Hơdôm hrơi hăng anai, ƀơi anih dŏ mă bruă man pơdong sang phrâo plơi Phú Phong, să Hoà Thịnh, tơlơi mă bruă hăt ba mơtam yơh, mŏng mơguah sing bring yang hrơi aka ƀlĕ truh pơ krah mlam adih kah pơdơi. Rim čô tơhan mă bruă lăng hmrih hmrah mơsah sum ao ia hŏu, hyu pơdŭ simăng, pơdŭ ba ƀrik, gač, lŭk čuah simăng, kiăng man pơdong tañ giong sang brơi mơnuih ƀôn sang. Tơhan phrâo mut sa thun Hạ sĩ Thái Tiến Tài, gah Tiểu đoàn 35, Tơhan blah kơtang thâo bơtaih mrô 198 brơi thâo, rim hrơi lăng kơ sang ƀiă giong laih, ƀing adơi ayong amăng puih kơđông mơak pran jua biă mă:

“Kâo ƀuh lăp pơ-ư ang biă mă yua hơmâo ngă hrŏm amăng bruă anai, djru ba ană plơi pla mơnuih ƀôn sang kual ia ling dăo. Lơ̆m rai pơ anai, lăng kơ mơnuih ƀôn sang tơnap tap, sang dlưh djơh hăng anun. Tuč rơnuč ƀuh boh tơhnal ta mă bruă djru hrŏm anai, kâo ƀuh mơak biă mă, lăp pơ-ư ang biă”.

Hăng ană plơi pla plơi Phú Phong, să Hòa Thịnh, tơlơi ƀuh ƀô̆ mơta ƀing ling tơhan djru hrŏm hơdôm hrơi rơgao, jing kah hăng anih kơnang tơki prong biă mă. Yă Nguyễn Thị Tám, thun anai 80 thun, ol kơdl pran jua yua kơ hlăk laih ia ling dăo, sang ia kor đuăi tơngul, ñu sư̆ rơbư̆ ƀu hơmâo anih dŏ anŏ ƀong, ră anai, prăp či mut dŏ amăng sang phrâo pơdong, ñu lăi:

 “Hlăk ia lip ƀlia sang ia kor pơđuăi, kâo ƀu thâo pơmin nao ôh ta či hơmâo glăi sang dŏ phrâo hrup anai. Ră anai hơmâo sang dŏ phrâo klă biă mă yơh, sang hiam yua ƀing tơhan pơdong brơi, prăk kơnuk kơna djru, ruah hơbô̆ sang kiăng man pơdong, ia pik mia ăt hiam mơ̆n. Ră anai, djop pô rai čuă lăng bơni soh lăi sang hiam”.

Git gai khul ling tơhan dŏ mă bruă, Thiếu tá Nguyễn Văn Vượng, Tiểu đoàn 35, Lữ đoàn tơhan blah hmar thâo bơtaih 198 brơi thâo, amăng anih gơñu arăng jao dŏ mă bruă, adai hơjan na nao đôč, abih ha blan laih. Lơ̆m anun, jơlan nao rai kơniă, tơnap pơdŭ pơgiăng gơnam man pơdong sang. Hơmâo plơi, ƀut anet phiăr tong krah hmua dơnao, trăp trang, tơmŏk hơjan đôč, jơlan ƀu thâo truh, ƀing tơhan khom rô̆ amăng hlŭ dơlut glăm ba, pơdŭ gơnam man pơdong sang, glăm kơsăk simăng, čuah, ƀrik tơnap tap biă mă, wơ̆t amăng mơmŏt mlam, pơblih nao rai mông mă bruă ƀu pơdơi ôh, pô anai pơdơi, pô adih mă bruă, pơblih nao rai mă bruă sa dơnuai kiăng tañ giong, kiăo tui hrơi mông pơkă, kiăng tañ man pơdong khom giong sang kơ mơnuih ƀôn sang hlâo kơ hrơi ngă yang thun phrâo.

