Ƀơi să Ia Băng, tơring čar Gia Lai, akŏ jơlan rơdêh đuăi hmar Quy Nhơn-Pleiku, mah glăk amăng bơyan pơdơi ngui ngă yang, jua rơdêh kuăi, rơdêh čuk ăt hmư̆ dik dak tơhrơi hăng mlăm. Lu rơdêh đuăi nao rai pơdŭ lŏn ba hyu tuh kiăng jơlan dơ̆ng dơ̆, ngă mông čuk pơkra ječ ameč. Ơi Trương Anh Đài, git gai bruă čuk pơkra mơng anom bruă man pơkra ƀơi ară jơlan črăn tal 3, ară jơlan găn nao să Ia Băng brơi thâo:

“Kiăng pơtrut tañ bruă man pơkra hăng hơneč mă lơm adai glăk không phang, kông ti pơsit pơhrui glăi lŏn hơdơ̆ hơpă man pơkra hơdơ̆ anun, pơphun ngă 3 ka 4 kip, ngă na nao amăng tơhrơi hăng mlăm kiăng pơtrut tañ bruă man pơkra; hơdră bruă anai lĕ kơtưn pơhrua măi mok, mơnuih mă bruă, pơtrut ngă tañ hlâo kơ bơyan hơjan hlim”.

Jơlan rơdêh đuăi hmar Quy Nhơn-Pleiku glông giăm 125 km, hơmâo pơčlah jing 3 črăn. Amăng anun, ară črăn mrô 1 hăng mrô 3 hơmâo pơgiong bruă pơhrui glăi lŏn mơnai mơng 65-67%. Anai ăt lĕ sa amăng hơdôm ring bruă akŏ phun hăng hrơi mông man pơkra tañ amăng tơring čar Gia Lai, yua hơmâo tơlơi mut hrŏm mơng mơnuih ƀôn sang rôk anih čuk pơkra. Lu sang anŏ hơmâo gơgrong gum hrŏm, tañ jao lŏn mơnai kiăng djru brơi bruă čuk pơkra. Ayong Yôh, mơnuih ƀôn sang djuai ania Bahnar dŏ amăng plơi A Lao, să Lơ Pang, hơmâo lŏn dong amăng lŏn mơnai arăng mă pơhrui glăi, ñu brơi thâo:

“Sang anŏ gơmơi ngă tui tơlơi črâo trun mơng Kơnuk kơna kơ bruă čuk pơkra jơlan rơdêh đuăi hmar, mơng hrơi pok pơhai čuk pơkra hơmâo tơlơi mut hrŏm. Nua prăk duh lŏn mơnai lăp djơ̆, sang anŏ ăt tŭ ư mơn”.

Gah tlôn bruă čuk pơkra ječ ameč hrơi anai lĕ hơdôm thun rơkâo đĭ mơng mơnuih ƀôn sang ruah khua hăng ƀing khua pơ ala mơnuih ƀôn sang tơring čar Gia Lai. Amăng hơdôm thun, jơlan mrô 19 arăng lăng lĕ jơlan tơkuh nao rai kơplah wah Gia Lai hăng Bình Định hơđăp. Bruă đuăi nao rai rôk jơlan čon čoe anun lĕ An Khê, Mang Yang ngă kơ bruă rơngiă hrơi mông hăng prăk duh pơdŭ pơgiăng, sit biă ñu lĕ gơnam đang mua lêng kơ lu biă mă. Ơi Nguyễn Hữu Thọ, dŏ amăng să Đăk Đoa, tơring čar Gia Lai brơi thâo, mơnuih ƀôn sang ruah khua ƀơi ƀon lan lu wŏt rơkâo čuk pơkra jơlan rơdêh đuăi hmar Ngŏ-Yŭ tơkuh nao rai kual Dap kơdư hăng ha ia rơsĭ kual Tong krah, sit biă ñu lĕ jơlan Pleiku-Quy Nhơn. Hơdôm tơlơi rơkâo anai hơmâo Khua pơ ala mơnuih ƀôn sang tơring čar Gia Lai tŭ yap, glăk lăi pơthâo amăng hơdôm mông jơnum Khua pơ ala mơnuih ƀôn sang dêh čar, kơnuk kơna hăng djop ding jum, gơnong bruă.

