Tơlơi pơhing sĭ mơdrô dơ̆p, pơkra ming gơnam ngă mă ča, gơnam hla tui arăng hlăk hơmâo tơnap tap biă mă. Mơ̆ng lơ 15/12/2025 truh lơ 14/3/2026, anom bruă mă jia gơnam sĭ mơdrô hăng tač rơngiao hơmâo ƀuh, mă pơkong hăng pơsir truh 4.800 wơ̆t sĭ mơdrô dơ̆p, pleč ƀlor hăng pơdŭ pơgiăng hyu tă tăn ƀu găl tơlơi phiăn, ba hyu gơnam sĭ mơdrô ƀơi guai dêh čar, đĭ tui truh 100 wơ̆t, dưm dưm hăng 26% pơkă hăng tal anai thun hlâo. Amăng dêh čar, tơhan kông an hăng lu anom bruă kơnuk kơna ƀuh na nao, pwosir lu tơlơi soh pơơkra ming, sĭ mơdrô gơnam ngă mă, hla tui gru arăng, gơnam sĭ mơdrô ƀu tŭ yua klă.

Ƀơi gah rơngiao mông jơnum, ƀing pơ ala mơnuih ƀôn sang lăng yom bruă ngă khut khăt mơ̆ng djop sang bruă kơnuk kơna, pơkơdong glăi gơnam sĭ mơdrô ngă mă ča ƀu tŭ yua hiam. Tui hăng Trung tướng, ơi Phạm Công Nguyên, Khua anom bruă gah tơlơi phiăn pơkă hăng pơblih bruă hră pơar, tơlơi phiăn mơ̆ng Ding jum kông an-khua pơ ala mơnuih ƀôn sang dêh čar ƀơi tơring čar Thanh Hóa lăi: hơmâo tơlơi git gai djơ̆ lăp mơ̆ng ping gah, djop sang bruă kơnuk kơna, hơmâo pơtrut kơtang bruă mă pơgăn gơnam sĭ mơdrô ngă mă ča hăng hla tui gru gơnam arăng jing sa bruă mă đing nao hlâo hloh ră anai, kiăng pơhlom brơi tơlơi bơwih ƀong huă tơpă hnơ̆ng, hơđong kơjăp laih anun pơgang tơlơi suaih pral kơ mơnuih ƀôn sang.

“Lơ̆m ƀing ta pơkơdong glăi hăng gơnam sĭ mơdrô ngă mă ča, gơnam hla tui gru arăng, mơta sa lĕ ƀing ta pơgang ba tơlơi dưi mơ̆ng mơnuih blơi yua. Dua lĕ akŏ pơjing anih anom sĭ mơdrô tơpă hăng bơkơnar. Tơdah gơnam sĭ mơdrô ngă mă ča ƀu hiam klă, ba sĭ mơdrô bă hră amăng lu anih, gơnam ƀing sĭ mơdrô pơkra ming tơpă, djơ̆ lăp amra bơbeč djơ̆ hĭ. Tơlơi anun, ngă ƀu klă prong biă mă kơ tơlơi pơđĭ kyar mơ̆ng sang bruă mơdrô, rơnoh prăk pơhrui glăi hăng bơbeč djơ̆ kơ rơnoh pơđĭ kyar truh dua mrô. Pơkơdong glăi hăng gơnam pơkra ming ƀu hiam klă ră anai, sa bruă khom đing nao hlâo. Kiăng akŏ pơjing rai anih anom sĭ mơdrô hơđong, bơkơnar kơ abih bang sang bruă mơdrô đôč ôh, ñu dŏ jing bruă mă yom pơhlom tơlơi duăm ruă, pơgang tơlơi suaih pral, pơhrŏ rơnoh prăk pơjrao duăm ruă kơ mơnuih ƀôn sang dơ̆ng”.

Khua khul ƀing ngă bruă mơdrô anet hăng man ƀrô Việt Nam, pô pơ ala Nguyễn Văn Thân, grup mơ̆ng ƀôn prong Hồ Chí Minh brơi thâo, gơnam ngă mă ča, gơnam hlă tui gru arăng, gơnam ƀu tŭ yua kơtư̆ hĭ gơnam sĭ mơdrô sit nik tơpă, ngă tơnap kơ ƀing ngă bruă mơdrô tơpă, laih anun ngă răm ƀăm kơ atur bơwih ƀong huă dêh čar. Kiăng pơhlom djơ̆ rơnoh pơkă pơđĭ kyar dua mrô hăng pơgang tơlơi suaih pral kơ mơnuih ƀôn sang, bruă mă pơgăn tơlơi soh sat sĭ mơdrô dơ̆p, pleč ƀlor, pơkra ming gơnam sĭ mơdrô ngă mă ča, ƀu tŭ yua kiăng kơtưn hloh dơ̆ng:

“Hơdôm bruă mă tơpă sit nik, prăk kăk tuh pơ alin lu hloh. Samơ̆ gơnam ngă mă ča, hla tui arăng lĕ prăk tuh pơ alin ƀu lu ôh. Aka lăi nao ôh, ñu ngă pơhŭi kơ tơlơi suaih pral mơnuih blơi yua. Tơdah gơnam pơkra ming mă ča, hla tui gru arăng lu đơi, hiư̆m dưi pơđĭ kyar tui anŏ ta kiăng? Lăng nao kơ abih bang mơnuih mơnam lĕ, sit mơ̆n ñu ngă sat kơ abih bang. Yua kơ anun bruă pơgăn gơnam sĭ mơdrô ngă mă ča, gơnam hla tui arăng, jing sa bruă mă ječ ameč mơ̆n. Kơnong hơmâo dua hơdră, khom nao ĕp lăng tong ten ƀơi sang măi dŏ pơkra ming. Dua lĕ pơtum ƀing tơhan wai lăng anih anom sĭ mơdrô, hyu ĕp djop anih pơdă gơnam sĭ mơdrô anet prong, mơ̆ng sang čơ prong truh pơ rim sang anŏ Shop. Tơdah blơi gơnam sĭ mơdrô amăng plang internet ăt khom hơmâo wai pơgang gah Internet mơ̆n”.

Ta dưi ƀuh, bruă pơkơdong glăi gơnam pơkra ming mă ča, gơnam hla tui arăng, khom ngă bruă ječ ameč, kiăng pơgang ba tơlơi dưi kơ mơnuih blơi yua, laih anun anŏ gêh găl khom ngă hlâo pioh akŏ pơjing anih sĭ mơdrô tơpă hnơ̆ng, bơkơnar. Lơ̆m anih sĭ mơdrô “Dưi pơrơgoh hĭ” sang bruă mơdrô tơpă amra hơmâo pran mă bruă pơđĭ kyar, tơlơi đăo kơnang mơ̆ng mơnuih ƀôn sang blơi yua dưi kơjăp hloh, mơ̆ng anun pơjing  rai atur kơjăp pơđĭ kyar, anăp nao rơnoh pơkă pơđĭ kyar dua mrô pơ anăp anai. Khă hnun, kiăng dưi ngă djơ̆ tơlơi anai, kiăng djop anom bruă gum ngă hrŏm khut khăt hloh mơ̆ng djop ling tơhan kơnuk kơna, kiăng gum tơngan hrŏm amăng sang bruă mơdrô laih anun djop mơnuih blơi yua hai, lăi ƀu dưi blơi hăng ƀu yua ôh gơnam sĭ mơdrô tă tăn pơkra ming mă ča hla tui gru arăng, kiăng pơgôp hrŏm tong ten akŏ pơdong anih anom sĭ mơdrô tơpă hăng pơđĭ kyar sui thun pơ anăp adih.