Anom bruă wai lăng Gru grua-Mơnuih mơnam, Khul pơ ala mơnuih ƀôn sang tơring čar Dak Lak hơmâo ngă tui bruă krăp lăng ƀơi djop sang bruă, anom bruă pơdjơ̆ nao bruă mă amăng sang hră, gơnong bruă wai lăng pơtô hrăm, tơdơi pơmut glăi, dăp phrâo, kiăng ngă klă bruă jao pơtô hrăm thun 2026-2027 hăng hơdôm thun tŏ tui. Tơdơi kơ dăp glăi, pơmut lu sang hră, Dak Lak hrŏ trun ha mơkrah mrô sang hră anih hrăm yua kơnuk kơna pô, trun dŏ 625. Bruă pơphun dăp glăi sang hră, anih hrăm kiăng hơbôt hloh, ƀiă mrô khua mua sang hră, pơtum nao kơ bruă pơtô hrăm tŭ yua. Khă hnun, lơ̆m pơphun dăp glăi, ăt hơmâo lu tơlơi kiăng đing nao, pơpha nai pơtô, biă mă ñu sang hră pơprong, hơmâo lu sang hră čơƀeng ataih mơ̆ng sang hră phun.

Ră anai, tơring čar Dak Lak hơmâo giăm 33.000 čô nai pơtô, amăng anun tui hăng mrô pơsit rơbêh 35.000 čô mơnuih. Lăp đing nao, mah kơƀah nai pơtô ƀơi gưl hrăm, tơlơi hrăm, tơring čar ăt 686 čô nai rơbêh, lu amăng tơlơi hrăm Ngữ Văn, Lịch sử, Điạ lý. Lơ̆m anun, hơdôm tơlơi hrăm Tơlơi pơhiăp Angle, tơlơi hrăm Tin học, Mỹ thuật, Âm nhạc hăng Giáo dục thể chất dŏ kơƀah nai pơtô lu biă mă. Bruă kah pơpha nai hyu pơtô plah wah mơ̆ng sang hră anai nao pơ sang hră adih, dưi djop brơi ha mơkrah đôč, ngă kơ bruă iâu pơmut hăng apah mơnuih ngă nai pơtô hrăm ăt dŏ lu đôč.

Hrŏm hăng anun, rơnoh pơkă mrô mơnuih mă bruă amăng sang hră tơdơi kơ pơmut glăi ăt aka ƀu gêh găl tui anŏ kiăng sit nik ôh. Hơmâo sang hră hơmâo lu sang hră čơƀeng, ataih mơ̆ng sang hră phun hơdôm rơbêh hơpluh km mơtam, mơnuih ngă bruă gah ia jrao kơnong sa čô đôč. Gơnong bruă čar Dak Lak rơkâo hăng Ding jum Pơtô hăng pơjuăt jŭ yap glăi, čih pơkra mrô či iâu pơmut nai pơtô tui hluai tơlơi či kiăng hăng anŏ gêh găl rim anih, plơi pla, kiăng djru pơgang tơlơi suaih pral kơ čơđai sang hră.

Sa tơlơi dơ̆ng dŏ gun lĕ pơsir tơlơi djru ba, prăk blan kơ ƀing khua mua sang hră phrâo, wơ̆t hăng ƀing nai pơtô, ƀu djơ̆ amăng hră hơmâo anăn brơi pơdơi ôh. Tơlơi anai, ngă kơ hơdôm čô nai kiăng rơkâo pơdơi bruă samơ̆ aka ƀu pơsir brơi ôh hơdră či pơdơi, ƀong prăk blan laih pơdơi abih thun bruă, ƀudah pơdơi hlâo kơ truh thun pơdơi. Gơnong bruă Pơtô hăng Pơjuăt tơring čar Dak lak rơkâo kơ Ding jum bruă čar tañ čih pơkra, pơhrua nao dơ̆ng hră pơtô brơi ngă tui, pơsir hĭ tơlơi gun, tơnap tap kơ tơring čar, kiăng pơhlom brơi anŏ tŭ yua hăng ngă hơđong pran jua kơ ƀing nai pơtô tơdơi kơ dăp glăi.