Sit hơmâo ƀơi să Ea Na, tơring čar Dak Lăk, anih hơmâo 70 boh sang anŏ glăk pơtruh ngă hmua pơkra gơnam tŭ yua amăng bruă pơjing nua kơphê. Amăng anih pơkra gơnam hơmâo bă kơ kơsăk kơphê, ơi Y Jai Hđơk, sa amăng hơdôm čô mơnuih ngă hmua ƀon Kla, să Ea Na, tơring čar Dak Lăk mut hrŏm ruăi pơtruh nua kơphê, brơi thâo, anai jing bơyan pĕ kơphê tal 2 dong mơ̆ng hrơi neh met wa pơtruh ngă hrŏm hăng Kông ti pơčruh ngăn Êđê kơphê, hơmâo tơlơi pơhlom pơgang hăng djru ba mơ̆ng kơnuk kơna. Mut hrŏm anih pơtruh anai, neh met wa hơmâo pơtô brơi boh thâo ngă hmua djơ̆ akŏ tlôn, hơmâo brơi kmơk, ia jrao pơgang hăng hơmâo anom mơdrô blơi gơnam nua pơmă hloh kơ gah rơngiao. Tơlơi anai yơh ngă ơi Y Jai mơak hloh, thun anai kơphê sang anŏ ñu pơmă hloh ha mơkrah pơhmu hăng thun hlâo: “Kơphê thun anai jing hơmâo rơgao hloh 2/3 pơhmu hăng thun adih. Hơmâo pơtruh ngă hrŏm pla kơphê tui anai jing klă hloh biă hăng neh wa. Tơdah kơnuk kơna djru brơi ngă gêh găl ƀiă dong amra kjăp hloh kơ neh met wa ngă kơphê”.

Jơlan hơdră dêh čar hrŏ trun ƀun rin hơđong rơwang thun 2021-2025, sa hơdră ngă bruă prong mơ̆ Khua mua pơ ala mơnuih ƀôn sang pơtrun, hơmâo ngă hăng lu bruă tŭ yua biă ƀơi Dak Lăk. Kơnong hăng Kơčăo bruă 3, sa amăng 9 kơčăo bruă mơ̆ng jơlan hơdră, 5 thun rơgao, hơmâo brơi nao rơbêh 223 klai, djru brơi giăm 6.700 hơbô̆ bruă ngă hmua, pơkra gơnam, pơjing rai lu tơlơi bơwih ƀong. Amăng anun, hơdôm hơbô̆ bruă pơtruh pơkra gơnam kiăo tui nua gơnam, ba glăi tơlơi pơplih prong hloh. Ƀu kơnong djru neh met wa ngă hmua rơgơi hloh, nua gơnam pơmă hloh đôč ôh, ăt djru anom mơdrô hơmâo kual pla gơnam hơ in pran jua, pơkra bơbruai mơ̆ng akŏ truh pơ tlôn, hăng akŏ pơjing anăn gơnam.

Hơjăn Y Pôt Niê, Khua kông ti pơčruh ngăn Ê Đê kơphê, djŏp nua pơkra kơphê mơ̆ Kơnuk kơna pok pơhai ngă amăng plơi pla, ăt pơjing rai anŏ yom amăng pran jua dong: “Mơ̆ng đưm truh ră anai aka ƀu hơmâo ôh mơnuih Êđê pơpă thơ dưi pơtruh bơwih ƀong tui anai. Yua hnun, năng blung neh met wa dŏ đing đăo mơn kơ kâo. Khă hnun, tơdơi kơ pơtruh hăng Kơnuk kơna, hơmâo kơnuk kơna djru ba ha bơnah, hăng kâo djru ba ha bơnah, jing neh met wa ƀuh hơmâo laih tơlơi pơtruh nao rai, gum pơgôp hăng đăo kơnang lu hloh. Jing kâo lăng rơnoh yom nua gơnam ƀơi anai ƀu kơnong nua gơnam đôč ôh, ăt jing anŏ yom pran jua ană mơnuih ta dong”.

Dak Lăk tơdơi kơ pơmut hrŏm hơmâo pok prong, jing kual dap kơdư prong krên dên pơtruh guai mơ̆ng Yŭ truh pơ ia rơsĭ gah Ngŏ. Kual lŏn mơ̆ng rơbêh 50 phung djuai ania hơdip hrŏm, ăt jing anih hơmâo bruă ngă hmua hăng lu djuai phara mơn, kơphê, sâu riêng, tiu, kơsu lu hloh amăng dêh čar; pơdai ia dong gah tlôn Kual lŏn dăo ia krông Hồng hăng ia krông Cửu Long đôč. Yua hnun, Tơlơi pơtrun mơ̆ Khua mua pơ ala mơnuih ƀôn sang dêh čar pơtrun Jơlan hơdră dêh čar đĭ kyar bơwih ƀong huă - mơnuih mơnam kual mơnuih ƀôn sang djuai ƀiă hăng čư̆ siăng sit nik amra pơtrut tui boh tŭ yua hloh, pok rai nua yom mơ̆ng glai truh pơ ia rơsĭ.

Ơi Nguyễn Xuân An, Khua anom bruă gru grua mơnuih mơnam să Ea Na brơi thâo, amăng să hơmâo lu tơlơi ngă hmua phara mơ̆ng Dak Lăk, mơ̆ng pơdai ia, phun pla sui thun, truh kơ rông akan hơdang laih anun ăt pơjing thim hơbô̆ bruă pơtruh nua gơnam, kiăng apăn bruă ngă hmua pơkra gơnam sĭ mơdrô pơplih phrâo hloh ƀơi hơdôm boh plơi pla: “Rơngiao kơ bruă pơtruh ngă kơphê lĕ thun anai să pok thim bruă pơtruh ngă pơdai, đah mơ̆ng djơ̆ hăng hơdôm boh plơi hơmâo wơ̆t pơdai hăng kơphê. Hăng prăk Kơnuk kơna djru amra djru neh wa boh thâo ngă hmua, kmơk pruai hăng ngă hmua djơ̆ hơdră. Hơdôm anom mơdrô tơdah dưi mut hrŏm amra čih anăn rơkâo mut. Amăng anih pơtruh ngă hmua anai, mơnuih ngă hmua pơkra gơnam djơ̆ hơdră lĕ hơmâo anom bơwih ƀong blơi gơnam pơmă hloh kơ gah rơngiao”.

Kơnuk kơna djru brơi prăk, mơnuih mă bruă, kơnuk kơna pơtŏp brơi boh thâo ngă hmua, kơnuk kơna pơtruh ană plơi hăng anom mơdrô, anun jing boh tŭ yua mơ̆ng hơbô̆ bruă pơtruh pơjing nua gơnam, ha bơnah anet samơ̆ yom biă mă amăng bruă ngă tui hơdră djru mơ̆ng Khua mua pơ ala mơnuih ƀôn sang dêh čar kơ đĭ kyar bơwih ƀong - mơnuih mơnam kual mơnuih ƀôn sang djuai ƀiă hăng čư̆ siăng. Hơdră djru hơmâo hrơi pơkă, samơ̆ bruă pơtruh nao rai jing atur khăng kjăp laih anun pok brơi neh met wa kual Dap Kơdư tơlơi đĭ kyar hơđong, pơdrong sah, trơi pơđao.