Tui Gơnong bruă pơtô hăng pơjuăt tơring čar Khánh Hoà lăi, ră anai tơring čar hơmâo rơbêh 64.000 čô čơđai sang hră djuai ania ƀiă, amăng anun gưl sa hơmâo rơbêh 28.000 čô. Kơnong gah Dơnung tơring čar (jing Ninh Thuận hơđăp) hơmâo rơbêh 60% čô čơđai sang hră djuai ania ƀiă.

Yă Lê Thái Trường Thi, Kơ-iăng khua gơnong bruă pơtô hăng pơjuăt tơring čar Khánh Hoà brơi thâo, hlâo adih yua prăk mơ̆ng tơring čar ƀu hơmâo đơi ôh, tơring čar Ninh Thuận hơđăp kơnong dưi djru ba braih đôč kơ ƀing čơđai, laih anun prăk apah hrăm hră kơ čơđai djuai ƀiă, lơ̆m anun lu tơlơi djru phara hơjăn pơkŏn dong aka ƀu hơmâo ngă tui djŏp ôh. Tơdơi kơ pơmut hrŏm 2 boh tơring čar mơ̆ng lơ 1/7/2025, bruă pok pơhai abih bang aka ƀu hmao ngă mơn. Yă Lê Thái Trường Thi lăi pơthâo: “Bruă ngă tui Tơlơi pơtrun mut hrŏm ha amăng plĕ amra dŏ hơmâo lu tơlơi bơdjơ̆ nao yua dŏ prăk kăk, tơlơi pơtrun kiăng ngă. Yua bơdjơ̆ nao bruă hrăm mơguah tlam/ha hrơi, nai pơtô, gơnam yua, anih anom,...lu mơta bơdjơ̆ nao bruă ƀong yang hrơi mơ̆ng ƀing čơđai. Dŏ lu tơlơi tơnap biă mă. Pơ Ninh Thuận hơđăp lu anih ăt aka ƀu dưi pơtô mơguah tlam/hrơi”.

Tơdơi kơ tơlơi pơhing mơ̆ng VOV kơ bruă čơđai gah Dơnung Khánh Hòa aka ƀu hơmâo ôh prăk djru ƀong huă yang hrơi dong, Jơnum min mơnuih ƀôn sang tơring čar Khánh Hoà brơi thâo, hơmâo jao laih kơ Gơnong bruă pơtô hăng pơjuăt lăng glăi abih bang tơlơi djru bruă pơtô hrăm plah wah dua boh tơring čar hlâo adih, mơ̆ng anun lăi pơthâo pơčrâo brơi čih pơkra tơlơi pơtrun phrâo pơdah pơ Khua mua pơ ala mơnuih ƀôn sang tơring čar. Tơlơi rơkâo đĭ pơƀut kơ tơlơi djru čơđai hrăm hră pơ kual tơnap tap kah hăng hră apah čơđai sang hră djuai ania ƀiă, djru prăk hrăm, pơkra glăi sang hră, hrŏm hăng tơlơi djru čơđai dŏ đih glăi, laih anun djru klă ƀiă tơlơi hrăm hră kơ ƀing čơđai plơi pla djuai ania ƀiă. Bruă čih pơkra tơlơi pơtrun phrâo kiăng ngă anet ƀiă tơlơi pleh ploh  tŭ mă tơlơi djru hrăm hră mơ̆ng djŏp kual plơi pla, pơhlom čơđai ƀơi Khánh Hoà tơdơi kơ pơmut hrŏm dưi hơmâo tơlơi hrăm hră, čem rông ba klă hloh.

Ơi Nguyễn Thanh Hà, Kơ-iăng khua Jơnum min mơnuih ƀôn sang tơring čar Khánh Hòa brơi thâo, tơlơi pơtrun him lăng hơmâo pơƀuh pơ Khua mua pơ ala mơnuih ƀôn sang tơring čar Khánh Hoà ƀơi mông jơnum pơ anăp,  tơdơi kơ anun ngă tui ƀơi abih bang hlao, biă ñu ngă hlâo ƀơi plơi pla djuai ania ƀiă hăng anih dŏ tơnap lu: “Bruă djru ƀong huă yang hrơi dong, đih pơdơi glăi pơ sang hră kơ ƀing čơđai djuai ania ƀiă hơmâo ngă klă laih. Djru ƀing čơđai hrăm hră na nao, djru čơđai nao hră, djru ba sang anŏ dŏ tơnap. Mơ̆ng anun ƀing čơđai ñu hơmâo pran hloh, yua ƀong huă klă, anun jing tañ prong, kjăp pran či hrăm hră, ngă bruă gơñu hor”./.