  “Lơ̆m dŏ djru mơnuih ƀôn sang pơ anai, gơmơi ngă bruă abih pran jua glăm ba sit nik, ƀu kơdŭn hrơi hăng mlam ôh, hơjan ƀudah không hai, adai ayuh hyiăng ƀu gêh găl ăt gir run mă bruă. Hăng pran jua run ran tui anun, ƀing khua mua, ling tơhan gơmơi gum pơgôp ha pran jua, pơdjru, khăp pap tơdruă, pơtô lăi mă bruă gir run kiăng ngă giong bruă jao hiam klă hloh, amăng ƀiă hrơi hloh”.

Truh ră anai, bruă ngă tui Bruă mă Quang Trung man pơdong sang brơi kơ mơnuih ƀôn sang kual ia ling dăo ƀơi Dak Lak hlăk yak nao amăng črăn rơnuč yơh. Hăng khul tơhan blah kơtang thâo bơtaih 198, hơmâo 5 boh sang laih gơñu ngă giong. Hơdôm boh sang dŏ glăi amra jao amăng hơdôm hrơi pơ anăp, kiăng hmao hăng hrơi pơkă lĕ lơ 15/1/2026 khom giong abih, tui khua dêh čar pơtrun ngă. Hrŏm hăng anun, kiăng djru mơnuih ƀôn sang tañ hơđong tơlơi hơdip mơda, puih kơđông khul tơhan anai ăt prăp lui djru ba djop gơnam yua kơ pô sang kah hăng tivi, kơƀang grê, sưng pit, gŏ amŏ, čơlŭ mong, ƀuông, awă, abăn khăn, musker hăng mơnong ƀong huă prăp lui hlâo kơ pô sang čơkă thun phrâo. Thượng tá Phạm Sỹ Cương, Kơ-iăng khua gah bruă kơđi čar khul tơhan Lữ đoàn Đặc công tơhan blah kơtang thâo bơtaih 198 brơi thâo:

“Ƀing gơmơi gir run mơ̆ng hrơi blung a amra ngă giong djơ̆ hrơi pơkă, abih bang sang gơmơi man pơdong truh lơ 9/1 ngă giong, jao glăi kơ mơnuih ƀôn sang. Mơ̆ng anun, djru kơ pô sang, mơnuih ƀôn sang hơmâo bơyan čơkă thun phrâo ƀong têt Bính Ngọ mơak klă, jơngum trơi pơđao”.

 Tết thun phrâo 2026 hlăk rai giăm laih, plơi Phú Phong, să Hòa Thịnh, tơring čar Dak Lak hlăk buh ao phrâo amăng drơi pô hơbô̆ phrâo hiam hloh. Ƀơi atur sang hơđăp lăng drưp drap răm ƀăm, rai tơplŭk ia kor đuăi, tơdơi kơ tal ia ling dăo amăng blan 11 thun 2025, hơdôm boh sang phrâo kơjăp, hiam hloh hlăk n gă giong čăt đĭ. Ƀơi anun, djă jă gru kơđŏm ƀing tơhan thâo bơtaih đặc công 198, hlăk gir run hrơi mlam ƀu pơdơi ôh mă bruă, kiăng mơnuih ƀôn sang tañ hơđong tơlơi hơdip mơda.

Hơdôm boh sang phrâo anun, ƀu kơnong man pơdong đĭ hăng ƀrik, boh pơtâo, simăng đôč ôh, pơdong đĭ hăng ia hŏu ( ia hô̆ ), tơlơi mă bruă tơpă hăng tơlơi khăp dơlăm mơ̆ng ƀing tơhan đặc công 198, pioh kơ mơnuih ƀôn sang. Bruă Lữ đoàn Đặc công mơ̆ng ding jum mrô 198 gir run kiăng ngă tañ amăng Bruă mă Quang Trung hlâo kơ hrơi pơkă lĕ, sa wơ̆t dơ̆ng kiăng pơtong rơđah pran jua hiam klă, rup rap lăng nao kơ ling tơhan rơnuk Wa Hô-ƀuh ƀô̆ mơta mơtam sit mơnuih ƀôn sang kiăng tơki kơnang, gơñu amra găn rơgao djop tơlơi lông lăng tơnap tap yua kiăng tơlơi hơdip mơda rơnuk rơnua brơi kơ mơnuih ƀôn sang.