Ƀuh ƀô̆ mơta ƀơi kual plơi pla phrâo mơng mơguah, ơi Nay Ơn, mơnuih dŏ amăng plơi Nông Siu, să Ia Dreh, hok mơ-ak lơm dưi ruah mă anih dŏ phrâo. Ñu brơi thâo, hơdôm thun rơgao, sang anŏ dŏ hơdip amăng kual juăt ia ling dăo, guang dar lơm truh bơyan hơjan hlim. Tal anai, ñu lĕ sa amăng 20 boh sang anŏ amăng hơdôm boh plơi Ia Klon, Gom Gốp, Bhă Nga hăng Blăk hơmâo arăng dưm dăp brơi anih dŏ phrâo. Kual plơi pla phrâo Ia Dreh prong 5,77 ektar, abih tih prăk tuh pơ alin 127 klai prăk, ră anai hơmâo pơgiong anih anom, glông hrĕ apui lơtrik truh giăm 75% hăng bruă pơpha lŏn hơmâo pơgiong. Ơi Nay Ơn brơi thâo: “Plơi pla hơđăp ƀu gêh gal, juăt ia ling dăo, ƀing gơmơi bơngơ̆t biă. Ră anai kơnuk kơna djru brơi rĭm boh sang anŏ rai dŏ pơ anih dŏ phrâo rơnuk rơnua, mơ-ak klă. Kâo hok mơ-ak biă, bơni kơ kơnuk kơna hơmâo djru brơi ƀing gơmơi”.

Ƀu djơ̆ kơnong ƀơi Ia Dreh, 952 boh sang anŏ kual ia ling dăo ƀơi hơdôm boh să Ia Tul, Ia Hiao, Ia Rsai, Uar, Dak Song hăng Ia Ly ăt amra dưm dăp anih dŏ phrâo rơnuk rơnua ƀiă, tơlơi anai huăi ngă bơngơ̆t lơm truh bơyan hơjan kơthel.

Gia Lai lĕ plơi pla kơ ơi pơtao Quang Trung. “Hơdră bruă Quang Trung” hơmâo tơring čar Gia Lai pok pơhai mơng anai truh kơnôl 15/12/2026, hăng hơnong pơkă ba abih bang mơnuih ƀôn sang tơbiă mơng kual juăt ƀuh lŏn tơhroh, ia ling dăo hlâo kơ bơyan hơjan hlim. Đơ đam tơring čar pok pơhai 16 akŏ bruă dưm dăp, pơhlôm hơđong anih dŏ brơi mơnuih mơng kual juăt ia dăo. Amăng anun, kual Yŭ tơring čar hơmâo 7 akŏ bruă man pơdong plơi pla phrâo hăng abih tih prăk tuh pơ alin rơbêh 875 klai prăk. Hơdôm kual plơi pla hơmâo tuh pơ alin man pơkra jơlan glông, dăng hrĕ apui lơtrik, glông pơđoh đuăi ia, apui kơđen, sang hră, sang jơnum plơi pla hăng hơdôm ring bruă pơkŏn, ngă atur phun kiăng mơnuih ƀôn sang hơđong tơlơi hơdip mơda.

Kiăng pơhlôm djơ̆ hrơi mông, Jơnum min mơnuih ƀon sang tơring čar Gia Lai rơkâo pơgiong abih bang hlâo kơnôl 31/8, jao glăi 100% sang dŏ hlâo kơnôl 30/11 hăng pơgiong bruă ba đuăi mơnuih ƀôn sang hlâo kơnôl 15/12. Hăng hơdôm boh sang anŏ ƀu hơmâo mơnuih man pơdong sang, hơdôm boh ƀon lan amra pơkiăo nao mơnuih, djru brơi gơnam tam, prăk kak ngă tui hơdră bruă “Boh khiă jao tơngan”, djru brơi mơnuih ƀôn sang hơmâo sang dŏ tơdơi kơ man pơdong giong. Ơi Dương Mah Tiệp, kơ-iăng khua Jơnum min mơnuih ƀon sang tơring čar Gia Lai rơkâo: “Khul wai lăng tuh pơ alin man pơdong mơng tơring čar hăng hơdôm anom bruă man pơdong ba nao djop măi mok, gơnam tam, ječ ameč pơgiong djop mơta, pơhlôm brơi rơnuk rơnua hăng djơ̆ hrơi mông. Jơnum min mơnuih ƀon sang să ngă klă bruă pơtô pơblang, pơsur kiăng hơmâo tơlơi mut hrŏm mơng mơnuih ƀôn sang, hmao tlôn pơsir hĭ tơnap tap tui tơlơi glăm ba hăng jao lŏn kiăng pơhlôm rơđah rơđông, djơ̆ tơlơi pơkă. Laih dong gơgrong mă yua ngăn rơnoh djơ̆ tơlơi phiăn hluai tui pran čơmah kiăng djru brơi mơnuih ƀôn sang man pơdong sang dŏ, sit biă ñu sang anŏ ƀun rin, sang anŏ tơnap tap”.