Ăt amăng tal nao čuă hăng mă bruă ƀơi Gia Lai, mơguah lơ 28/4, Khua tơhan krên Đại tướng ơi Nguyễn Trọng Nghĩa, ding kơna ding jum kơđi čar, ding kơna khul git gai ping gah, Khua anom bruă kơđi čar ling tơhan mơnuih ƀôn sang Việt Nam hrŏm hăng grup khua mua hyu mă bruă mơ̆ng gơnong dlông, nao čuă, ƀơk gơnam kơ lu sang anŏ ngă hơkrŭ, mơnuih hơkrŭ amăng đơ đam tơring čar ƀrô hơdor glăi 51 thun hrơi pơklaih rơngai kual Dơnung, pơlir lŏn ia jing sa. Ƀơi mông bưp, grup hơmâo jao 300 anung gơnam kơ sang anŏ hơmâo ngă hơkrŭ, sang anŏ ƀun rin, mơnuih ngă kông ñơn hăng mă bruă apah tơnap tap. Khua tơhan krên dêh lăi pơtong, bruă wai lăng đing nao tơlơi hơdip sang anŏ mơnuih ngă hơkrŭ jing bruă mă kơđi čar khom ngă tui na nao mơ̆ng ping gah hăng kơnuk kơna, kiăng ngă tui tơlơi phiăn hiam klă “Ƀong boh hơdor kơ pô pla, mơñum ia hơdor kơ pô klơi” djuai ania ta. Laih dơ̆ng rơkâo, djop gưl anom bruă ping gah, gong gai kơnuk kơna ăt ngă klă bruă hơdor tơngia, đing nao lu hloh kơ tơlơi hơdip mơda, gơnam yua kơ sang anŏ hơmâo djru kơnuk kơna, kiăng ngă kơjăp tui tơlơi đăo kơnang mơ̆ng mơnuih ƀôn sang, kơtưn ngă kơjăp tui tơlơi gum pơgôp djuai ania.

Mơguah lơ 28/4, grup hyu mă bruă gơnong glông yua ơi Nguyễn Thanh Nghị, ding kơna Ding jum kơđi čar, Khua apăn bruă Ping gah, Khua khul hơdră bruă, bruă ngă yôm phun gơnong glông ba jơlan hlâo nao tơña bla, jao anung gơnam brơi hơdôm boh sang anŏ tui hơdră djru, sang anŏ ƀun rin hăng mơnuih mă bruă tơnap tap amăng să Quảng Phú, tơring čar Dak Lak. Grup hơmâo jao 80 anung gơnam kiăng djru brơi, juh alum ƀing mơnuih tơnap tap amăng ƀon lan.

Amăng mông bưp, ơi Nguyễn Thanh Nghị tơña bla tơlơi suaih pral, tơlơi hơdip kơ neh met wa, laih dong mơ-it nao juh alum mơng Khua mua Ping gah hăng kơnuk kơna tơl hơdôm boh sang anŏ dŏ lu tơnap tap. Ñu čang rơmang hơdôm boh sang anŏ tŏ tui pran gum pơgôp, gir run bơwih ƀong kiăng ƀơƀrư̆ hơđong tui, tơlơi hơdip đĭ đăi. Lăi pơtong jơlan gah yak nao pơ anăp, ñu pơsit tong djop gưl, gơnong bruă amra tŏ tui pok pơhai hơdôm hơdră djru mơnuih mơnam, pơhlôm abih bang mơnuih ƀôn sang lêng kơ tŭ mă djop tơlơi dưi pơđĭ kyar, anăm brơi hlơi ôh dŏ glăi gah tlôn.