Sa amăng hơdôm tơlơi hơmâo mơnuih mă bruă pơđing hmư̆ lĕ bruă pơhlom tơlơi dưi tŭ mă Hră pơhlom nua mơnuih mơnam tơdah sang bruă bơwih ƀong kaih blơi brơi. Ơi Cao Văn Bi, Khua khul mut phung mơnuih mă bruă ƀơi sa boh sang bruă bơwih ƀong phường Tuy Hòa, tơring čar Dak Lăk, rơkâo kiăng hơmâo hơdră djru hnun kah mơnuih mă bruă huăi bơbeč djơ̆ ôh lơ̆m sang bruă bơwih ƀong aka ƀu tla brơi prăk pơhlom nua mơnuih mơnam: “Hră pơtrun mrô 158 lĕ hră pơhlom nua mơnuih mơnam kơnong pơkă hrơi mơ̆ sang bruă bơwih ƀong blơi brơi kơ mơnuih mă bruă đôč. Tui anun jing ƀu gêh găl ôh kơ mơnuih mă bruă. Yua hnun, rơkâo ngă hiưm pă kiăng pơsit hrơi blan blơi hră pơhlom nua mơ̆ng mơnuih mă bruă truh hrơi mông pơdơi bruă. Dŏ 2 blan, 3 blan ƀudah 1 thun mơ̆ sang bruă bơwih ƀong aka ƀu tla brơi prăk lĕ kơnuk kơna, gong gai gơgrong brơi, anun lĕ pơhrui glăi hơdôm blan aka ƀu tla brơi mơ̆ng sang bruă bơwih ƀong, hnun kah hăng huăi bơbeč kơ mơnuih mă bruă”.

Ƀơi mông jơnum, hơdôm tơlơi pơgôp hiăp mơ̆ng mơnuih amăng khul, mơnuih mă bruă kơnuk kơna, mơnuih mă bruă gah rơngiao laih anun khua mua amăng khul mut phung, pơƀut lăi nao tơlơi tơnap tap amăng tơlơi hơdip mơda, bruă mă laih anun bruă ngă tui jơlan hơdră bơdjơ̆ nao mơnuih mă bruă. Lăp đing nao lĕ bruă mă amăng thun blan kiăng rơguăt bruă, thâo mă yua ia rơgơi mrô; bruă kaih brơi prăk blan, kaih tla brơi hră pơhlom nua mơnuih mơnam; anŏ kiăng hơmâo sang dŏ, sang dŏ jăng jai mơ̆ng kông ñơn, laih anun hơdôm tơlơi tơnap lơ̆m tŭ mă tơlơi djru ngă hơđong tơlơi hơdip mơda.

Kơ bruă pơtô pơhrăm bruă mă hăng bruă mă ƀơi tơring, ơi Nguyễn Quang Thuân, Kơ-iăng khua gơnong bruă čar tơring čar Dak Lăk brơi thâo, pơsir brơi bruă mă, pơđĭ tui prăk blan, hơđong tơlơi hơdip mơnuih ƀôn sang jing sa  amăng hơdôm bruă hơmâo tơring čar lăp đing nao: “Hlâo adih, tơring čar ngă hrŏm hăng hơdôm gơnong bruă čih pơkra hơdră pơtô pơjuăt, rơguăt bruă mă kơ mơnuih mă bruă pơ anăp adih. Laih dong, djru sang bruă bơwih ƀong pơtruh ĕp brơi bruă mă, lăng ba mơnuih mă bruă sang anŏ rin yơh phun ñu, hăng lu hơdră djru bruă mă ƀơi anih, pơtruh mơnuih mă bruă gah rơngiao tơring čar laih anun ba mơnuih mă bruă nao mă bruă pơ tač rơngiao, amăng anun hơmâo mă bruă jăng jai”.

Hrŏm hăng pơsir hĭ hơdôm tơlơi dŏ gun kơ jơlan hơdră, ba yua boh thâo mrô hơmâo pơsit jing sa amăng hơdôm hơdră pơđĭ tui anŏ klă bơwih brơi, djru mơnuih ƀôn sang hăng mơnuih mă bruă dưi tŭ mă hơdră djru amuñ hloh, biă ñu lĕ hơdră djru hră pơhlom nua mơnuih mơnam. Ơi Tạ Đức Hậu, Kơ-iăng khua sang bruă pơhlom nua mơnuih mơnam tơring čar Dak Lăk brơi thâo, sang bruă pơhlom nua mơnuih mơnam glăk pơplih tui hơdră djru mơnuih mă bruă dưi tŭ mă tơlơi djru amuñ hloh: “Anom bruă pơhlom nua mơnuih mơnam pơsit pơplih mơ̆ng dŏ tơguan jing prăp rơmet bơwih brơi hlâo. Tơdơi kơ hơmâo plang djă pioh tơlơi pơhing rơgoh lĕ gơmơi pơtruh hăng Glông djă pioh tơlơi pơhing dêh čar kơ mơnuih amăng plơi pla, đah mơ̆ng ƀuh anăn păn tơlơi pơhing mơ̆ng mơnuih mă bruă aka ƀu djơ̆, aka ƀu bơkơnar, jing gơmơi mơit hră mơnuih mă bruă hơmâo anăn soh glăi, mơit kơ anom bruă wai lăng, ăt kah hăng pơthâo pơ mơnuih mă bruă mơtăm kiăng nao plih glăi tañ”.

Khua mua jơnum min mơnuih ƀôn sang tơring čar Dak Lăk pơsit, hơdôm tơlơi hơmâo pơčrông ƀơi mông jơnum ƀu kơnong pơdơi dơ̆ bruă lăi glăi tơlơi tơña đôč ôh, ăt kiăng pơkra brơi tơdơi kơ pơđut mông bưp. Jơnum min mơnuih ƀôn sang tơring čar tŭ mă, git gai hơdôm anom bruă bơdjơ̆ nao sem lăng hăng pơkra brơi. Laih dong kiăng pioh mông bưp plah wah gong gai, sang bruă bơwih ƀong hăng mơnuih mă bruă; ngă hrŏm hăng Khul mut phung mơnuih mă bruă đah mơ̆ng lăng ba tơlơi hơdip mơda, pran jua laih anun pơgang ba tơlơi dưi, tơlơi gêh găl lăp djơ̆ mơ̆ng mơnuih mă bruă mut phung hăng abih bang mơnuih mă bruă pơkŏn dong./.