Hơdôm thun anai, mơnuih kơhnâo Phạm Văn Rôm dŏ amăng să Ba Vinh, tơring čar Quảng Ngãi ăt abih pran jua pơtô glăi tơlơi ngui atông čing Tlâo brơi rơnuk hlăk ai čơđai djuai ania H’rê. Ñu brơi thâo, anai lĕ djuai gông brô̆ yôm phara hloh mơng djuai ania H’rê, djă ba bơngăt jua, jing pơƀuh brơi tơlơi hơdip pơdrong sah hăng kơdrưh ang mơng pô sang hăng plơi pla.  “Blung hlâo lĕ gơmơi djă pioh hăng tŏ tui gru grua mơng mơnuih djuai ania H’rê. Dua dong lĕ, ngui atông čing tlâo hơmâo sui mơng đưm hlâo laih, yua anun čing tlâo mơng djuai ania H’rê yôm phăn biă mă, gơmơi kiăng djă pioh anŏ yôm phara mơng mơnuih djuai ania H’rê”.

Tơlơi ngui atông čing tlâo mơng djuai ania H’rê hơmâo tŭ yap lĕ gru grua gah bơngăt amăng dêh čar. Yă Trần Thị Thanh Thúy, kơ-iăng Khua Jơnum min mơnuih ƀon sang să Ba Vinh brơi thâo, ƀon lan pok pơhai akŏ bruă djă pioh, tŏ tui gru grua anai amăng bơwih brơi tuai čuă ngui. Truh ră anai, să hơmâo akŏ pơjing 4 grup gru grua-adôh suang ƀơi 4 boh plơi pla hăng glăk tŏ tui pơjing akŏ bruă djă pioh, wai lăng hăng tŏ tui gru grua čing tlâo hrŏm hăng hơdôm tơlơi ayun suang gru grua mơng ƀing đah kơmơi H’rê. Să hơmâo pok lu anih pơtô hrăm atông čing tlâo hăng bruă mơñam abăn ao, kiăng djă pioh tơlơi yôm gru grua mơng djuai ania H’rê, pơgôp pơđĭ kyar tuai čuă ngui amăng plơi pla, djru brơi tơlơi bơwih ƀong kơ mơnuih ƀôn sang dong: “Anai lĕ hơdôm bruă mă hơmâo gum djru mơng jơlan hơdră hơnong pơkă dêh čar hăng amra tŏ tui pok prong hăng ngă jing hơdôm gơnam brơi neh met wa mă yua sui pơ anăp. Ƀon lan čang rơmang amra pơmut hrŏm abih bang jơlan hơdră kiăng tuh pơ alin pơjing rai gơnam phun brơi neh met wa hluai tui hơdôm anih pơtô hrăm kar hăng anai”.

Mơng jơlan hơdră hơnong pơkă dêh čar, lu gru grua yôm phara mơng djuai ania Čor ăt glăk djă pioh hăng tŏ tui. Ƀơi hơdôm boh să kual čư̆ siăng tơring čar Quảng Ngãi, hơdôm tơlơi ngui anun lĕ atông čing, suang Cà đáo, pơdong gong drai hrŏm hăng tơlơi ngui gru grua hơmâo hơkrŭ glăi, pơtô brơi djop rơnuk. Hơdôm thun anai, mơnuih kơhnâo kơhnăk Hồ Ngọc An dŏ amăng să čư̆ siăng Trà Bồng lêng abih pran jua pơtô glăi gru grua djuai ania Čor amăng sang hră. Ñu hok mơ-ak lơm jai hrơi hơmâo ƀing hlăk ai hor kơ gru grua djuai ania pô. “Kâo pơ-ư ang biă mă lơm dưi pơgôp gum hrŏm amăng bruă djă pioh hăng tŏ tui gru grua. Kâo pô ăt lĕ mơnuih pơtô brơi ƀing čơđai sang hră ƀơi sang hră kơnuk kơna čem rông ba Trà Bồng yua anun kâo hok mơ-ak biă mă. Rĭm wŏt ngui Ngả Rạ ƀơi hơdôm boh sang hră lêng kơ pơphun tui gru grua djuai ania Čor soh”.

Pơsit tong gru grua lĕ atur phun kiăng pơđĭ kyar tuai čuă ngui hơđong kjăp, hơdôm boh ƀon lan kual čư̆ siăng tơring čar Quảng Ngãi pơlir hăng bruă djă pioh gru grua hăng pơđĭ kyar tuai čuă ngui amăng plơi pla, ƀơƀrư̆ djru tơlơi bơwih ƀong huă kơ mơnuih ƀôn sang. Ơi Đỗ Khắc Phi, kơ-iăng Khua Jơnum min mơnuih ƀon sang să Trà Bồng pơsit tong: “Mơng rơnoh prăk tuh pơ alin amăng Akŏ bruă mrô 6 mơng Jơlan hơdră hơnong pơkă dêh čar pơđĭ kyar bơwih ƀong huă-mơnuih mơnam kual mơnuih djuai ania ƀiă, Jơnum min mơnuih ƀon sang să đing nao djru kiăng tuh pơ alin kah hăng ngă tui klă bruă djă pioh gru grua amăng ƀon lan. Sit biă ñu lĕ pơtô glăi gru grua; blơi gơnam măi mok kah hăng tuh pơ alin man pơdong anih anom, blơi gơnam gru grua sô hơđăp brơi djop plơi pla. Pơ anăp anai, ƀing gơmơi amra tŏ tui đing nao mă yua ngăn rơnoh mơng hơdôm jơlan hơdră, kiăng pơđĭ kyar bơwih ƀong huă-mơnuih mơnam kual mơnuih djuai ania ƀiă hăng kual čư̆ siăng”./.