Mơ̆ng kơnôl 30/9 truh kơnôl 6/10, mơ̆ng tơlơi pơhing mơnuih ƀôn sang lăi pơhmư̆, Grup tơhan K52 nao sem lăng, klơi, kuai rŭ đĭ 5 per tơlang tơhan ƀơi dêh čar Kur. Amăng anun, 1 per tơlang tơhan ƀơi tơring čar Rattanakiri, 2 per tơlang ƀơi tơring čar Stung Treng hăng 2 per tơlang tơhan ƀơi tơring čar Preah Vihear.

Ƀơi hơdôm anih nao kuai, tơhan hơmâo mă lu gơnam dor hrŏm mơ̆ng ling tơhan, kah hăng ca-men, apui tơneh, kơtok ia jrao Penicillin, mŏng pơtil B52, bơnut ao tơhan, ao ia hơjan, kơdung prăk, rơsi rah ƀuk, mơnil...Grup tơhan K52 mă phun tơgơi ba či pơčrang ADN, pơsit anăn krăn pô tơhan djai. Hăng bruă hyu ĕp, kuai rŭ tơlang amăng čar ta, Tơhan K52 hơmâo rŭ đĭ 3 per tơlang tơhan dong ƀơi plơi Bi, să Ia Dom, tơring čar Gia Lai. Mơ̆ng tơlơi lăi pơhmư̆ mơ̆ng ơi Siu Bích (tơkeng thun 1952, dŏ amăng plơi), kơ hơdôm boh pơsat hơmâo dor amăng đang giăm sang, ling tơhan sem lăng hăng rŭ đĭ 2 per tơlang amăng kơnôl 5/10 hăng 1 per tơlang amăng tlam kơnôl 7/10.