĕ pioh mông lăng hmua, pruai hơbâo, buč rok ƀơi nia, pruih ia jrao, pơtĕm pơdai hăng prăp rơmet phun bơnga či ngui tê̆t dong, giong ngă hiam glăi đang hmua laih. Mông anai sang anŏ gơmơi hơmâo lu biă bruă či ngă”.

Hơmâo anŏ ngă ta lăp hơdor biă, ơi Trần Văn Khánh hơmâo arăng iâu ñu lĕ Trần Quốc Khánh, 4 čô ană đah rơkơi ñu hơmâo pơ anăn lĕ Hòa, Hội, Nghĩa, Nam...tui hăng anăn čar ta “Cộng Hoà - Xã Hội - Chủ Nghĩa - Việt Nam”. 5 boh sang mơ̆ng 5 ama ană: Quốc Khánh- Cộng Hoà- Xã Hội Chủ Nghĩa- Việt Nam, hơmâo man pơdong phrâo mơ̆ng hơdră bruă Quang Trung, jing hrưn đĭ pơplih phrâo ƀơi hmua pơdai mơtah ƀlip. Tui hăng ayong Trần Chủ Nghĩa, bruă akŏ pơjing glăi mơ̆ng hơdră ngă bruă prong mơ̆ Khua dêh čar pơphun, ƀu kơnong ba glăi anih dŏ phrâo kjăp đôč ôh, ăt kiăng neh met wa akŏ pơjing glăi tơlơi hơdip, thâo hluh phuang amăng akŏ dlô hơdôm tơlơi pơtrun mơ̆ng ngŏ: “Ta dŏ rơngôt na nao lĕ ngă bruă ƀu jing ôh, tơlơi pơmin ta khŏm phuang, thâo hluh kah mơ̆ng dưi. Ƀu hluh lĕ ta djă get đong ăt kơtrâ̆o mơn. Ta mơak, thâo lăng nao pơ anăp, pran jua pơhưč kơ bruă kah mơ̆ng dưi ngă, ngă hơget truh soh, ngă huăi glêh đơi lơi”.

Amăng hơdôm hrơi hok mơak Ping gah, hok mơak bơyan bơnga, ayong Trần Chủ Nghĩa ngă lu bruă biă, ñu pơkra tôl pơging gah anăp sang ngă anih čơkă tuai, pioh rơdêh. Ayong Nghĩa ăt pơkra, tô thim 2 ƀĕ pơsơi amăng 2 gong war sang ñu či hlă hla kơ. Ñu lăi, bruă hlă hla kơ čar ta ƀơi sang dŏ phrâo či plơi pla phrâo rŭ pơdong tơdơi kơ kơthel ia dăo jing bruă yom biă: “Khŏm hlă 2 pok hla kơ čar ƀơi dua ƀĕ gong kiăng hiam. Ih lăng sang hơmâo hla kơ kah mơ̆ng hiam djơ̆ mơn? Laih dong gah adih lĕ sang ama kâo. Thun anai ñu 45 thun ping gah laih, kâo hai rơbêh ha pluh thun mut ping gah mơn”.

Amăng hrơi bơyan bơnga Bính Ngọ dik dak mơak Ping gah, mơak bơyan phang, hơdôm pok hla kơ por đơhet ƀơi anăp sang phrâo ƀu kơnong pơƀuh hrơi ƀong Tê̆t hơmâo hmăi trơi pơđao đôč ôh, ăt jing tơlơi pơsit brơi tơlơi kơtưn đĭ kiăng hơđong anih dŏ dong ƀong huă, akŏ pơjing tơlơi hơdip pơ anăp anai kjăp hloh đam kual lŏn ia dăo kơthel pưh nao./.