“Akŏ bruă jơlan rơdêh đuăi hmar Quy Nhơn-Pleiku lĕ tơlơi čang rơmang mơng mơnuih ƀôn sang ƀơi ƀon lan sui laih. Mơnuih ƀôn sang ruah khua rơkâo đĭ Khua pơ ala mơnuih ƀôn sang, wŏt ƀing khua pơ ala amăng tơring čar hăng gơnong glông, lêng lăi nao tơlơi čang rơmang anai. Găn rơgao 2 rơwang ngă bruă mơng Khua pơ ala mơnuih ƀôn sang dêh čar tal 14 hăng 15, lêng kơ hơmâo tơlơi rơkâo đĭ Khua pơ ala mơnuih ƀôn sang dêh čar hăng Kơnuk kơna, kiăng lăp djơ̆ tơlơi kiăng mơng mơnuih ƀôn sang”.

Mơnuih ƀôn sang ruah khua hăng abih bang mơnih ƀôn sang ƀơi Gia Lai pơdah pran hur har pran jua lơm jơlan rơdêh đuăi hmar Quy Nhơn-Pleiku glăk ƀơƀrư̆ pok pơhai man pơkra, glăk ƀuh tui yơh tơdơi kơ sui thun dŏ tơguăn. Ring bruă anai čang rơmang amra pơgôp pơsir hĭ lu tơlơi tơnap tap amăng bruă nao rai, sĭ mơdrô hlâo anun gơnang nao jơlan mrô 19 hăng lu ară jơlan čun čoe, mơng anun ngă gêh gal brơi mơnuih ƀôn sang hăng anom bruă sĭ mơdrô amăng pơđĭ kyar bơwih ƀong huă. Amai Phạm Thị Thu, dŏ amăng phương Pleiku, juăt nao rai bơwih ƀong ƀơi Quy Nhơn, ñu lăi:

“Sang anŏ gơmơi juăt hyu bơwih ƀong pơ Quy Nhơn, bruă nao rai rôk tui jơlan glông ră anai tơnap tap biă, juăt rơngiă mơng 4 truh pơ 5 mông. Lơm hmư̆ hing amra čuk pơkra jơlan rơdêh đuăi hmar, kâo hok mơ-ak biă mă. Tui kâo hmư̆, jơlan rơdêh đuăi hmar anai pơgiong amra hrŏ trun mông nao rai dŏ kơnong 2 mông. Yua anun, ƀing hyu bơwih ƀong sĭ mơdrô kar hăng ƀing gơmơi amra huăi rơngiă hrơi mông, prăk kak dong tah lơm đuăi nao rai”.

Jơlan rơdêh đuăi hmar Quy Nhơn-Pleiku ƀu djơ̆ kơnong lĕ ară jơlan akŏ phun amăng tơring čar Gia Lai đôč ôh mơ̆ ăt brơi ƀuh tơlơi čang rơmang sit nik mơng mơnuih ƀôn sang lêng kơ tŭ mă hăng ngă tui. Hơdôm boh than anai ƀu djơ̆ kơnong pơgôp pơsir hĭ hơdôm bruă amăng ƀon lan đôč ôh mơ̆ ăt ngă atur kiăng ƀing Khua pơ ala mơnuih ƀôn sang tơring čar Gia Lai tŏ ngă tui tơlơi gơgrong pơ anăp dong. Ơi Châu Ngọc Tuấn, kơ-iăng Khua git gai Ping gah tơring čar, Khua grup Khua pơ ala mơnuih ƀôn sang tơring čar Gia Lai brơi thâo:

“Ƀing gơmơi lêng kơ hluh rơđah tơlơi gơgrong, tơlơi glăm ba mơng khua pơ ala mơnuih ƀôn sang tơring čar kiăng prong ƀiă dong. Grup Khua pơ ala mơnuih ƀôn sang tơring čar Gia Lai djop rơwang ngă bruă amra tŏ tui gru grua, pơgiong klă bruă jao mơng sa čô khua pơ ala mơnuih ƀôn sang, pơgôp pơjing lŏn ia Việt Nam, amăng anun hơmâo tơring čar Gia Lai pơđĭ kyar tañ, hơđong kjăp hăng lu gru grua yôm phara”.

Jơlan rơdêh đuăi hmar Quy Nhơn-Pleiku glăk pok pơhai ječ ameč ƀơi tơring čar Gia Lai, anai lĕ pơƀuh rơđah brơi tơlơi čang rơmang sit nik mơng mơnuih ƀôn sang ruah khua hăng abih bang mơnuih hơmâo tŭ mă hăng ƀơƀrư̆ ngă jing hơdră bruă, jing hơdôm ring bruă tong ten. Mơng anun, pơgôp pơtrut pơđĭ kyar phrâo brơi kual Dap kơdư hăng ter hang ia rơsĭ kual Tong krah./.