Truh ră anai, Anom bruă Ding jum Kông an hơmâo mă 90 klai prăk djru kơ bruă ming pơkra tơlơi truh lŏn adai ngă. Ngă tui “Bruă mă Quang Trung” yua Khua dêh čar pơphun, Ding jum kông an hơmâo jao bruă man pơdong phrâo 429 boh sang djru ba mơnuih ƀôn sang ƀơi 8 boh tơring gah kual Tong Krah - Dap Kơdư. Truh ră anai, hơmâo laih 19 boh sang hơmâo man giong, rơgao hrơi pơkă laih; lu boh sang pơkŏn glăk ngă giong truh 70% laih. Abih bang mrô sang him lăng hơmâo man giong hăng jao glăi kơ neh wa hlâo lơ 15/1/2026, gir man giong tañ hloh mơ̆ng 10 truh kơ 15 hrơi ƀơi hơdôm boh plơi.

Pô pơ ala kơ khua mua tơhan kông an hơdôm boh tơring hơmâo lăi pơthâo bruă mă tui tơlơi pơtrun “4 ƀơi anih” amăng pơgang tơlơi truh lŏn adai ngă hăng bruă iâu pơthưr neh met wa gum bong kjăp rơnuk rơnua ƀơi hơdôm kual juăt ia dăo; bruă pôr pơthâo, hmư̆ hing hơjan kơthel, ming pơkra tơlơi truh...

Thiếu tướng Nguyễn Hữu Phước, Khua kông an tơring čar Khánh Hòa brơi thâo, tal hơjan ia dăo phrâo rơgao ƀơi Khánh Hòa ngă dăo lu anih, rơbêh kơ 100.000 boh sang anŏ ia dăo, răm rai, rơngiă prăk rơbêh kơ 5.000 klai. Kông an tơring čar iâu pơthưr 6.500 wơ̆t čô khua, ling tơhan gum nao djru, ba pơđuăi ană plơi, ming pơkra tơlơi truh ia dăo ngă. 800 boh rơdêh, kanô, song hơmâo ba nao djru, hơmâo djru brơi giăm 20 rơbâo čô nao pơ anih hơđong. Tơdơi kơ ia dăo, Kông an tơring čar ăt man pơdong brơi 24 boh sang amăng jơlan hơdră “Bruă mă Quang Trung”:“Ƀing gơmơi hơmâo kah pơpha bruă, pơkiăo nao tơhan, rơdêh, song nao djru. Hăng pran jua gơmơi hơmâo hơget lĕ gơmơi djă ba djru ană plơi. Ƀing tơhan pơ să, tơhan wai lăng plơi pla tuh rơyuh nao ngă bruă, djru neh met wa amăng hrơi ia dăo. Ia trun dơ̆ pă, gơmơi kih rơmet dơ̆ anun”.

Thiếu tướng Nguyễn Hồng Nguyên, Kơ-iăng khua Anom bruă Ding jum Kông an bơni biă pran jua ngă bruă thâo prăp rơmet hlâo, hăng tơlơi ba glăi mơ̆ng bruă pôr pơthâo pơgang hlom hlâo hăng “Bruă mă Quang Trung” mơ̆ng djŏp khul grup, plơi pla; laih dong lăi, anai jing bruă hơmâo Ding jum Kông an lăng ba biă, pơƀut ngă na nao mơtăm.

Thiếu tướng Nguyễn Hồng Nguyên kiăng hơdôm anom bruă, Kông an djŏp boh tơring kiăo tui tơlơi hơmâo amăng plơi, ngă tui djơ̆ tơlơi git gai mơ̆ng Ping gah, Kơnuk kơna. Laih dong pơtrut bruă pôr pơhing, pơtô lăi, biă ñu amăng plang internet, ngă hơmâo tơlơi pơplih kơtang amăng tơlơi pơmin, bruă git gai črâo bruă, akŏ pơdong tơhan Kông an mơnuih ƀôn sang ăt kah hăng bruă pơhlom pơgang mơnuih ƀôn sang, pơhlom tơlơi hơdip mơnuih ƀôn sang, pơsir hĭ tơlơi truh lŏn adai ngă. Thiếu tướng Nguyễn Hồng Nguyên lăi:“Thun 2026, tơhan Kông an hơmâo bruă bơkơtưn 3 hloh: tui tơlơi phiăn hloh, pran jua tơpă sit hloh, jê̆ giăm ană plơi hloh. Sit hnun yơh, bruă pôr pơhing rup kông an mơnuih ƀôn sang jing lu bơnah, pơtum glăi lu tơlơi”.