Tui hăng hră lăi pơthâo, bruă mă pơhlôm, pơgăn tơlơi soh sat, tơlơi ngă soh glăi tơlơi phiăn dêh čar ăt hlăk pơtum pơčrong sai tong ten;  bruă pơhlôm tơlơi sohsat dưi hơmâo ƀing pơ ala mơnuih ƀôn sang pok pơhai ngă tui ten. Hơdôm tơhnal pơkă mơ̆ng anom bruă khua pơ ala mơnuih ƀôn sang dêh čar jao lĕ hơmâo ngă giong laih, hơdôm tơhnal pơkă ngă rơgao anŏ pơkă. Tui hăng tơlơi lăi pơthâo mơ̆ng kơnuk kơna kơ bruă ngă tui kơđi laih phat, kơđi mơnuih ƀôn sang, thun 2024 hơmâo mrô kơđi dưi ngă giong hăng mrô prăk pơhrui glăi lu hloh mơ̆ng hlâo truh ră anai. Tơlơi pơhing mơnuih ƀôn sang nao pơ anih čơkă jum pơsir kơđi tơlơi mơnuih ƀôn sang ƀơi sang bruă gah anom bruă pơ ala mơnuih ƀôn sang dêh čar, grup khua mua pơ ala mơnuih ƀôn sang hrŏ trun samơ̆ mrô hră ƀom, hră tơgŭ kơđi, rơkâo đĭ, lăi pơthâo tơlơi soh mơ̆ng mơnuih ƀôn sang mơ-it nao kơ sang bruă gah anom bruă khua pơ ala mơnuih ƀôn sang dêh čar, đĭ tui rơbêh 1000 pok hră pơkă hăng thun 2023.

Ƀing khua mua pơ ala lăi lĕ, bruă tŭ jum mơnuih ƀôn sang, pơsir kơđi tơlơi arăng ƀom, lăi pơthâo tơlơi soh hăng anom bruă pơ ala mơnuih ƀôn sang hăng ƀing pơ ala mơnuih ƀôn sang jing sa bruă mă phun, pơdah rai tơlơi glăm ba, gơgrong mơ̆ng mơnuih ƀôn sang, mơ̆ng mơnuih ruah khua ngă hrŏm tong ten mơ̆ng dlông truh pơ tơring čar. Kiăng kơtưn boh tŭ yua akŏ pơjing tơlơi phiăn, hơmâo hơdră git gai wai lăng hăng boh thâo ia rơgơi tơlơi pơhing komputer, khom hơmâo tơhnal pơkă tŭ mă tơlơi pơhing arăng mơ-it nao lăi pơthâo tơlơi soh sat, khom ĕp lăng mrô rơnoh dŏ djă pioh plah wah djop sang bruă krăo lăng djop bruă tŭ mă tơlơi pơhing hăng pơsir kơđi laih anun lăi glăi hơdră pơsir kơđi anun kơ mơnuih mơ-it tơlơi pơhing thâo.