Dơ̆ng mơ̆ng să bul pơtâo plao ia rơsĭ Nhơn Châu, ayong Nguyễn Văn Bảy hrŏm hăng rơbêh 100 čô mơnuih ƀôn sang găn rơgao 13 hải lý, či rai pơ lơ̆n hang pioh pơplông mă hră mơgăt rơdêh thut hnơ̆ng A1. Hăng mơnuih ƀôn sang amăng bul pơtâo ia rơsĭ, rĭm wơ̆t glăi pơ lơ̆n hang amăng dêh čar sa tơlơi bơngơ̆t pơmin nao kơ prăk ƀong huă, apah rô nao rai, anih dŏ. Tal pơplông anai, rơnoh prăk apah anun hơmâo kơnuk kơna djru brơi laih, kiăng mơnuih ƀôn sang plai ƀiă tơlơi kơƀah, tơnap tap. Hăng ayong Bảy, tơlơi lăp prong hloh lĕ tơlơi thâo kơ ñu kiăng hluh ten tơlơi phiăn jơlan glông, pioh ba yua ngă tui amăng tơlơi hơdip mơda rĭm hrơi.

“Hnang blung pơmin ăt hŭi mơ̆n samơ̆ gir run khut khăt anun pơplông dưi laih. Sit rô nao rai amăng jơlan glông, amra thâo jơlan nao, anăp rơbat djơ̆ jơlan pioh kơ ta či nao djơ̆ hăng tơlơi phiăn pơkă”.

Ơi Dương Hiệp Hưng, Khua Jơnum min mơnuih ƀôn sang să Nhơn Châu brơi thâo, rơnoh yom mơ̆ng jơlan hơdră ƀu kơnong dŏ glăi ƀơi bruă djru mơnuih ƀôn sang kiăng hơmâo sa tơlơi gêh găl dưi tŭ mă hră mơgăt rơdêh thut đôč ôh, yom hloh dơ̆ng pơtô brơi mơnuih ƀôn sang thâo hluh tơlơi phiăn kơnuk kơna pơkă kơ rô nao rai ƀơi jơlan glông djơ̆ lăp.

“Mơnuih ƀôn sang đăo kơnang biă mă jơlan hơdră djru ba tui anai, čang rơmang kơnuih ƀôn sang pơplông dưi soh, hơmâo hră mơgăt rơdêh thut laih anun rĭm čô mơnuih ƀôn sang amra kah hăng sa čô mơnuih hyu pơtô ba dơ̆ng tơlơi phiăn jơlan glông, brơi abih bang ngă tui djơ̆ kiăng akŏ pơdong să bul pơtâo ia rơsĭ jai hrơi thâo rơgơi, kiăo tui rơnuk anai hăng bă blai tơlơi khăp pap”.

Tơdah ƀơi bul pơtâo plao ia rơsĭ Nhơn Châu, rô nao rai ataih yua găn ia rơsĭ prong, jơlan ataih ƀơi jơlah ia, lu anih ƀơi kual čư̆ siăng, plơi pla mơnuih djuai ƀiă dŏ ƀơi Gia Lai, tơlơi tơnap tao hơmâo mơ̆ng tơlơi thâo hră, thâo pơđok hăng hluh tơlơi pơplông čih hăng tơlơi Yuăn aka ƀu lu ôh. Lu mơnuih ƀôn sang ƀu thâo hră, hiư̆m thâo čih, pơđok tơlơi pơplông hăng tơlơi Yuăn. Tơdah ngă tui hơdră pơphun tơlơi pơplông kah hăng tơđar, sit nik gơñu ƀu djop anŏ gêh găl ôh hơdôm tơlơi pơtô ba, mah hnun, tơlơi kiăng hăng bruă yua rơdêh, đĭ hyu lĕ, ăt khom kiăng.

Yua anun, kiăng pơsir hĭ tơlơi gun anai, ƀơi hơdôm boh plơi pla, črăn pơplông čih lăi glăi pơhrua hăng hơdră tơña lăi glăi. Pơplông đĭ mơgăt rơdêh lĕ, ăt mơnuih djuai ƀiă mơ̆n pô pơčrâo pơtô ba hlâo, pơhiăp hăng tơlơi djuai ania pô, djru mơnuih ƀôn sang thâo hluh laih anun ngă tui djơ̆, truh mông pơplông tơña hăng lăi glăi hăng boh pơhiăp djuai ania ta pô. Amai Rčom Di, plơi O, să Ia O, tơring čar Gia Lai, hơ̆k mơak lăi:

“Hrơi anai, rai pơplông mă ƀăng anai kâo dưi laih mơ̆n, kâo mơak biă, bơni kơ ƀing adơi ayong amăng grup hơmâo pơtô ba”.

