Ƀing khua mua bơtŭ ư hăng tơlơi či kiăng pơblih phrâo, pơhrua tui lu tơlơi phiăn amăng kơnuk kơna, kiăng dưi ngă tui djơ̆ tơlơi hơmâo amăng bruă mă rim hrơi, boh nik ñu pơtrut bruă ngă pơblih yua mrô, pơblih hơdră ngă hră pơar hăng akŏ pơdong gong gai kơnuk kơna dua gưl ƀơi tơring čar.

Pơgôp hiăp kơ Tơlơi phiăn tŭ mă tơlơi pơhing, ơi Bùi Thanh Toàn, Khua gơnong bruă Boh thâo hăng Ia rơgơi phrâo tơring čar Dak Lak lăi lĕ, kiăng ngă rơđah hloh anŏ pơkă amăng tơlơi phiăn, boh nik ñu ră anai hơmâo lu tơlơi pơhmao mă tơlơi dưi ƀudah bĕ hĭ ƀu lăi pơthâo tơlơi pơhing či kiăng. Ƀuh rơđah ră anai, ăt dŏ hơmâo đôč mơnuih hneč mă tơlơi dưi jao ƀu gưt brơi tơlơi pơhing, laih anun khom pơtong rơđah tơlơi pia anom bruă kơnuk kơna hăng pô gơgrong ba brơi tơlơi pơhing. Ơi Bùi Thanh Toàn lăi pơtong bruă sem lăng hăng rơkâo pơhrua nao hơdôm tơlơi pơkă rơđah hloh pơsir tơlơi hơmâo, ăt kah hăng tơlơi gơgrong mơ̆ng mơnuih ba yua tơlơi pơhing anun tơdơi kơ arăng brơi laih tơlơi pơhing.

“Tơlơi pơkă ngă tui khom tong ten hơmâo čih amăng tơlơi phiăn, hơdôm tơlơi pơkă pơkŏn. Khă hnun, tui hăng kâo pơmin lĕ amăng tơlơi phiăn anai lăi nao rơđah. Ră anai, kơnong čih lăi pơthâo pô khom brơi tơlơi pơhing đôč, bơ pô brơi tơlơi pơhing hiư̆m pă lĕ? Bơhmutu, kâo dưi hơmâo sang bruă A anun, brơi tơlơi pơhing, samơ̆ tơdơi kơ anun, kâo lăi pơthâo soh glăi hăng tơlơi pơhing blung a, tơlơi anun amra pơsir tơlơi soh kâo hiư̆m pă? Amăng hơdrôm hră tơlơi phiăn anai, aka ƀu lăi nao hơdră pơsir tơlơi soh ôh, samơ̆ khom hơmâo sa glông lăi pơtong, hơmâo tơlơi phiăn pơkŏn amra pơsir tơlơi soh”.

Ăt amăng boh yom phun anai mơ̆n, hơdôm čô khua pơ ala rơkâo kiăng pơkă tong ten hloh djop jơlan hơdră, tơlơi hơngah brơi tơlơi pơhing, kiăng bĕ hĭ hneč mă tơlơi dưi hăng jăm nao lăi tơlơi hơgŏm mơ̆ng kơnuk kơna. Laih dơ̆ng, kiăng pơkă rơđah rơđong hloh brơi tơlơi pơhing hăng mrô hăng kah pơpha mrô rơnoh plah wah sang bruă kơnuk kơna. Ră anai, dŏ ngă hlơi dưi pô anun ngă, tơlơi pơhing plah wah anom bruă, ngă kơƀah hĭ tơlơi dưi tŭ mă tơlơi pơhing mơ̆ng mơnuih ƀôn sang.

Hăng tơlơi phiăn djru ba pơsir kơđi tơlơi phiăn, yă Lê Thị Thanh Thủy, Kơ-iăng khua Gơnong bruă Tơlơi phiăn tơring čar Dak Lak lăi lĕ, kiăng pok pơhư prong mơnuih dưi tŭ mă tơlơi djru ba hăng pơđĭ tui boh tŭ yua klă hloh bơwih bơwăng. Yua kơ anun, kiăng pơhrua nao khul mơnuih tha rơma, ƀu hơmâo mơnuih lăng ba, ƀing arăng ngă sat taih amang amăng sang anŏ, kiăng dưi djru ba pơsir brơi kơđi huăi apah prăk tañ, hmao kru, laih dơ̆ng ƀư̆ pơkra glăi tơlơi pơkă pioh pơhưč ƀing nai thâo kơđi, mơnuih rơgơi tơlơi phiăn djru ba.

“Tơdah djă pioh tui tơlơi phiăn pơkă lĕ tơnap biă mă jak iâu ƀing nai thâo kơđi rơgơi ƀudah mơnuih rơgơi gah tơlơi phiăn hơmâo pran jua djru ba tơlơi phiăn, biă mă ñu ƀơi kual ataih, tơnap tap, ngă bơbeč djơ̆ anŏ tŭ yua kơ bruă ngă hră pơar tŭ mă tơlơi djru pơsir kơđi kơ mơnuih ƀôn sang. Gơnong bruă tơlơi phiăn tơring čar rơkâo lĕ, čih pơkra sa tơlơi pơkă ngă hiư̆m pĕ pơhlom brơi bruă djru tơlơi phiăn, boh nik ñu ƀơi kual ataih, kual asuek, tơnap tap djru ba kơ ƀing ngă bruă djru pơsir kơđi kơ mơnuih tơnap tap”.

Klah čun ƀơi mông jơnum, yă Nguyễn Thị Thu Nguyệt, Kơ-iăng khua grup pơ ala mơnuih ƀôn sang dêh čar tơring čar Dak Lak lăng yom tơlơi gơgrong ba, boh tŭ yua amăng bruă mă kơsem min, ngă pơgiong boh yom phun pơčrong sai čih pơkra tơlơi phiăn, kiăng pơdah đĭ amăng mông jơnum khua mua pơ ala mơnuih ƀôn sang dêh čar tal anai, kiăng gum hrŏm pơđĭ tui boh tŭ yua čih pơkra tơlơi phiăn, pơhlom djơ̆ tañ ba tơlơi phiăn ngă tui sit nik amăng tơlơi hơdip, ngă tui tơlơi phiăn tŭ yua hloh.