Pok pơhai ngă tui “Hơdră ngă bruă tui Quang Trung”, Quân khu 5 hơmâo pơtum pơƀut djop mơta, djru man pơdong 610 boh sang phrâo hăng pơkra ming 314 boh sang răm rai kơtang amăng djop plơi pla khul ling tơhan pơdong. Kơnong ƀơi tơring čar Dak Lak, 331 boh sang hơmâo man pơdong phrâo, amăng anun 96 boh sang hơmâo man pơdong giong tañ hloh hăng jao brơi amăng tal 1 anai.

Đĭ pơhiăp amăng mông ngă lơphet, Trung tướng Lê Ngọc Hải-Khua git gai tơhan Quân khu 5 brơi thâo, ngă tui “Hơdră bruă Quang Trung”, ling tơhan hơmâo glăi pơ plơi pla tañ hloh, man pơdong brơi sang tañ hloh, kiăng neh met wa hơmâo sang dŏ, hơđong tơlơi hơdip, čơkă thun phrâo mơ-ak mơ-ai, pơđao pran jua. Hơdôm boh sang phrâo ƀu djơ̆ kơnong lĕ anih dŏ đôč ôh mơ̆ ăt lĕ anih gơnang nao, ba glăi tơlơi mơ-ak kiăng neh met wa găn rơgao tơnap tap, hơkrŭ glăi tơlơi hơdip tơdơi kơ hơjan ia ling dăo.

Ƀơi Khánh Hòa, bruă jao sang dŏ tal anai hơmâo 6 boh sang anŏ, amăng phường Đô Vinh, să Phước Hậu hăng să Tây Khánh Sơn. Kiăng hơdôm boh sang hơmâo pơkra djơ̆ hrơi, pơhlom klă, Anom bruă git gai tơhan Kual 5 git gai kơ Anom bruă tơhan tơring čar Khánh Hòa ngă hrŏm kjăp hăng Tơhan ia rơsĭ kual 4, Lữ đoàn Đặc công apăn bruă ñŭ ia 5 hăng tơhan amăng plơi, găn rơgao adai ƀu lăp, ƀơi pơ-iă ƀơi hơjan, pơphun ngă hrơi mlăm mơtăm, ƀu pơdơi pơdă dong tah. Amăng anun, Anom bruă tơhan tơring čar Khánh Hòa, Kual 4 tơhan ia rơsĭ hăng Lữ đoàn Đặc công apăn bruă ñŭ ia 5 rim anom bruă gum man pơdong 2 boh sang.

Pơhiăp ƀơi mông jao sang, Thiếu tướng Trần Thanh Hải, Kơ-iăng khua tơhan Kual 5, pơsit “Bruă mă Quang Trung” pơsit brơi pran jua thâo djru nao rai tơdruă, tơlơi pơmin hiam mơ̆ng ană mơnuih Việt Nam ta amăng mông tơnap tap; pơƀuh tơlơi pơmin “Pơpă hơmâo ană plơi tơnap, pơ anun hơmâo tơhan ƀô̆ đô̆i”.