Tơlơi mơak mơ̆ng amai Di ăt djơ̆ tơlơi čang rơmang mơ̆ng lu mơnuih amăng plơi pla mơnuih djuai ƀiă mơ̆n: dưi hrăm hăng dưi tŭ yap hơmâo ƀăng hăng pran jua ta pô dưi pơplông hơmâo mă, samơ̆ kiăo tui tơlơi gêh găl arăng pơtô ba sit nik hăng hơdră djă, mơgăt rơdêh tui ta pô thâo. Trung tá Thái Hoàng Nam, Khua kông an să giăm guai dêh čar Ia O, tơring čar Gia Lai, brơi thâo, anih ataih anai hơmâo 70% mrô mơnuih ƀôn sang djuai ƀiă, tơlơi hơdip mơda dŏ tơnap tap đôč. Bruă pơtô hrăm brơi, pơplông mă ƀăng pioh ngă brơi hră mơgăt rơdêh găl tơlơi phiăn, samơ̆ ƀu apah prăk ôh, djru mơnuih ƀôn sang kiăng thâo hluh, anŏ pơkă djop tơlơi gêh găl dưi mơgăt rơdêh thut rô nao rai amăng jơlan glông, đah mơ̆ng rơnuk rơnua kơ ta pô.

“Giong tal pơplông anai, kiăng pơđĭ tui tơlơi thâo hluh kơ mơnuih ƀôn sang thâo tơlơi phiăn jơlan glông či đuăi hyu, rô nao rai. Laih anun bruă ngă brơi hră mơgăt rơdêh djru mơnuih ƀôn sang thâo gơgrong mă gơñu pô amăng bruă ngă tui djơ̆ tơlơi phiă, pơgang drơi jăn pô, sang anŏ hăng mơnuih mơnam ƀơi jơlan juăt nao rai amăng plơi pla”.

Dơ̆ng mơ̆ng plah wah blan 8/2025 truh ră anai, kông an tơring čar Gia Lai hơmâo pơphun13 wơ̆t laih pơplông mă ƀăng, mơgăt rơdêh hnơ̆ng A1, băng rơdêh thut ƀu mă prăk ôh brơi kơ 862 čô mơnuih, sang anŏ ƀun rin, giăm ƀun rin ƀơi djop să tơnap tap hloh. Amăng mrô anai, 475 čô dưi hĭ hăng hơmâo jao hră mơgăt rơdêh thut.

Thượng tá Ksor H’Bơkhăp, Kơ-iăng khua kông an tơring čar Gia Lai brơi thâo, jơlan hơdră djru ba lu sang anŏ tơnap tap, hơmâo anŏ gêh găl hrăm tơlơi phiăn hăng djop anŏ gêh găl kiăng dưi mă ƀăng, mơgăt rơdêh thut rô nao rai rơnuk rơnua ƀơi jơlan glông.

“Tơlơi pơčrâo trun mơ̆ng kông an truh pơ djop să amăng tơring čar, brơi jŭ yap glăi abih, djop sang anŏ tơnap tap, sang anŏ hơmâo anăn kơnuk kơna djru, kiăng hơmâo hơdră djru ba. Giong anun, čih anăn hăng ngă tui hơdôm yak či djru ba mơnuih ƀôn sang kual anai ngă tui hơdră hrăm hăng pơplông mă hră mơgăt rơdêh thut, kiăng djru ba thâo hluh tơlơi phiăn jơlan glông sit hyu rô rơbat, đĭ rơdêh ƀơi jơlan glông”.

Hăng anih dŏ plơi pla ataih, tơnap tap ƀơi Gia Lai, hơbô̆ bruă “Hră mơgăt rơdêh thut tơlơi khăp pap” ăt jing hơdră pơpha brơi tơlơi gêh găl rơnuk rơnua ƀơi jơlan glông nao truh giăm mơnuih ƀôn sang hloh, mơ̆ng anun djru hrŏm akŏ pơjing bruă mă, tơlơi thâo hluh ngă tui tơlơi phiăn jơlan glông mơ̆ng plơi pla mơtam.